ఎన్టీఆర్ జిల్లాలో క్షుద్రపూజల కలకలం... గుప్తనిధుల కోసం బలిచ్చేందుకేనా ఆ బాలుడు?

విజయవాడ : గుప్తనిధుల కోసం తవ్వకాలు జరుపుతూ ఎన్టీఆర్ జిల్లాలో రెడ్ హ్యాండెడ్ గా పట్టుబడిందో క్షుద్రపూజల ముఠా. తిరువూరు మండలం చౌటపల్లి-టేకులపల్లి గ్రామాల సరిహద్దుల్లో లంకెబిందెలు వున్నాయంటూ స్థానికంగా బాగా ప్రచారం జరుగుతుంది. దీంతో కొందరు క్షుద్రపూజలు చేసేవారి సాయంతో బుగ్గపాడు, తిరువూరు, ఏరుకోపాడు,టేకులపల్లికి చెందిని కొందరు ఈ గుప్తనిధులను దక్కించుకోవాలని చూసారు. ఈ క్రమంలోనే గత అర్ధరాత్రి ఓ బాలుడితో సహా ఎనిమిదిమంది సభ్యులతో కూడిన ముఠా గుప్తనిధుల కోసం తవ్వకాలు జరిపారు. అయితే గ్రామ శివారులో అలికిడిని గుర్తించిన స్థానికులు వెళ్లగా నలుగురు ముఠాసభ్యులు పారిపోగా మరో నలుగురు పట్టుబడ్డారు. పట్టుబడిన వారిలో బాలుడు కూడా వుండటంతో అతడిని నరబలి ఇవ్వడానికే తీసుకువచ్చినట్లు గ్రామస్తులు అనుమానిస్తున్నారు. ఈ గుప్తనిధుల ముఠాను చౌటపల్లి గ్రామస్తులు పోలీసులకు అప్పగించారు.