Asianet News TeluguAsianet News Telugu

ఆర్టీఐని కూడా ప్రధాని మోడీ కూటమిలో చేర్చుకున్నారు - కచ్చతీవు వివాదంపై స్టాలిన్

డీఎంకే అధినేత, తమిళనాడు సీఎం ఎంకే స్టాలిన్ ప్రధాని నరేంద్ర మోడీపై విమర్శలు చేశారు. ఈడీ, ఐటీ తరువాత ఆర్టీఐని కూడా ఆయన కూటమిలో చేర్చుకున్నారని ఆరోపించారు. తాము మతానికి వ్యతిరేకం కాదని, మతతత్వానికి మాత్రమే శత్రువులం అని చెప్పారు.

RTI was also included in PM Modi's alliance- Stalin on Katchatheevu controversy..ISR
Author
First Published Apr 4, 2024, 9:39 AM IST

ఈడీ, ఐటీ తరువాత ఆర్టీఐ (సమాచార హక్కు చట్టం)ను కూడా ప్రధాని నరేంద్ర మోడీ తన కూటమిలో చేర్చుకున్నారని డీఎంకే అధినేత, తమిళనాడు సీఎం ఎంకే స్టాలిన్ అన్నారు. తమిళనాడు ప్రయోజనాలను డీఎంకే పరిరక్షించడం లేదని, కచ్చతీవు ద్వీపాన్ని శ్రీలంకకు కాంగ్రెస్ నిర్దాక్షిణ్యంగా అప్పగించిందని ప్రధాని మోడీ ఆరోపించిన కొద్ది రోజులకే ఆయన ఈ వ్యాఖ్యలు చేశారు.

‘‘ఎన్ఫోర్స్మెంట్ డైరెక్టరేట్ (ఈడీ), ఆదాయపు పన్ను (ఐటీ) తర్వాత ఆర్టీఐని కూడా తన కూటమిలో చేర్చుకున్నారు. తాను ఏదైనా చెబితే ప్రజలు నమ్మరని ప్రధాని మోడీకి తెలుసు కాబట్టి ఆర్టీఐని జిమ్మిక్కులకు వాడుకుంటున్నారు. ఉత్తరప్రదేశ్ లోని కచ్చతీవు గురించి ప్రధాని ఎందుకు మాట్లాడాల్సి వచ్చింది’’ అని స్టాలిన్ ప్రశ్నించారు.

సామాజిక న్యాయం, సమానత్వం సాధించాలంటే రానున్న లోక్ సభ ఎన్నికల్లో బీజేపీని ఓడించాలని స్టాలిన్ అన్నారు. దక్షిణాది, ఉత్తరాది రాష్ట్రాల ప్రజలు తమను అధికారం నుంచి తొలగిస్తారని బీజేపీకి కూడా తెలుసునని ఆయన అన్నారు. ఎన్ ఫోర్స్ మెంట్ డైరెక్టరేట్ చర్యల గురించి ప్రధాని మోడీకి తెలియదని స్టాలిన్ విమర్శించారు.

‘‘జార్ఖండ్ మాజీ ముఖ్యమంత్రి హేమంత్ సోరెన్, ఢిల్లీ ముఖ్యమంత్రి అరవింద్ కేజ్రీవాల్ అరెస్టు విషయం మీకు తెలియదా? కాంగ్రెస్ పార్టీ ఖాతాలను స్తంభింపజేసిన తర్వాత ఆదాయపు పన్ను శాఖ సుప్రీంకోర్టులో యూటర్న్ తీసుకుంది. ఐటీ, ఈడీ, సీబీఐ ఏం చేస్తున్నాయో మీకు తెలియదా’’ అని స్టాలిన్ ప్రశ్నించారు.

ద్రావిడం అనే పదం నచ్చని వారు తనను మతానికి శత్రువుగా చిత్రీకరించే ప్రయత్నం చేస్తున్నారని స్టాలిన్ ఆరోపించారు. ప్రజలను విడదీసే మతతత్వానికి తాము శత్రువులమే తప్ప మతానికి వ్యతిరేకం కాదని అన్నారు. ‘‘కలైంజ్ఞర్ (ఎం కరుణానిధి) శైలిలో చెప్పాలంటే, ఆలయం ఉండకూడదని మేము చెప్పలేము. కానీ ఆలయం క్రూరుల శిబిరంగా మారకూడదని మేము వాదిస్తున్నాము. మొత్తమ్మీద మతాన్ని ఉపయోగించి ప్రజలను విడగొట్టే వారికి మేము శత్రువులం’’ అని స్టాలిన్ అన్నారు.

కాగా.. 1974లో వ్యూహాత్మక ద్వీపాన్ని శ్రీలంకకు అప్పగిస్తూ అప్పటి ప్రధాని ఇందిరాగాంధీ ప్రభుత్వం తీసుకున్న నిర్ణయాన్ని ఆర్టీఐ నివేదిక వెల్లడించింది. ఈ నేపథ్యంలో కచ్చతీవు ద్వీపం వివాదాన్ని ఉపయోగించుకొని ప్రధాని మోడీ గత ఆదివారం కాంగ్రెస్ పై విమర్శలు గుప్పించిన సంగతి తెలిసిందే. ఈ క్రమంలో ప్రధానిపై స్టాలిన్ ఇలా పదునైన వ్యాఖ్యలు చేశారు.

Latest Videos
Follow Us:
Download App:
  • android
  • ios