వామ్మో.. పడగ విప్పిన పాము నుంచి కొడుకును కాపాడుకున్న తల్లి.. భయానక వీడియో ఇదే
కర్ణాటకలో ఓ తల్లి తన కొడుకును కాపాడుకున్న విధం చూసి నెటిజన్లు ఫిదా అయ్యారు. మెట్ల పై నుంచి తల్లి కొడుకులు కిందికి దిగుతున్న సమయంలో కింది వైపు నుంచి పాము జారుకుంటున్నది. ఆ పిల్లాడు ఓ అడుగు ముందుగా కింద వేశాడు. అంతే.. ఆ అడుగు నుంచి తప్పించుకున్న పాము అంత ఎత్తుకు లేచి పడగ విప్పింది. తల్లి వెంటనే అప్రమత్తమై కొడుకును కాపాడుకుంది.
బెంగళూరు: తల్లి ప్రేమను కొలువలేం. దేనితోనూ పోల్చలేం. అందుకే ఆమె ప్రేమ అనుపమానం. కన్న బిడ్డ కోసం తన ప్రాణాలైన అడ్డేసి నిలుస్తుంది. ఇదే విషయం మరోసారి రూఢీ అయింది. కర్ణాటకలో ఓ తల్లి తన కొడుకును పడగ విప్పిన పాము నుంచి కాపాడుకుంది. తన ప్రాణాలను సైతం రిస్క్లో పెట్టి కొడుకును కాపాడిన వైనం ఓ సీసీటీవీ కెమెరాకు చిక్కింది. ఈ వీడియో సోషల్ మీడియాలో వైరల్ అవుతున్నది. నెటిజన్లు అంతా ఆ తల్లి సాహస కార్యానికి ఫిదా అవుతున్నారు. లవ్ ఎమోజీలతో ముంచెత్తుతున్నారు.
కర్ణాటకలోని మాండ్యాలో తల్లి, కొడుకు ఇంటి బయటకు వస్తున్నారు. వారు దాదాపు మెట్ల వరకు వచ్చారు. ఆ మెట్ల కింది నుంచి నిశ్శబ్దంగా ఓ పాము జారుకుంటున్న విషయం వారికి తెలియదు. మెట్ల దాకా వచ్చిన తర్వాత కొడుకు తల్లి కంటే ఓ అడుగు ముందుకు నడిచాడు. మెట్లు దిగుతూ కింద అడుగు వేశాడు. ఆ అడుగు సరిగ్గా పాము పైన పడుతుండగా... ఆ భారీ నాగు పాము వెంటే అప్రమత్తమై తలతోపాటుగా దాదాపు సగం మేరకు వెనక్కి కదిలింది. ఈ చర్య చాలా వేగంగా జరిగింది. వెనక్కి తీసుకుంటూనే పాము దాదాపు మోకాలి ఎత్తు వరకు పడగ విప్పి నిలబడింది. ఆ వీడియో చూస్తున్నవారికే పై ప్రాణాలు పైకే పోయేంత పని అవుతున్నది.
అలా పడగ విప్పి అంత ఎత్తు లేచిన పాము ముందు కొడుకు ఉన్నాడు. మెట్ల పై ఉన్న తల్లికి ఆ పాము పడగ కనిపించింది. అంతే.. మరో ఆలోచనే లేకుండా ఆమె వెంటనే మెట్లు దిగి కొడుకును రక్షించుకుంది. ఆ తల్లి తన బిడ్డను దగ్గరకు తీసుకోగానే.. ఆగ్రహంగా పడగ విప్పి పైనకు లేచిన పాము మళ్లీ తన దారిలో తాను వెళ్లిపోయింది.
ఈ వీడియో సోషల్ మీడియాలో వైరల్ అవుతున్నది. ఈ షాకింగ్ ఇన్సిడెంట్ పై చాలా మంది కామెంట్లు చేశారు. ఆ తల్లి చేసిన కార్యానికి ఫిదా అవుతున్నారు.