రాంగోపాల్ పేట అగ్ని ప్రమాదం: ఇద్దరు ఫైర్ సిబ్బంది అస్వస్థత, భవనం కూల్చివేసే చాన్స్
సికింద్రాబాద్ రాంగోపాల్ పేట డెక్కన్ నైట్ వేర్ స్టోర్ భవనాన్ని ఇవాళో లేదో రేపో కూల్చివేయనున్నారు. ఈ భవనంలోని సెల్లార్ లో మంటలు చెలరేగాయి. మంటలనుఆర్పే ప్రయత్నం చేసిన ఇద్దరు ఫైర్ సిబ్బంది అస్వస్థతకు గురయ్యారు.
హైదరాబాద్: సికింద్రాబాద్ రాంగోపాల్ పేట డెక్కన్ నైట్ వేర్ స్టోర్ భవనాన్ని ఇవాళ లేదా రేపు కూల్చివేసే అవకాశం ఉంది. ఈ భవనంలో మంటలను నిన్న రాత్రి 8 గంటల సమయంలో అదుపులోకి తీసుకు వచ్చారు. అయితే ఇవాళ ఉదయం నుండి భవనం సెల్లార్ లో మంటలు మళ్లీ చెలరేగాయి. ఈ మంటలను ఆర్పే ప్రయత్నం చేస్తున్నారు. జేఎన్‌టీయూ ఇంజనీరింగ్ విభాగం అధికారులు ఇవాళ ఉదయం ఈ భవనాన్ని పరిశీలించనున్నారు. ఇంజనీరింగ్ నిపుణుల అభిప్రాయం మేరకు ఈ భవనాన్ని ఇవాళ లేదా రేపు కూల్చివేయనున్నారు. ఈ భవనంలోనికి ఎవరిని అనుమతించడం లేదు.
ఈ భవన యజమాని మహ్మద్, రహీంలపై పోలీసులు నిన్ననే కేసు నమోదుచేశారు. రెసిడెన్షియల్ విభాగాన్ని కమర్షియల్ గా ఉపయోగిస్తున్నట్టుగా అధికారులు గుర్తించారు. అంతేకాదు ఈ భవనం ఫైర్ నిబంధనలకు విరుద్దంగా ఉందని అధికారులు గుర్తించారు. భవనంలో మంటలకు అంటుకొనే గుణం ఉన్న సింథటిక్, టైర్లు వంటి ఉండడం కూడా మంటల తీవ్రత అధికంగా ఉండడానికి కారణంగా మారిందని అధికారులు అభిప్రాయపడుతున్నారు.
also read:రామ్‌గోపాల్ పేట అగ్నిప్రమాదం : 40 ఫైరింజన్లు, గంటల పాటు శ్రమ.. ఎట్టకేలకు అదుపులోకి మంటలు
ప్రమాదం జరిగిన భవనాన్ని తెలంగాణ మంత్రులు మహమూద్ అలీ, తలసాని శ్రీనివాస్ యాదవ్ లు పరిశీలించారు. సహాయక చర్యలను అడిగి తెలుసుకున్నారు. ఈ భవనంలో ఇంకా ముగురి ఆచూకీ తెలియడం లేదని భవన యజమాని తెలిపినట్టుగా పోలీసులు చెబుతున్నారు. అయితే ఈ భవనం లోపలికి వెళ్లి పరిశీలిస్తే కానీ అదృశ్యమైన వారి వివరాలు తెలియవని పోలీసులు చెబుతున్నారు. గంటల పాటు మంటల్లో ఉన్నందున ఈ భవనం పిల్లర్లు దెబ్బతిన్నాయి. దీంతో ఈ భవనం కుప్పకూలిపోయే అవకాశం ఉందని అధికారులు అనుమానిస్తున్నారు.దీంతో ఈ భవనాన్ని కూల్చివేయాలని అధికారులు నిర్ణయం తీసుకున్నారు.
ఇద్దరు ఫైర్ సిబ్బందికి అస్వస్థత
ఈ భవనంలోని సెల్లార్ లో మంటలు ఆర్పే ప్రయత్నం చేస్తున్న ఫైర్ సిబ్బందిలో ఇవాళ మరో ఇద్దరు తీవ్ర అస్వస్థతకు గురయ్యారు. ఏడీఎఫ్ ధనుంజయ్ రెడ్డి, ఫైర్ ఇంజన్ డ్రైవర్ లు అస్వస్థతకు గురయ్యారు. వీరిద్దరిని ఆసుపత్రికి తరలించారు. నిన్న ఈ భవనంలో మంటలను ఆర్పేందుకు ప్రయత్నించిన ఘటనలో ముగ్గురు అస్వస్థతకు గురైన విసయం తెలిసిందే.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
