రంగురంగుల పూలదండలు, గజమాలతో ముస్తాబై ... పవన్ కోసం పరుగుపెట్టిన 'వారాహి'

విజయవాడ : గజమాలలు, రంగురంగుల పూలదండలతో ముస్తాబైన జనసైనికుడి ప్రచార రథం 'వారాహి' మంగళగిరి పార్టీ కార్యాలయం నుండి బయలుదేరింది. జనసేన పార్టీ పదో ఆవిర్భావ వేడుకల్లో భాగంగా కృష్ణా జిల్లా మచిలీపట్నంలో ఏర్పాటుచేసిన బహిరంగ సభకు ఇదే వాహనంలో పవన్ కల్యాణ్ వెళ్లనున్నారు. విజయవాడ ఆటోనగర్ ప్రాంతంలో పవన్ వారాహి వాహనాన్ని ఎక్కి తాడిగడప, పోరంకి, పెనమలూరు జంక్షన్లు, పామర్రు‌-గుడివాడ, గూడూరు సెంటర్ల మీదుగా పవన్ మచిలీపట్నం చేరుకోనున్నారు. దీంతో వారాహి వాహనంపై పవన్ ను చూసేందుకు అభిమానులు, పార్టీ నాయకులు, కార్యకర్తలు భారీగా తరలివచ్చే అవకాశాలున్నాయి.