మానవత్వం చాటుకున్న గవర్నర్ తమిళిసై.. విమానంలో ప్రయాణికుడికి ప్రథమచికిత్స.. (ఫొటోలు)

హైదరాబాద్ : ఢిల్లీ- హైదరాబాద్ విమానంలో ప్రయాణిస్తున్న  ఓ ప్రయాణికుడికి తెలంగాణ గవర్నర్ అత్యవసర చికిత్సను అందించి మానవత్వాన్ని చాటుకున్నారు. వారణాసి నుంచి ఢిల్లీ- హైదరాబాద్  విమానంలో గత అర్ధరాత్రి తిరుగు ప్రయాణంలో ఉండగా ఈ ఘటన జరిగింది. ఒక ప్రయాణికుడు అస్వస్థతకు గురికావడంతో ఆ విమానంలోనే ప్రయాణిస్తున్న గవర్నర్ డాక్టర్ తమిళిసై సౌందరరాజన్ ఆ ప్రయాణికుడికి ప్రాథమిక చికిత్స చేశారు.

విమానం గాల్లో ఉన్నప్పుడు ప్రయాణికుడు చెస్ట్ పెయిన్, ఇతర సమస్యలతో  తీవ్ర అస్వస్థతకు గురయ్యాడు. దీంతో విమాన సిబ్బంది ఆ విమానంలో ఎవరైనా డాక్టర్ లు ఉన్నారా? అని  అనౌన్స్ చేశారు. విషయం తెలిసిన తెలంగాణ గవర్నర్ డాక్టర్ తమిళిసై సౌందరరాజన్ వెంటనే స్పందించారు. ఆ ప్రయాణికుడికి ప్రాథమిక చికిత్స అందించి, భరోసా ఇచ్చి ఉపశమనం కలిగించారు.

కోలుకున్న ప్రయాణికుడు గవర్నర్ కు కృతజ్ఞతలు తెలిపాడు. అదేవిధంగా ఆ విమానంలో ప్రయాణిస్తున్న ఇతర ప్రయాణికులు అభినందనలు తెలిపారు. అదే విమానంలో ప్రయాణిస్తున్న మరో ప్రయాణికుడు ఈ చికిత్స క్రమాన్ని కొన్ని ఫోటోలు తీసి తన ట్విట్టర్ లో షేర్ చేసుకోవడంతో ఈ విషయం వెలుగులోకి వచ్చింది.

గవర్నర్ తమిళిసై సౌందరరాజన్ ఉన్నత వైద్య విద్య అభ్యసించిని ఉన్నత విద్యావంతురాలు. ఆమె ఎంబిబిఎస్, ఎండి- డిజిఓ లాంటి వైద్య విద్యా కోర్సులు చేసిన విషయం విదితమే.