దేశంలో బొగ్గు నిల్వల కొరతపై కేంద్ర ప్రభుత్వంపై కాంగ్రెస్ అధినేత రాహుల్ గాంధీ విమర్శలు గుప్పించారు. బొగ్గు కొరత వల్ల విద్యుత్ లేక అనేక చిన్న పరిశ్రమలు మూతపడుతాయని ఆవేదన వ్యక్తం చేశారు. ఇది నిరుద్యోగానికి దారి తీస్తుందని చెప్పారు. 

దేశంలో బొగ్గు, విద్యుత్ సంక్షోభంపై కేంద్ర హోంమంత్రి అమిత్ షా సమావేశం నిర్వహించిన ఒక రోజు త‌రువాత ప్ర‌భుత్వంపై రాహుల్ గాంధీ విమ‌ర్శ‌లు గుప్పించారు. దేశంలో కేవలం ఎనిమిది రోజులకు స‌రిప‌డా బొగ్గు నిల్వలు మాత్రమే మిగిలి ఉన్నాయని ప్ర‌ధాని న‌రేంద్ర మోడీపై మండిపడ్డారు.

ఎనిమిదేళ్ల పాటు జరిగిన పెద్ద చర్చ ఫలితంగా భారత్‌లో కేవలం ఎనిమిది రోజుల బొగ్గు నిల్వలు మాత్రమే ఉన్నాయని ఆయ‌న అన్నారు. మరిన్ని ఉద్యోగ నష్టాలకు దారితీసే చిన్న తరహా పరిశ్రమల నష్టాన్ని నివారించడానికి కేంద్ర ప్రభుత్వం ద్వేషపూరిత బుల్డోజర్లను బంద్ చేసి పవర్ ప్లాంట్లపై దృష్టి పెట్టాలని ఆయ‌న సూచించారు. ‘‘ మోదీ జీ, స్తబ్దత పొంచి ఉంది. విద్యుత్ కోతలు చిన్న పరిశ్రమలను అణిచివేస్తాయి. ఇది మరిన్ని ఉద్యోగ నష్టాలకు దారి తీస్తుంది. ద్వేషపూరిత బుల్డోజర్లను స్విచ్ ఆఫ్ చేసి పవర్ ప్లాంట్లను ఆన్ చేయండి!’’ అంటూ ఆయ‌న ట్వీట్ చేశారు. 

దిగుమతులను తగ్గించడం ద్వారా ఇంధనంలో భారతదేశాన్ని స్వావలంబనగా మార్చడానికి వాణిజ్య మైనింగ్ కోసం 41 బొగ్గు గనులను వేలం వేయడానికి 2020 జూన్ 18వ తేదీన ప్రధాని మోడీ చేసిన ప్ర‌క‌ట‌న‌ను కూడా ఆయ‌న షేర్ చేశార‌. ప్రస్తుతం దేశంలో నెలకొన్న బొగ్గు సంక్షోభ పరిస్థితులతో దానిని పోల్చారు.

Scroll to load tweet…

దేశవ్యాప్తంగా బొగ్గు, విద్యుత్ సంక్షోభ పరిస్థితి కొనసాగుతున్న నేపథ్యంలో కేంద్ర హోంమంత్రి అమిత్ షా మంగళవారం విద్యుత్ శాఖ మంత్రి ఆర్కే సింగ్, బొగ్గు శాఖ మంత్రి ప్రహ్లాద్ జోషి, రైల్వే మంత్రి అశ్విని వైష్ణవ్‌లతో సమావేశమయ్యారు. విద్యుత్ ప్లాంట్లకు బొగ్గు సరఫరా కొరత కారణంగా విద్యుత్ సంక్షోభం తలెత్తే అవకాశం ఉందని పలు రాష్ట్రాలు హెచ్చరించిన నేపథ్యంలో ఈ సమావేశం జరిగినట్లు అధికారులు తెలిపారు. ఆంధ్రప్రదేశ్, మహారాష్ట్ర, గుజరాత్, పంజాబ్, జార్ఖండ్, హర్యానా వంటి 12 రాష్ట్రాల్లో 3 నుండి 8.7 శాతం వరకు విద్యుత్ కోతలను ఎదుర్కొంటున్న దేశీయ థర్మల్ పవర్ ప్లాంట్లలో బొగ్గు నిల్వలు తగ్గిపోతున్నట్లు నివేదికలు వెలువ‌డ్డాయి. ఈ ఏడాది ఏప్రిల్ మొదటి పక్షం రోజుల్లో దేశీయ విద్యుత్ డిమాండ్ 38 సంవత్సరాల గరిష్ట స్థాయికి చేరుకుంది. అక్టోబర్ 2021లో 1.1 శాతం విద్యుత్ కొరత ఉండగా 2022 ఏప్రిల్‌లో ఇది 1.4 శాతానికి పెరిగింది.

రష్యా-ఉక్రెయిన్ యుద్ధం కారణంగా దిగుమతి చేసుకున్న బొగ్గు ధరలు విపరీతంగా పెరగడాన్ని కేంద్ర విద్యుత్ శాఖ మంత్రి ఆర్‌కే సింగ్ తప్పుబట్టారు. బొగ్గు రవాణా చేయడానికి రైల్వే వ్యాగన్‌లు సరిపడా అందుబాటులో లేకపోవడమే దీనికి కారణం. కాగా ఈ కొర‌త‌పై కాంగ్రెస్ తన అధికారిక ట్విట్టర్ ద్వారా విమ‌ర్శ‌లు చేసింది. “ భారతదేశంలో కేవలం 8 రోజుల బొగ్గు నిల్వలు మాత్రమే మిగిలి ఉన్నాయి. బీజేపీ విద్వేషపూరిత రాజకీయాల వల్ల వీధుల్లో మండుతున్న మంటలు ఇక ఇళ్లల్లో మండవు.’’ అని పేర్కొంది.