- Home
- Telangana
- హైదరాబాద్లో కచ్చితంగా ఇల్లు కొనాలని రూలు ఏం లేదు బ్రో.. ప్లాన్ బీ ఆప్షన్ కూడా ఉంది
హైదరాబాద్లో కచ్చితంగా ఇల్లు కొనాలని రూలు ఏం లేదు బ్రో.. ప్లాన్ బీ ఆప్షన్ కూడా ఉంది
Hyderabad: హైదరాబాద్లాంటి మెట్రో నగరంలో ఇల్లు కొనడం చాలా మందికి డ్రీమ్. రోజురోజుకీ పెరుగుతోన్న ధరలతో చాలా మందికి ఇది కలగానే మిగిలిపోతోంది. అయితే ఇక్కడే ప్లాన్ బీ వైపు చాలా మంది మొగ్గు చూపుతున్నారు. అదేంటో ఇప్పుడు తెలుసుకుందాం.
మెట్రోలో అద్దె, టైర్-2లో కొనుగోలు
మెట్రో నగరాల్లో అధిక జీవన వ్యయం, ఆస్తి ధరల పెరుగుదలతో ఇళ్ల కొనుగోలు కష్టంగా మారింది. అయితే కొందరు టైర్-2 నగరాల్లో ఇల్లు కొనుగోలు చేసి, మెట్రోలో అద్దెకు ఉండే వ్యూహాన్ని అనుసరిస్తున్నారు. ఈ ఆలోచన ఆర్థికంగా లాభదాయకంగా కనిపిస్తుంది. ముఖ్యంగా బెంగళూరు, హైదరాబాద్ వంటి నగరాల్లో ఇల్లు కొనుగోలు చేయలేక, తమ సొంత ఊళ్లలో పెట్టుబడి పెట్టాలనుకునేవారికి ఇది ఒక మార్గంగా అనిపించవచ్చు. అయితే, ఈ నిర్ణయం అందరికీ సరైనది కాదని ఆర్థిక నిపుణులు హెచ్చరిస్తున్నారు.
రిమోట్ వర్క్ కూడా ఓ కారణం
చాలామంది ఉద్యోగులు టైర్-2 నగరాలకు మారడానికి 'రిమోట్ వర్క్' వెసులుబాటును ఒక కారణంగా చెబుతున్నారు. అయితే, ఈ రిమోట్ పని మోడల్ ఎల్లప్పుడూ స్థిరంగా ఉండకపోవచ్చు. కొన్ని కంపెనీలు ఇప్పటికే కార్యాలయాలకు తిరిగి రావాలని ఉద్యోగులను కోరుతున్నాయి, మరికొన్ని భవిష్యత్తులో ఈ విధానాన్ని మార్చవచ్చు. ఈ మోడల్ ఎల్లప్పుడూ స్థిరంగా ఉండకపోవచ్చు. రిమోట్ పని పరిమితం అయితే, మెట్రోలో పని చేస్తున్న వ్యక్తికి టైర్-2 నగరంలో కొన్న ఇల్లు భారం కావచ్చు. ఉదాహరణకు, టీసీఎస్, ఇన్ఫోసిస్ వంటి పెద్ద కంపెనీలు హైబ్రిడ్ మోడల్కు ప్రాధాన్యంఇస్తున్నాయి, ఇది పూర్తి స్థాయి రిమోట్ పనికి భిన్నం.
టైర్-2 నగరాల్లో మౌలిక సదుపాయాల లోపం
టైర్-2 నగరాల్లో జీవన వ్యయం తక్కువగా ఉన్నప్పటికీ, మెట్రో నగరాలతో పోలిస్తే మౌలిక సదుపాయాలు చాలా పరిమితంగా ఉంటాయి. పాఠశాలలు, ఆసుపత్రులు, వినోద కేంద్రాలు, రవాణా సదుపాయాలు తక్కువగా ఉంటాయి. విద్య, వైద్యం వంటి కీలక అవసరాల కోసం మెట్రో నగరాలపై ఆధారపడాల్సి వస్తుంది. ఒక కుటుంబం పిల్లల విద్య కోసం నాణ్యమైన పాఠశాలలను ఆశిస్తే, అది టైర్-2 నగరాల్లో లభించడం కష్టం. మెరుగైన సౌకర్యాలు లేకపోవడం ఒక సమస్యే. ఇది దీర్ఘకాలికంగా జీవన నాణ్యతపై తీవ్ర ప్రభావం చూపుతుంది.
లాభాలు అస్సలు లేవా.?
అయితే టైర్2 నగరాల్లో ఇల్లు కొనుగోలు చేయడంతో లాభాలు లేవా అంటే కచ్చితంగా ఉన్నాయని చెప్పాలి. ముఖ్యంగా టైర్ 2 సిటీల్లో తక్కువ ధరకే భూమి లభిస్తోంది. కాబట్టి ఇలాంటి ప్రదేశాల్లో భూమి కొనుగోలు చేసి ఇండిపెండెంట్ ఇళ్లు నిర్మించుకోవచ్చు. దీనిద్వారా రెంట్ వచ్చే అవకాశాలు ఉంటాయి. ఒకవేళ మెట్రో నగరంలో నివసిస్తున్నా ఈ కిరాయితో హైదరాబాద్లో రెంట్ కట్టుకోవచ్చు. అలాగే పదవీవిరమణ తర్వాత సొంతింటిలో నివసించే అవకాశం లభిస్తుంది. కానీ కేవలం లోన్పై ఆధారపడి ఇల్లు నిర్మిస్తే మాత్రం ఈఎమ్ఐ చెల్లించడంలో ఇబ్బందులు ఎదురయ్యే అవకాశాలు ఉన్నాయి.
అందరికీ సరైన వ్యూహం కాదు: ఆర్థిక నిపుణుల సలహా
ఇదిలా ఉంటే ఆర్థిక నిపుణులు ఈ 'మెట్రోలో అద్దె, టైర్-2లో కొనుగోలు' వ్యూహం అందరికీ సరిపోదని స్పష్టం చేస్తున్నారు. వ్యక్తిగత ఆర్థిక పరిస్థితి, కెరీర్ లక్ష్యాలు, కుటుంబ అవసరాలను బట్టి నిర్ణయం తీసుకోవాలి. యువ ఉద్యోగులకు కెరీర్ అవకాశాలు మెట్రో నగరాల్లోనే ఎక్కువగా ఉంటాయి. టైర్-2 నగరాల్లో పెట్టుబడి పెట్టడం దీర్ఘకాలికంగా వారికి లాభదాయకం కాకపోవచ్చు. దీర్ఘకాలిక ఆలోచన చాలా ముఖ్యం. కొన్నిసార్లు, మెట్రో నగరాల్లోనే చిన్న ఇల్లు కొనుగోలు చేయడం లేదా అద్దెకు ఉండటమే ఉత్తమ పరిష్కారం.
