ఆరోగ్యకరమైన ఆహారం, జీవన శైలి మూత్రపిండాల పనితీరును మెరుగుపరుస్తాయి. అలాగే మూత్రపిండాలను ఆరోగ్యంగా ఉంచుతాయి.
మూత్రపిండాలు ముఖ్యమైన అవయవాలు. ఇవి మన మొత్తం ఆరోగ్యాన్ని కాపాడటంలో కీలక పాత్ర పోషిస్తాయి. రక్తం నుంచి వ్యర్థాలు, అదనపు ద్రవాన్ని ఫిల్టర్ చేయడానికి, రక్తపోటును నియంత్రించడానికి, ఎముకలను ఆరోగ్యంగా ఉంచడానికి, ఎర్ర రక్త కణాల ఉత్పత్తికి అవసరమైన హార్మోన్లను ఉత్పత్తి చేయడానికి సహాయపడతాయి. మూత్రపిండాలు సరిగ్గా పనిచేయకపోతే వ్యర్థాలు, ద్రవాలు శరీరంలో పేరుకుపోతాయి. దీనివల్ల ఎన్నో అనారోగ్య సమస్యలు వస్తాయి. మూత్రపిండాలను ఆరోగ్యంగా ఉంచాలంటే ఏం చేయాలో ఇప్పుడు తెలుసుకుందాం..
శారీరక శ్రమ
క్రమం తప్పకుండా వ్యాయామం చేయడం వల్ల మీ శరీరం ఫిట్ గా, ఆరోగ్యంగా ఉంటుంది. అంతేకాదు దీర్ఘకాలిక మూత్రపిండాల వ్యాధి వచ్చే ప్రమాదం కూడా తగ్గుతుంది. అంతేకాదు ఇది రక్తపోటును కూడా తగ్గిస్తుంది. గుండె ఆరోగ్యాన్ని మెరుగుపరుస్తుంది. ఇవన్నీ మూత్రపిండాల నష్టాన్ని నివారించడానికి సహాయపడతాయి. వాకింగ్, రన్నింగ్, సైక్లింగ్ లేదా బ్యాడ్మింటన్ వంటి గేమ్స్ ఆడితే కూడా మీ ఆరోగ్యం మెరుగ్గా ఉంటుంది.
రక్తంలో చక్కెర స్థాయిని నియంత్రించండి
మూత్రపిండాలు దెబ్బతినడానికి డయాబెటిస్ కూడా కారణమే. రక్తంలో చక్కెర స్థాయిలు ఎక్కువగా ఉంటే కాలక్రమేణా మూత్రపిండాలలోని చిన్న రక్త నాళాలను దెబ్బతింటాయి. అంతేకాదు మూత్రపిండాలు సరిగ్గా పనిచేసే సామర్థ్యం కూడా తగ్గుతుంది. మూత్రపిండాలు సరిగ్గా పనిచేయకపోతే వ్యర్థాలు, అదనపు ద్రవాలు శరీరంలో పేరుకుపోతాయి. దీనివల్ల ఇంకా ఎక్కువ అనారోగ్య సమస్యలు వస్తాయి. అయితే జీవనశైలి మార్పులు, మందుల ద్వారా రక్తంలో చక్కెర స్థాయిలను నియంత్రించొచ్చు. రక్తంలో చక్కెర స్థాయిలను నియంత్రించడంతో పాటుగా మూత్రపిండాలను ఆరోగ్యంగా ఉంచడానికి క్రమం తప్పకుండా వ్యాయామం చేయాలి. అలాగే సమతుల్య, పోషకమైన ఆహారం, సరైన ఆర్ద్రీకరణను కలిగి ఉంటే రక్తంలో చక్కెర స్థాయిలు పెరిగే అవకాశం ఉండదు.
యాంటీ బయాటిక్స్ తో జాగ్రత్త
తరచుగా యాంటీ బయాటిక్స్ ఉపయోగిస్తే.. మూత్రపిండాలు దెబ్బతినే అవకాశం ఉంది. మీరు పూర్తి ఆరోగ్యంగా ఉన్నా.. మీ మూత్రపిండాలు పనిచేయకపోతే మీ ఆరోగ్యం బాగా దెబ్బతింటుంది.
ఆరోగ్యంగా తినండి
మీరు తినే ప్రతిదీ మీ ఆరోగ్యంపై మంచో, చెడో ప్రభావం పక్కాగా చూపిస్తుంది. అధిక కొవ్వు, ఉప్పు, చక్కెర వంటి అనారోగ్యకరమైన ఆహారాలు కూడా మీ మూత్రపిండాలను దెబ్బతీస్తాయి. పేలవమైన ఆహారం చివరికి అధిక రక్తపోటు, డయాబెటీస్, ఊబకాయం, ఇతర మూత్రపిండాలకు హాని కలిగించే అనారోగ్యాలకు కారణమవుతుంది. ప్రాసెస్ చేసిన భోజనానికి బదులుగా పండ్లు, కూరగాయలు, తృణధాన్యాలను పుష్కలంగా తినండి.
తగినంత నీటిని తాగండి
మూత్రపిండాలు ఆరోగ్యంగా ఉండాలంటే నీటిని పుష్కలంగా తాగాలి. మూత్రపిండాలు వ్యర్థాలను బయటకు పంపడానికి, ముఖ్యమైన పోషకాలను రవాణా చేయడానికి నీరు సహాయపడుతుంది. ఇది శరీరంలోని టాక్సిన్స్, ఇతర వ్యర్థ ఉత్పత్తులను మూత్రం ద్వారా బయటకు పంపడానికి సహాయపడుతుంది. మీ శరీరంలో నీరు తగినంత లేకపోతే మూత్రపిండాల్లో రాళ్లు, ఇన్ఫెక్షన్లు వచ్చే అవకాశం ఉంది. దీర్ఘకాలిక నిర్జలీకరణం కాలక్రమేణా మూత్రపిండాల నష్టాన్ని కలిగిస్తుంది. ఎందుకంటే మూత్రపిండాలు ఎక్కువగా పనిచేస్తాయి. సరిగ్గా పనిచేయలేవు.
