భోపాల్: మధ్యప్రదేశ్ మాజీ మంత్రి, కాంగ్రెసు ఎమ్మెల్యే ఉమాంగ్ సంఘార్ కు చెందిన భవనంలో 38 మహిళ ఆదివారంనాడు ఆత్మహత్య చేసుకుంది. మధ్యప్రదేశ్ రాజధాని భోపాల్ లో ఈ సంఘటన జరిగింది. సంఘటనా స్థలంలో మహిళ రాసిన సూసైడ్ నోట్ తమకు లభించినట్లు పోలీసులు తెలిపారు. 

సింఘార్ ను ఉద్దేశించి ఆమె ఆ లేఖ రాసింది. తన జీవితంలో ఓ స్థానం కోసం తాను తపించానని, అది తనకు లభ్యం కాలేదని ఆమె ఆ నోట్ లో రాసింది. ఇక ఏ మాత్రం జీవనాన్ని సాగించలేక ఆత్మహత్య చేసుకుంటున్నట్లు కూడా అందులో రాసింది. 

గంధ్వాని నియోజకవర్గం నుంచి శానసభకు ప్రాతినిధ్యం వహిస్తున్న సింఘార్ ఆ మహిళ మంచి స్నేహితురాలని, మానసిక స్థితి బాగాలేక ఆమె చికిత్స తీసుకుంటున్న విషయం తనకు తెలియదని అన్నారు. 

అంబాలకు చెందిన ఆ మహిళ ఏడాది కాలంగా సింఘార్ నివాసానికి వస్తూ ఉందని పోలీసులు చెప్పారు. ఆ భవనంలో ఆమె 25, 30 రోజులుగా ఉంటోందని అన్నారు. గత రెండు రోజులుగా సింఘార్ భోపాల్ లో లేరు. 

బంగళాలో ఓ పని మనిషి, అతని భార్య ఉంటున్నారని, ఆదివారం ఉదయం పని మనిషి భార్య తలుపు తట్టిందని, అయితే లోపలి నుంచి ఏ విధమైన స్పందన కూడా రాలేదని, దాంతో పని మనిషి గణేష్ ఆ విషయం సింఘార్ కు చె్పపాడని, దాంతో ఆయన తన బంధువును అక్కడికి పంపించారని, సీలింగ్ కు వేలాడుతూ మహిళ మృతదేహం కనిపించిందని అదనపు ఎస్పీ రాజేశ్ సింగ్ చెప్పారు.