చంద్రయాన్-3ని విజయవంతం చేసిన భారత అంతరిక్ష పరిశోధన సంస్థ (ఇస్రో) శాస్త్రవేత్తలను ప్రధాని నరేంద్ర మోదీ అభినందించారు.
చంద్రయాన్-3ని విజయవంతం చేసిన భారత అంతరిక్ష పరిశోధన సంస్థ (ఇస్రో) శాస్త్రవేత్తలను ప్రధాని నరేంద్ర మోదీ అభినందించారు. దక్షిణాఫ్రికా, గ్రీస్ దేశాల పర్యటన నుంచి వచ్చిన మోదీ నేరుగా బెంగళూరు చేరుకున్నారు. ఎయిర్పోర్టు వద్దకు చేరుకున్న అభిమానులకు అభివాదం చేసిన ప్రధాని మోదీ.. అక్కడి నుంచి ఇస్రో కార్యాలయానికి వెళ్లారు. అక్కడ శాస్త్రవేత్తలను మోదీ అభినందించారు. ఈ సందర్భంగా ఇస్రో చీఫ్ ఎస్ సోమనాథ్.. చంద్రయాన్-3 ప్రయోగానికి సంబంధించిన వివరాలను ప్రధాని మోదీకి వివరించారు.
అనంతరం బెంగళూరులోని ఇస్రో టెలిమెట్రీ ట్రాకింగ్ అండ్ కమాండ్ నెట్వర్క్ మిషన్ కంట్రోల్ కాంప్లెక్స్లో మోదీ మాట్లాడుతూ.. ‘‘మన జాతీయ గర్వం చంద్రునిపై ఉంది’’ అని మోదీ అన్నారు. జై విజ్ఞాన్.. జై అనుసంధాన్ అనే నినాదం ఇచ్చారు. ‘‘ఈరోజు నేను విభిన్న స్థాయి ఆనందాన్ని అనుభవిస్తున్నాను. అలాంటి సందర్భాలు చాలా అరుదు. ఈసారి నేను చాలా అశాంతిగా ఉన్నాను. నేను దక్షిణాఫ్రికాలో ఉన్నాను.. కానీ నా మనస్సు మీతో ఉంది’’ అని అన్నారు.
బెంగళూరులో ఇస్రో శాస్త్రవేత్తలను ఉద్దేశించి ప్రసంగిస్తూ ఉద్వేగానికి లోనైన ప్రధాని మోదీ.. “నేను వీలైనంత త్వరగా మిమ్మల్ని కలుసుకుని, మీకు నమస్కరించాలని, మీ ప్రయత్నాలకు సెల్యూట్ చేయాలని కోరుకున్నాను’’ అని పేర్కొన్నారు. చంద్రుని ఉపరితలంపై చంద్రయాన్-3 ల్యాండర్ దిగిన ప్రదేశాన్ని ‘శివశక్తి’గా పిలుస్తామని ప్రధాని మోదీ ప్రకటించారు.
‘‘భారతదేశం చంద్రునిపై ఉంది. మన జాతీయ గర్వాన్ని చంద్రునిపై ఉంచాము. ఇది సాధారణ విజయం కాదు. ఇది అనంత విశ్వంలో భారతదేశం శాస్త్రీయ విజయానికి గర్జించే ప్రకటన’’ అని మోదీ పేర్కొన్నారు. ‘‘ఇది వినూత్నంగా, ప్రత్యేకంగా ఆలోచించే భారతదేశం. ఇది చీకటి మండలాలకు వెళ్లి కాంతిని వ్యాప్తి చేయడం ద్వారా ప్రపంచాన్ని ప్రకాశవంతం చేసే భారతదేశం’’ అని ప్రధాని మోదీ అన్నారు.
2019లో చంద్రుడి ఉపరితలంపై చంద్రయాన్-2 తన పాదముద్ర వేసిన ప్రదేశాన్ని ‘‘తిరంగా పాయింట్’’గా పిలుస్తామని ప్రధాని మోదీ చెప్పారు.‘‘మీరు మొత్తం తరాన్ని మేల్కొలిపారు.. వారిపై లోతైన ముద్ర వేశారు’’ అని చంద్రయాన్-3 మిషన్ విజయంపై ఇస్రో శాస్త్రవేత్తలకు ప్రధాని మోదీ చెప్పారు
చంద్రయాన్-3 మిషన్లో భాగంగా విక్రమ్ ల్యాండర్ విజయవంతంగా టచ్డౌన్ చేసినందుకు గుర్తుగా భారతదేశం ఆగస్టు 23ని ‘జాతీయ అంతరిక్ష దినోత్సవం’గా జరుపుకుంటుందని ప్రధాని మోదీ చెప్పారు. చంద్రునిపై మేక్ ఇన్ ఇండియాను తీసుకెళ్లారని బెంగళూరులో ఇస్రో శాస్త్రవేత్తలను ఉద్దేశించి ప్రధాని మోదీ అన్నారు. ‘‘మన శాస్త్రవేత్తలు ల్యాండర్ సాఫ్ట్ ల్యాండింగ్ను పరీక్షించడానికి ఇస్రో పరిశోధనా కేంద్రం వద్ద కృత్రిమ చంద్రుడిని నిర్మించారు. ల్యాండర్ అక్కడికి (చంద్రునిపైకి) వెళ్లే ముందు అనేక పరీక్షల్లో ఉత్తీర్ణత సాధించడంతో అది విజయం సాధించడం ఖాయంగా మారింది’’ అని మోదీ చెప్పారు.
చంద్రయాన్ 3లో మహిళా శాస్త్రవేత్తలు కీలక పాత్ర పోషించారని ప్రధాని మోదీ ప్రశంసించారు. ‘‘చంద్రయాన్ 3లో మహిళా శాస్త్రవేత్తలు కీలక పాత్ర పోషించారు. ఈ 'శివశక్తి' పాయింట్ రాబోయే తరాలను ప్రజల సంక్షేమం కోసం సైన్స్ని ఉపయోగించుకునేలా ప్రేరేపిస్తుంది. ప్రజల సంక్షేమమే మా అత్యున్నత నిబద్ధత. భారతదేశం విజ్ఞానం బానిసత్వ యుగంలో పాతిపెట్టబడింది. 'ఆజాదీ కా అమృత్ కాల్'లో.. మనం ఈ ఛాతీని తవ్వాలి’’ అని మోదీ పేర్కొన్నారు. ఇక, బెంగళూరులోని టెలిమెట్రీ ట్రాకింగ్ అండ్ కమాండ్ నెట్వర్క్ మిషన్ కంట్రోల్ కాంప్లెక్స్లో చంద్రయాన్-3 మిషన్లో పాల్గొన్న ఇస్రో బృందంలోని మహిళా శాస్త్రవేత్తలతో ప్రధాని నరేంద్ర మోదీ సమావేశమయ్యారు.
