Vice Presidential election 2022: ఉపరాష్ట్రపతి ఎన్నికల ఓటింగ్కు దూరంగా ఉండాలన్న TMC నిర్ణయం నిరాశపరిచిందనీ, అహం లేదా కోపానికి సమయం కాదని ఉపరాష్ట్రపతి ఎన్నికల ప్రతిపక్ష అభ్యర్థి మార్గరెట్ అల్వా అన్నారు.
Vice Presidential election 2022: ఉపరాష్ట్రపతి ఎన్నికలలో తృణమూల్ కాంగ్రెస్ (TMC) పాల్గొనడంలేదని టిఎంసి అధినేత్రి మమతా బెనర్జీ ప్రకటించిన విషయం తెలిసిందే. ఈ ప్రకటనపై ప్రతిపక్ష అభ్యర్థి మార్గరెట్ అల్వా స్పందించారు. TMC తీసుకున్న నిర్ణయంపై మార్గరెట్ అల్వా ఆశ్చర్యం వ్యక్తం చేశారు. ఉపరాష్ట్రపతి ఎన్నికల్లో పాల్గొనకూడదని దీదీ నిర్ణయం నిరాశపరిచిందని అన్నారు. పరస్పర విద్వేషాలు, అహంకారాలను పక్కనబెట్టి ఏకం కావాల్సిన సమయం ఇదేనని అన్నారు. ఈసారి ప్రతిపక్షం ధైర్యం, నాయకత్వం, ఐక్యతతో కలిసి నిలబడాలని భావిస్తున్నానని అన్నారు.
అందుకే విపక్షాల నిర్ణయంపై మమత మండిపాటు
నిజానికి మమతా బెనర్జీ సలహా లేకుండానే విపక్షాలు అల్వాను ఉపరాష్ట్రపతి అభ్యర్థిగా ప్రకటించాయని టీఎంసీ చెబుతోంది. ఆమె అభ్యర్థిత్వంపై టీఎంసీ నేతలెవరూ సంప్రదించలేదు. తనతో మాట్లాడకుండా ఉపరాష్ట్రపతి అభ్యర్థిని ఎందుకు ప్రకటించారని టిఎంసి అధినేత్రి మమతా బెనర్జీ ఆగ్రహం వ్యక్తం చేశారు. దీనిపై అసంతృప్తి వ్యక్తం చేసిన టీఎంసీ ఉపరాష్ట్రపతి ఎన్నికలకు దూరం కావాలని నిర్ణయించింది.
శరద్ పవార్ ప్రకటక
ఉపరాష్ట్రపతి ఎన్నికలకు ప్రతిపక్షాల అభ్యర్థిగా మార్గరెట్ అల్వా ఎంపిక చేసినట్టు ఎన్సీపీ అధినేత శరద్ పవార్ ప్రకటించారు. మార్గరెట్ అల్వా గోవా, రాజస్థాన్, ఉత్తరాఖండ్, గుజరాత్లకు గవర్నర్గా సేవలందించారు. అడ్మినిస్ట్రేటివ్ పనిలో ఆమెకు అపారమైన అనుభవం ఉంది. మరోవైపు బీజేపీ నేతృత్వంలోని ఎన్డీయే పశ్చిమ బెంగాల్ గవర్నర్ జగదీప్ ధన్కర్ను ఉపరాష్ట్రపతి అభ్యర్థిగా ప్రతిపాదించింది.
ఎన్నికల్లో పాల్గొనం: అభిషేక్ బెనర్జీ
ఈ తరుణంలో ఎన్డీయే అభ్యర్థికి ముఖ్యంగా జగదీప్ ధన్ఖర్కు మద్దతిచ్చే ప్రశ్నే లేదని తృణమూల్ కాంగ్రెస్ జాతీయ ప్రధాన కార్యదర్శి అభిషేక్ బెనర్జీ స్పష్టం చేశారు. శుక్రవారం జరిగిన పార్టీ సమావేశంలో టీఎంసీ శాసనసభ్యులు ఉపరాష్ట్రపతి ఎన్నికల్లో పాల్గొనకూడదని ఏకగ్రీవంగా నిర్ణయించుకున్నారని, ఉభయ సభల్లో 35 మంది ఎంపీలున్న టీఎంసీతో సరైన సంప్రదింపులు, చర్చలు లేకుండానే ఆప్ అభ్యర్థిని ఎంపిక చేశారని బెనర్జీ ఆరోపించారు.
ప్రతి పార్టీని సంప్రదించాం- కాంగ్రెస్
ఈ నేపథ్యంలో ప్రతిపక్షాలు ఐక్యంగా పనిచేయాల్సిన అవసరం ఉందని కాంగ్రెస్ నేత మల్లికార్జున్ ఖర్గే ఉద్ఘాటించారు. నేషనలిస్ట్ కాంగ్రెస్ పార్టీ (ఎన్సిపి) అధ్యక్షుడు శరద్ పవార్ టిఎంసితో చర్చలు జరుపుతామని హామీ ఇచ్చారని ఆయన తెలియజేశారు. ఇంతలో, కాంగ్రెస్ నాయకుడు కెసి వేణుగోపాల్, టిఎంసి అభియోగాన్ని తోసిపుచ్చారు. కాంగ్రెస్ పార్టీ ప్రతిపక్షాల అభ్యర్థిని ప్రకటించే ముందు అన్ని ప్రతిపక్ష పార్టీలతో సంప్రదించిందని అన్నారు. ప్రస్తుత దేశ ఉపరాష్ట్రపతి వెంకయ్య నాయుడు పదవీకాలం ఆగస్టు 19తో ముగియనుంది. ఉపరాష్ట్రపతి పదవికి ఆగస్టు 6న ఓటింగ్ నిర్వహించి, అదే రోజు ఎన్నికల ఫలితాలు కూడా వెలువడనున్నాయి.
