చిన్నారుల ప్రాణాలతో చెలగాటం... ఉయ్యూరు ఓ ప్రైవేట్ స్కూల్ నిర్వాకమిదీ..!

ఉయ్యూరు :తమ పిల్లల బంగారు భవిష్యత్ కోసం పీజులెంతున్నా భరించి ప్రైవేట్ స్కూల్లో వేస్తున్నారు తల్లిదండ్రులు. కానీ కొన్ని విద్యాసంస్థలు కాసులకు కక్కుర్తిపడి చిన్నారుల ప్రాణాలతో చెలగాటమాడుతున్నాయి. ఇలా ఓ స్కూల్ యాజమాన్యం అద్దాలు పగిలిన బస్సులోనే ప్రమాదకరంగా విద్యార్థులను తరలిస్తున్న ఘటన కృష్ణా జిల్లా ఉయ్యురులో వెలుగుచూసింది. పట్టణంలో పెద్ద విద్యాసంస్థగా పేరున్న విశ్వశాంతి స్కూల్ బస్సు వెనకవైపు అద్దం పగిలిపోయింది. కొత్త అద్దాలు వేయించకుండానే వెనకాల ఓ బ్యానర్ కట్టి విద్యార్థులను అందులోనే తరలిస్తోంది స్కూల్ యాజమాన్యం.కనీస భద్రతా ప్రమాణాలు పాటించకుండా ఇలా ప్రమాదకరంగా విద్యార్థులను తరలిస్తుండటంతో తల్లిదండ్రులు ఆందోళన వ్యక్తం చేస్తున్నారు. విద్యార్థుల ప్రాణాలతో చెలగాటం ఆడుతున్న విద్యాసంస్థపై చర్యలు తీసుకోవాలని ప్రజలు కోరుతున్నారు.