New Delhi: దేశరాజధాని ఢిల్లీలో మంగళవారం రాత్రి తేలికపాటి వర్షం లేదా చిరుజల్లులు కురిసే అవకాశం ఉందనీ, కనిష్ఠ ఉష్ణోగ్రత సాధారణం కంటే ఐదు డిగ్రీలు తక్కువగా 23 డిగ్రీల సెల్సియస్ గా నమోదవుతుందని భారత వాతావరణ శాఖ (ఐఎండీ) పేర్కొంది. గరిష్ఠ ఉష్ణోగ్రతలు 38 డిగ్రీల సెల్సియస్ వరకు నమోదయ్యే అవకాశం ఉంది. ఇదిలావుండగా, తూర్పు మధ్య అరేబియా సముద్రం, దానిని ఆనుకుని ఉన్న ఆగ్నేయ అరేబియా సముద్రంలో రాగల 24 గంటల్లో అల్పపీడనం ఉత్తర దిశగా పయనించి తుఫానుగా మారే అవకాశం ఉందని ఐఎండీ తెలిపింది.
Cyclonic storm-IMD: గుజరాత్ లోని పోర్ బందర్ కు దక్షిణంగా ఆగ్నేయ అరేబియా సముద్రంలో ఏర్పడిన అల్పపీడనం వాయువ్య దిశగా పయనించి తుఫానుగా మారే అవకాశం ఉందని భారత వాతావరణ శాఖ తెలిపింది. గోవాకు పశ్చిమ నైరుతి దిశగా 920 కిలోమీటర్లు, ముంబయికి నైరుతి దిశగా 1,120 కిలోమీటర్లు, పోర్ బందర్ కు దక్షిణంగా 1,160 కిలోమీటర్లు, పాకిస్థాన్ లోని కరాచీకి దక్షిణంగా 1,520 కిలోమీటర్ల దూరంలో ఉదయం 5.30 గంటలకు అల్పపీడనం ఏర్పడిందని వాతావరణ శాఖ బులెటిన్ లో తెలిపింది.
ఇది ఉత్తర దిశగా పయనించి తూర్పు మధ్య అరేబియా సముద్రం, దానిని ఆనుకుని ఉన్న ఆగ్నేయ అరేబియా సముద్రంలో రాగల 24 గంటల్లో తుఫానుగా మారే అవకాశం ఉందని తెలిపింది. ఆగ్నేయ అరేబియా సముద్రంలో అల్పపీడన వ్యవస్థ ఏర్పడటం, దాని తీవ్రత కేరళ తీరం వైపు రుతుపవనాల పురోగతిని తీవ్రంగా ప్రభావితం చేస్తుందని ఐఎండీ సోమవారం తెలిపింది. అయితే కేరళలో రుతుపవనాల రాకకు తాత్కాలిక తేదీని వాతావరణ శాఖ వెల్లడించలేదు. కానీ అంతకుముందు జూన్ 7న కేరళకు రుతుపవనాలు చేరుకుంటాయని పేర్కొంది.
జూన్ 8,9 తేదీల్లో కేరళలో రుతుపవనాలు.. : స్కైమెట్
కేరళలో రుతుపవనాలు జూన్ 8 లేదా 9న ప్రారంభమవుతాయనీ, అయితే ఇది తేలికపాటి, సాధారణ వర్షాలతో కూడిన ప్రవేశంగా ఉంటుందని ప్రయివేటు వెదర్ అంచనాలు వేసే సంస్థ స్కైమెట్ తెలిపింది. అరేబియా సముద్రంలోని ఈ శక్తివంతమైన వాతావరణ వ్యవస్థలు లోతట్టు ప్రాంతాల్లో రుతుపవనాల పురోగతిని దెబ్బతీస్తాయి. వీటి ప్రభావంతో రుతుపవనాలు తీర ప్రాంతాలకు చేరుకోవచ్చనీ, కానీ పశ్చిమ కనుమలను దాటి చొచ్చుకుపోవడానికి అనుకూలంగా ఉండవని తెలిపింది. జూన్ 7 తర్వాతే కేరళలో రుతుపవనాలు ప్రారంభమవుతాయని స్కైమెట్ అంచనా వేసింది.
నైరుతి రుతుపవనాలు ఈ పరిధిలోకి వచ్చే అవకాశం ఉంది. లక్షద్వీప్, కేరళ, కోస్తా కర్ణాటకల్లో వరుసగా రెండు రోజులు వర్షాలు కురుస్తాయి. దీని ప్రకారం జూన్ 8 లేదా 9 తేదీల్లో వర్షపాతం వ్యాప్తి, తీవ్రత ఈ అవసరాలకు అనుగుణంగా ఉండవచ్చు. ఏదేమైనా, ఈ ఏడాది వర్షపాతం మరీ ఎక్కువగా ఉండకపోవచ్చునని తెలిపింది. రుతుపవనాల ప్రారంభంలో సాధారణ-తేలికపాటి ప్రవేశాన్ని మాత్రమే చేయగలదని ప్రయివేటు వాతావరణ అంచనా సంస్థ స్కైమెట్ తెలిపింది. కాగా, నైరుతి రుతుపవనాలు సాధారణంగా జూన్ 1న ఏడు రోజుల ప్రామాణిక విచలనంతో కేరళను తాకుతాయి. జూన్ 4 నాటికి రుతుపవనాలు కేరళకు చేరుకోవచ్చని భారత వాతావరణ శాఖ (ఐఎండీ) మే మధ్యలో తెలిపింది. ఆగ్నేయ రుతుపవనాలు గత ఏడాది మే 29న, 2021 జూన్ 3న, 2020లో జూన్ 1న, 2019లో జూన్ 8న, 2018 మే 29న రాష్ట్రంలోకి ప్రవేశించాయి.
కేరళలో కాస్త ఆలస్యంగా ప్రవేశించినంత మాత్రాన రుతుపవనాలు దేశంలోని ఇతర ప్రాంతాలకు ఆలస్యంగా చేరుకుంటాయని శాస్త్రవేత్తలు చెబుతున్నారు. ఇది సీజన్లో దేశవ్యాప్తంగా మొత్తం వర్షపాతంపై ప్రభావం చూపదని తెలిపారు. ఎల్ నినో పరిస్థితులు ఉన్నప్పటికీ నైరుతి రుతుపవనాల సీజన్ లో భారత్ లో సాధారణ వర్షపాతం నమోదవుతుందని ఐఎండీ తెలిపింది. వాయవ్య భారతంలో సాధారణం లేదా సాధారణం కంటే తక్కువ వర్షపాతం నమోదయ్యే అవకాశం ఉంది. తూర్పు, ఈశాన్య, మధ్య, దక్షిణ ద్వీపకల్పంలో దీర్ఘకాలిక సగటు 87 సెంటీమీటర్లలో 94-106 శాతం సాధారణ వర్షపాతం నమోదయ్యే అవకాశముంది.
