లోకేష్ తోడల్లుడు శ్రీభరత్ కు షాక్... గీతం మెడికల్ కాలేజీ ఆక్రమణల కూల్చివేత

విశాఖపట్నం : ఇవాళ (శుక్రవారం) తెల్లవారుజాము నుండి విశాఖపట్నంలోని గీతం మెడికల్ కాలేజీ వద్ద ఉద్రిక్తత నెలకొంది. నిబంధనలకు విరుద్దంగా నిర్మాణాలు చేపట్టారంటూ భారీ పోలీస్ బలగాలతో మెడికల్ కాలేజ్ వద్దకు చేరుకున్న అధికారులు కూల్చివేతలు చేపట్టారు. జేసిబిలతో కాలేజీ ప్రహారి కూల్చివేత చేపట్టారు. అయితే ఈ  కూల్చివేతలపై తమకు ఎలాంటి సమాచారం ఇవ్వలేదని... తమను ఇబ్బందిపెట్టేందుకు కక్షపూరితంగానే వైసిపి ప్రభుత్వమే ఈ పని చేయిస్తోందని గీతం యాజమాన్యం ఆరోపిస్తోంది. గతంలో కూడా గీతం యూనివర్సిటీ  ఆక్రమణలంటూ చేపట్టిన కూల్చివేతలు రాజకీయ దుమారం రేపాయి. సుమారు 45 ఎకరాలు మేర ప్రభుత్వ భూములు ఆక్రమణకు గురయ్యాయంటూ ఆర్డీవో ఆధ్వర్యంలో నిర్మాణాలను తొలగించారు. ఇప్పుడు గీతం మెడికల్ కాలేజీ ఆక్రమణలంటూ కూల్చివేతలు చేపట్టారు. నారా లోకేశ్ తోడల్లుడు, బాలకృష్ణ అల్లుడి శ్రీభరత్ పై కక్షతోనే ఈ కూల్చివేతలు చేపట్టారని టిడిపి నేతలు ఆరోపిస్తున్నారు.