క్రీడారంగంపై నిర్మలమ్మ కరుణ.. పెరిగిన స్పోర్ట్స్ బడ్జెట్
Union Budget 2023: కేంద్ర ఆర్థిక మంత్రి నిర్మలా సీతారామన్ నేడు లోక్‌సభలో బడ్జెట్ ప్రవేశపెట్టారు. క్రీడారంగానికి గతేడాదితో పోల్చితే కేటాయింపులను పెంచారు. ఈ ఏడాది ఆసియా క్రీడలు ఉండటంతో కేటాయింపులు భారీగా పెరిగాయి.
 )
Followదేశ క్రీడారంగానికి నిర్మలమ్మ తన బడ్జెట్ లో శుభవార్త అందించారు. నేడు లోక్‌సభలో ఆమె ప్రవేశపెట్టిన కేంద్ర బడ్జెట్ -2023 లో భాగంగా క్రీడా రంగానికి కేటాయింపులను భారీగా పెంచారు. 2023-2024 ఆర్థిక సంవత్సరానికి గాను క్రీడా బడ్జెట్ ను రూ. 3,397.32 కోట్లుగా ప్రకటించారు. గతేడాదితో పోల్చితే ఈ ఆర్థిక సంవత్సరానికి రూ. 334.72 కోట్ల కేటాయింపులు పెరిగాయి. ఈ ఏడాది ఆసియా గేమ్స్ తో పాటు వచ్చే ఏడాది పారిస్ ఒలింపిక్స్ ఉన్న నేపథ్యంలో ఈ కేటాయింపులు క్రీడాకారులకు మేలుచేసేవే. కాగా, ఇప్పటివరకు క్రీడారంగానికి ఇంత బడ్జెట్ కేటాయించడం ఇదే ప్రథమం కావడం గమనార్హం.
2022-23 బడ్జెట్ లో క్రీడారంగానికి రూ. 3,062.60 కోట్లు కేటాయింపులు చేశారు. అయితే ఈ ఏడాది ఆసియా గేమ్స్ తో పాటు వచ్చే ఏడాది పారిస్ వేదికగా జరుగబోయే ఒలింపిక్స్ కు సన్నద్ధమవుతున్న క్రీడాకారులకు సౌకర్యాలు మరింత మెరుగుపరిచేందుకు బడ్జెట్ లో కేటాయింపులు పెరిగాయి.
బడ్జెట్ లో ఎవరెవరికి ఎంతెంత..?
- ఖేలో ఇండియా కు : రూ. 1,045 కోట్లు
- స్పోర్ట్స్ అథారిటీ ఆఫ్ ఇండియా (సాయ్) : రూ. 785.52 కోట్లు
- నేషనల్ స్పోర్ట్స్ ఫెడరేషన్ : రూ. 325 కోట్లు
- నేషనల్ సర్వీస్ స్కీమ్ : రూ. 325 కోట్లు
- నేషనల్ స్పోర్ట్స్ డెవలప్మెంట్ ఫండ్ : రూ. 15 కోట్లు
దేశంలో క్రీడాభివృద్ధిలో భాగంగా క్రీడాకారులకు జాతీయ క్యాంపుల నిర్వహణ, శిక్షణ, అధునాతన క్రీడా సామాగ్రి కొనుగోలు, మౌలిక వసతుల కల్పన వంటి సదుపాయాల కోసం ఈ మొత్తాన్ని ఖర్చు చేయనున్నారు. పారిస్ ఒలింపిక్స్ లో పతకాలు పెంచుకోవాలని చూస్తున్న భారత్.. ఆ దిశగా క్రీడాకారులకు శిక్షణ ఇప్పిస్తున్నది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
