యువతిని ర్యాపిడో బైక్ ఎక్కించుకుని దారి మధ్యలో డ్రైవర్ హస్తప్రయోగం.. యువతి ఏం చేసిందంటే?

సారాంశం

rapido

బెంగళూరు: మహిళలు ఇంటి బయట అడుగుపెడితే ఏదో రూపంలో వేధింపులకు గురవుతున్నారు. చాలా చోట్ల ఇది కనిపిస్తున్నది. ఎంతో జాగ్రత్తగా వ్యవహరిస్తున్నా కొందరు సైకోల కారణంగా కొన్ని సార్లు ఈ వేధింపులను ఎదుర్కోవాల్సి వస్తున్నది. తాజాగా, బెంగళూరులో ఓ యువతిని బైక్ ఎక్కించుకున్న ర్యాపిడో డ్రైవర్ అసభ్యంగా ప్రవర్తించాడు. వెనుక యువతిని బైక్ పై తీసుకెళ్లుతుండగా.. ఒక చేతితో డ్రైవ్ చేశాడు. మరో చేతితో హస్తప్రయోగం చేశాడు. దీంతో ఆ యువతి కంపించిపోయింది. కానీ, చివరకు ఆ యువకుడిని పోలీసులు అరెస్టు చేశారు. ఆ యువతి ఏం చేసిందంటే?

ఎలక్ట్రానిక్ సిటీలో ఉంటున్న అథిర టౌన్ హాల్‌లో మణిపూర్ బాధితులకు సంఘీభావం తెలిపే కార్యక్రమానికి హాజరైంది. శుక్రవారం నాడు.. ఆ సంఘీభావ కార్యక్రమం తర్వాత తిరిగి ఇంటికి వెళ్లడానికి ర్యాపిడో ఆటోలను బుక్ చేసే ప్రయత్నం చేసింది. కానీ, చాలా సార్లు ర్యాపిడో ఆటోలు క్యాన్సిల్ కావడంతో చివరకు ర్యాపిడో బైక్‌ను బుక్ చేసింది. ఓ సన్నపాటి యువకుడు ర్యాపిడోతో రిజిస్టర్ అయినబైక్ కాకుండా మరో బైక్ పై అక్కడికి వచ్చాడు. ఆమె అనుమానంతో బైక్ ఇది కాదని ఆరా తీయగా.. తన బైక్ సర్వీసింగ్ కోసం రిపేర్‌కు ఇచ్చానని, ఇప్పుడు తాత్కాలికంగా ఈ బైక్ ఉపయోగిస్తున్నట్టు వివరించాడు. అయినా.. నమ్మని అథిర ర్యాపిడో యాప్‌లో ఆ రైడ్ చూసి కన్ఫామ్ చేసుకుంది.

ఆ బైక్ ఎక్కింది. ఇంటికి రైడ్ ప్రారంభమైంది. కానీ, దారి మధ్యలో పెద్దగా వాహనాల రద్దీలేని చోటుకు వెళ్లగానే ఆ డ్రైవర్ అసభ్యంగా ప్రవర్తించడం మొదలు పెట్టాడు. బైక్‌ను సింగిల్ హ్యాండ్‌తో డ్రైవ్ చేయడం ప్రారంభించాడు. మరో చేతితో మాస్టర్‌బేట్ చేసుకున్నాడు. ఇది గమనించిన అథిర ఏమీ తెలియనట్టు మిన్నకుండిపోయింది. ఆ కఠిన సమయాన్ని ఆందోళనగా గడిపింది. తన ఇంటి అడ్రెస్ తెలియకుండా 200 మీటర్ల దూరంలోనే బైక్‌ను ఆపాలని కోరింది. ఆన్‌లైన్ పేమెంట్ చేసి దిగి వెళ్లిపోయింది. కానీ, డ్రైవర్ ఆ తర్వాత కూడా హరాస్‌మెంట్ చేయడం ప్రారంభించాడు.

తరుచూ కాల్ చేస్తూ.. వాట్సాప్‌లో మెస్సేజీలు పెడుతూ వేధించాడు. ఫోన్‌ నెంబర్ బ్లాక్ చేస్తే వేరే నెంబర్ల నుంచి ఫోన్ చేయడం ప్రారంభించాడు. దీంతో ఆమె ట్విట్టర్‌లో తాను ఎదుర్కొన్న అవాంఛనీయ ఘటనను వివరించింది. ఆ మెస్సేజీల స్క్రీన్ షాట్ కూడా అప్‌లోడ్ చేసింది. పోలీసులు రియాక్ట్ అయ్యారు. వెంటనే ఆ మూర్ఖుడిని అరెస్టు చేశారు.

తాజాగా, ఈ రోజు మరోసారి అథిర ట్విట్టర్‌ వేదికపై స్పందిస్తూ.. తాను ఈ సిటీ పోలీసులకు ఫిర్యాదు చేశానని, పోలీసులు దుండగుడిని అరెస్టు చేసినట్టు వివరించింది. వేగంగా స్పందించినందుకు పోలీసులకు, అండగా నిలిచిన ఇతరులకు ధన్యవాదాలు తెలిపింది.