కరోనా ఎఫెక్ట్: క్రెడిట్ కార్డులు చెల్లింపులు కష్టమయ్యాయా? చేయండిలా!!
కరోనా మహమ్మారితో జనాలంతా హైరానాకు గురవుతున్నారు! ఆదాయం ఆవిరైపోవడంతో వారి శోకాలు మిన్నంటుతున్నాయి. ఆర్థిక స్థోమత తగ్గడంతో అప్పులు చెల్లించలేని పరిస్థితి నెలకొంది.
న్యూఢిల్లీ: కరోనా మహమ్మారితో జనాలంతా హైరానాకు గురవుతున్నారు! ఆదాయం ఆవిరైపోవడంతో వారి శోకాలు మిన్నంటుతున్నాయి. ఆర్థిక స్థోమత తగ్గడంతో అప్పులు చెల్లించలేని పరిస్థితి నెలకొంది.
బ్యాంకులు ఆఫర్‌ చేస్తోన్న మారటోరియం తాత్కాలికంగా ఉప శమనం కలిగించినా ఆనక వడ్డీ భారంతో నడ్డీ విరగనుంది. ఈ నేపథ్యంలో క్రెడిట్ కార్డు వాడకం దారులు తమ చెల్లింపులకు అనుసరించాల్సిన ప్రత్యామ్నాయాల గురించి తెలుసుకుందాం..
క్రెడిట్ కార్డు ఉంటే అత్యవసరాల్లో ఆర్థిక భరోసా. తెలివిగా ఉపయోగించుకోగలిగితే ప్రయోజనం. దుర్వినియోగపరిస్తే చిక్కులు ఖాయం. కానీ, కరోనా.. ఊహించని పరిణామం. చాలామందికి కష్టకాలంలో ఉపయోగపడే క్రెడిట్ కార్డు బకాయి ఇప్పుడు పెద్ద కష్టంగా మారింది.
ఆచితూచి కార్డు వినియోగించే వారూ ఈ అసాధారణ పరిస్థితుల్లో రుణ బంధనాల్లో చిక్కుకోవాల్సి వచ్చింది. క్రెడిట్ కార్డు వాడకం దారులు కార్డు బకాయి చెల్లించకపోవడమంటే.. వడ్డీ, చక్రవడ్డీల గుదిబండను మోయడమే. ఇది వారి బడ్జెట్‌ను అస్తవ్యస్తం చేయడమే కాదు.. బకాయి తీరే వరకు భవిష్యత్‌ ఆదాయాన్నీ మింగేస్తుంది.
క్రెడిట్ కార్డ్ బ్యాలెన్స్‌ ట్రాన్స్‌ఫర్‌ ద్వారా చెల్లించాల్సిన బకాయిని తక్కువ వడ్డీతో కూడిన ఈఎంఐ పేమెంట్‌ ఆప్షన్‌కు మారవచ్చు. ఒకటికి మించి క్రెడిట్ కార్డులు ఉన్న వారికిది మంచి ప్రత్యామ్నాయం. అన్ని కార్డుల బకాయిలను ఒకే కార్డుపైకి బదిలీ చేసుకోవడం మేలు.
తద్వారా అదనపు వడ్డీ భారం లేకుండానే చెల్లింపులకు మరింత సమయం లభిస్తుంది. పలు బకాయిలు చెల్లించాల్సిన పరిస్థితుల్లో చిన్న మొత్తాలతో మొదలు పెట్టి క్రమంగా ఒక్కొక్కటీ తీర్చుకుంటూ వెళ్లడమే స్నోబాల్‌ మెథడ్‌.
ఒక్కొక్క కార్డు బ్యాలెన్స్‌ను తీర్చుకుంటూ వెళ్లడంతో మీ క్రెడిట్ రేటింగ్‌ స్కోర్‌తోపాటు మొత్తంగా వినియోగించుకునే క్రెడిట్ లిమిట్‌ కూడా మెరుగు పడుతోంది.
also read:లాక్‌డౌన్ ఎఫెక్ట్ ‘రాయల్ ఎన్‌ఫీల్డ్’ పొదుపు: 12 రీజనల్ ఆఫీసుల మూత
ఫిక్స్‌డ్‌ డిపాజిట్లు తదితర పెట్టుబడులను వెనక్కి తీసుకొని కార్డు బకాయిలు పరిష్కరించుకోవడం మరో ప్రత్యామ్నాయం. తద్వారా అధిక వడ్డీల భారం తప్పుతుంది. అయితే, అత్యవసర పరిస్థితుల్లో పనికొచ్చే పొదుపు సొమ్మును మరే గత్యంతరం లేకపోతే తప్ప బయటికి తీయవద్దని ఆర్థిక సలహాదారులు సూచిస్తున్నారు.
వ్యక్తిగత రుణం తీసుకొని కార్డు బకాయిలు చెల్లించడం మరో ప్రత్యామ్నాయం. చెల్లించాల్సిన బకాయి అధిక స్థాయిలో ఉన్న వారికిది మెరుగైన ఆప్షన్‌.
ఎందుకంటే, క్రెడిట్ కార్డు బకాయిపై విధించే వార్షిక వడ్డీ 36-40 శాతం స్థాయిలో ఉంటుంది. వ్యక్తిగత రుణమైతే 11-24 శాతం వడ్డీకే లభిస్తుంది. తద్వారా వడ్డీ భారాన్నితగ్గించుకునే అవకాశం ఉంటుంది.
ఇప్పటికే తీసుకున్న గృహ రుణాన్ని క్రమం తప్పకుండా చెల్లిస్తున్నవారికీ బ్యాంకులు టాప్‌అప్‌ లోన్స్‌ను ఆఫర్‌ చేస్తుంటాయి. ఈ రుణాలు తీసుకోవడమూ సులువే.
టాప్‌అప్‌ లోన్‌ సొమ్ముతో కార్డు బకాయిలను పరిష్కరించుకోగలిగితే వడ్డీ భారం గణనీయంగా తగ్గించుకోవచ్చు. అయితే, హోమ్‌లోన్‌పై తీసుకునే టాప్‌లోన్‌పై వ్యక్తిగత ఆదాయ పన్ను రాయితీ మాత్రం లభించదు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
