ఏడాదిలో వాసాలమర్రి బంగారు వాసాలమర్రి కావాలని... ఈ దిశగా మనమంతా పట్టుదలతో పనిచేయాలని సీఎం కేసీఆర్ కోరారు.
యాదగిరిగుట్ట: ఏడాదిలో వాసాలమర్రి బంగారు వాసాలమర్రి కావాలని... ఈ దిశగా మనమంతా పట్టుదలతో పనిచేయాలని సీఎం కేసీఆర్ కోరారు. మంగళవారం నాడు వాసాలమర్రి గ్రామస్తులతో సీఎం కేసీఆర్ సహపంక్తి భోజనం చేశారు. అనంతరం గ్రామస్తుల సమస్యలను ఆయన తెలుసుకొన్నారు. ఈ సందర్భంగా ఆయన మాట్లాడారు. వాసాలమర్రికి తాను అండగా ఉంటానని ఆయన చెప్పారు. వాసాలమర్రికి మరో 20 సార్లు వస్తానన్నారు. వాసాలమర్రిలో అభివృద్ది పనులు జరగాల్సిన అవసరం ఉందన్నారు.
also read:వాసాలమర్రి గ్రామస్తులతో కేసీఆర్ భోజనం: గ్రామాభివృద్దిపై చర్చ
అంకాపూర్ లో గ్రామాభివృద్ది కమిటే సుప్రీంకోర్టు అని ఆయన చెప్పారు. కొన్ని సమయాల్లో గ్రామాభివృద్ది కమిటీ సర్పంచ్ లకు జరిమానాను విధించిందని చెప్పారు. మీరు పట్టుబడితే గ్రామం అభివృద్ది చెందుతుందన్నారు. ఈ మిషన్ లో పార్టీలు, కులాల గొడవలు ఉండవద్దని ఆయన చెప్పారు. గొర్లు, బర్లు, ట్రాక్టర్లు కొనివ్వడం గొప్పపని కాదన్నారు.సీఎం మీ చేతిలో ఉన్నాడని ఆయన గుర్తు చేశారు. 1500 మంది వారానికి 2 గంటలు ఊరి కోసం పనిచేస్తే గ్రామం మారదా అని ఆయన ప్రశ్నించారు. ఇవాళ్టి నుండి వాసాలమర్రి తన ఊరేనని సీఎం కేసీఆర్ తెలిపారు.
