టీపీసీసీ చీఫ్‌ మార్పుపై మరోసారి చర్చ: కొత్త సారధి వచ్చేనా?

జీహెచ్ఎంసీ ఎన్నికల్లో మెరుగైన ఫలితాలను సాధిస్తామని ఆ పార్టీ ధీమాగా ఉంది. అయితే జీహెచ్ఎంసీ ఎన్నికల్లో మెరుగైన ఫలితాలు రాకపోతే పీసీసీ చీఫ్ మార్పు కోసం డిమాండ్ విన్పించే అవకాశం లేకపోలేదు. 2014 ఎన్నికల నుండి వరుస ఓటములు ఆ పార్టీని తీవ్ర నైరాశ్యంలోకి నెట్టాయి. పార్టీ నుండి కొందరు నేతలు, ఎమ్మెల్యేలు ఇతర పార్టీల్లో చేరడం కూడ ఆ పార్టీని కలవరపరుస్తోంది.

దీంతో నాయకత్వాన్ని మార్చాలనే డిమాండ్ కొంతకాలంగా బలంగా విన్పిస్తోంది. పీసీసీ చీఫ్ పదవి కోసం పలువురు నేతలు ఆశలు పెట్టుకొన్నారు. తెలంగాణలో టీఆర్ఎస్ తామే ప్రత్యామ్నాయం అంటూ బీజేపీ నేతలు చెప్పుకొంటున్నారు. దుబ్బాకలో బీజేపీ విజయం సాధించడంతో  ఈ ప్రచారాన్ని కమలం నేతలు మరింత విస్తృతం చేశారు.

దీంతో పీసీసీ నాయకత్వాన్ని మార్చాలనే డిమాండ్ ను నేతలు మరోసారి ఎత్తే అవకాశం లేకపోలేదు. పార్టీని సమర్ధవంతంగా నడిపే నేతకు పీసీసీ పగ్గాలు అప్పగించాలని కూడా కొందరు పార్టీ నేతలు ఎఐసీసీని కోరుతున్నారు.

దుబ్బాక ఉప ఎన్నికల ఫలితాలకు ముందే ఉత్తమ్ ను మార్చాలని ఎఐసీసీ కార్యదర్శి మధు యాష్కీ డిమాండ్ చేశారు.జీహెచ్ఎంసీ ఎన్నికల్లో కాంగ్రెస్ కు మెరుగైన ఫలితాలు రాకపోతే ఈ డిమాండ్ ను విన్పించే నేతలు మరికొందరు యాష్కీకి జత కలిసే అవకాశం లేకపోలేదు.

భువనగిరి ఎంపీ కోమటిరెడ్డి వెంకట్ రెడ్డి , మల్కాజిగిరి ఎంపీ రేవంత్ రెడ్డి ల మధ్య ప్రధానంగా పోటీ నెలకొంది. కోమటిరెడ్డి వెంకట్ రెడ్డి పీసీసీ చీఫ్ పదవి కోసం ఆసక్తిని కనబరుస్తున్నారని పార్టీ వర్గాల్లో ప్రచారం సాగుతోంది.  మాజీ మంత్రి శ్రీధర్ బాబు పేరు కూడ పీసీసీ చీఫ్ పదవి కోసం విన్పిస్తోంది. పార్టీలోని అన్ని వర్గాలను కలుపుకొనే నేతగా శ్రీధర్ బాబుకు పేరుంది. దీంతో శ్రీధర్ బాబుకు పీసీసీ చీఫ్ పదవిని కట్టబెట్టాలనే కోరే వారు కూడ లేకపోలేదు.

రేవంత్ రెడ్డి ప్రాతినిథ్యం వహిస్తున్న మల్కాజిగిరి పార్లమెంట్ నియోజకవర్గంలో 48 కార్పోరేటర్ పదవులకు ఎన్నికలు జరిగాయి. వీటిలో కాంగ్రెస్ ఎన్ని డివిజన్లలో విజయం సాధిస్తోందో మరికొన్ని గంటల్లో తేలనుంది.పీసీసీ చీఫ్ పదవి కోసం చాలా మంది నేతల మధ్య పోటీ ఉంది. అయితే పార్టీ నాయకత్వం ఎవరికి అవకాశం కల్పిస్తోందనేది తేలాల్సి ఉంది.