IND vs NZ : టీమిండియాలోకి కొత్త మొనగాడు.. గంభీర్ స్కెచ్ మామూలుగా లేదుగా !
IND vs NZ : న్యూజిలాండ్తో రెండో వన్డేలో గెలిచినా జట్టులో మార్పులు ఉంటాయని కెప్టెన్ గిల్ సంకేతాలిచ్చాడు. గాయపడ్డ వాషింగ్టన్ సుందర్ స్థానంలో ఢిల్లీ ఆల్ రౌండర్ ఆయుష్ బదోని జట్టులోకి ఎంపికయ్యాడు.
గెలిచినా టీమ్లో మార్పులు తప్పవు.. న్యూజిలాండ్తో రెండో వన్డేకి గిల్ ప్లాన్ ఇదే!
భారత్, న్యూజిలాండ్ జట్ల మధ్య జరుగుతున్న ప్రతిష్ఠాత్మక మూడు వన్డేల సిరీస్ ప్రస్తుతం రసవత్తరంగా సాగుతోంది. వడోదరలో జరిగిన మొదటి వన్డే ఇంటర్నేషనల్ మ్యాచ్లో టీమిండియా అద్భుత ప్రదర్శన చేసింది. ఈ మ్యాచ్లో 4 వికెట్ల తేడాతో విజయం సాధించి, సిరీస్లో 1-0 ఆధిక్యాన్ని సాధించింది.
ఇప్పుడు అందరి కళ్లు రెండో వన్డేపై పడ్డాయి. ఈ మ్యాచ్ జనవరి 14న రాజ్కోట్ లో జరగనుంది. సాధారణంగా గెలిచిన జట్టులో మార్పులు చేయడానికి కెప్టెన్లు ఇష్టపడరు. అయితే, మొదటి మ్యాచ్లో విజయం సాధించినప్పటికీ, రెండో వన్డే కోసం తుది జట్టులో భారీ మార్పులు ఉంటాయని కెప్టెన్ శుభ్మన్ గిల్ స్పష్టమైన సంకేతాలు ఇచ్చారు.
భారత ప్లేయింగ్ ఎలెవన్లో భారీ మార్పలపై గిల్ ఏమన్నారంటే?
వడోదరలో జరిగిన తొలి వన్డేలో విజయం తర్వాత మాట్లాడిన కెప్టెన్ శుభ్మన్ గిల్, జట్టు భవిష్యత్తు ప్రణాళికలను వివరించారు. రాబోయే మ్యాచ్లలో జట్టులో కచ్చితంగా మార్పులు కనిపిస్తాయని ఆయన స్పష్టం చేశారు. ఈ సందర్భంగా టీమిండియా పాటిస్తున్న రొటేషన్ పాలసీ గురించి గిల్ ప్రస్తావించారు.
కేవలం సిరీస్ గెలవడమే కాకుండా, ఆటగాళ్లందరికీ అవకాశాలు ఇవ్వడం తమ లక్ష్యమని ఆయన తెలిపారు. "జట్టులో రొటేషన్ గురించి మాట్లాడితే.. గత సిరీస్లో అర్ష్దీప్ సింగ్ అద్భుతమైన ప్రదర్శన చేశాడు. ఆ సమయంలో మహ్మద్ సిరాజ్ జట్టులో లేడు. రాబోయే వరల్డ్ కప్ను దృష్టిలో ఉంచుకుని, జట్టులోని ఆటగాళ్లందరికీ తగినన్ని అవకాశాలు ఇవ్వాలని మేము భావిస్తున్నాం. ముఖ్యంగా భవిష్యత్తులో మనకు ఎక్కువ వన్డే మ్యాచ్లు లేనందున, ఈ సిరీస్ను సద్వినియోగం చేసుకోవాలి" అని గిల్ పేర్కొన్నారు. దీన్ని బట్టి రాజ్కోట్ వన్డేలో బౌలింగ్ విభాగంలో కీలక మార్పులు జరిగే అవకాశం ఉందని అర్థమవుతోంది.
విరాట్ కోహ్లీపై ప్రశంసల వర్షం
తొలి వన్డేలో టీమిండియా విజయంలో కీలక పాత్ర పోషించిన సీనియర్ బ్యాటర్ విరాట్ కోహ్లీపై కెప్టెన్ గిల్ ప్రశంసల వర్షం కురిపించారు. ఆదివారం జరిగిన మ్యాచ్లో కోహ్లీ 93 పరుగుల కీలక ఇన్నింగ్స్ ఆడి జట్టును గెలిపించారు. దీనిపై స్పందిస్తూ గిల్, "ప్రస్తుతం విరాట్ కోహ్లీ బ్యాటింగ్ను చాలా సులువుగా మారుస్తున్నారు. ఇక్కడి పిచ్లపై ఇన్నింగ్స్ ప్రారంభించడం చాలా కష్టం. కానీ కోహ్లీ చేస్తున్న దాన్ని మరొకరు అంత సులభంగా చేయలేరు. అది అనుకరించడం కష్టం. ఆయన ఇదే ఫామ్ను కొనసాగిస్తూ, మరిన్ని పరుగులు చేస్తారని ఆశిస్తున్నాను" అని కొనియాడారు. కఠినమైన పరిస్థితుల్లో కూడా కోహ్లీ తన అనుభవంతో మ్యాచ్ను ఎలా మలుపు తిప్పగలరో గిల్ మాటలు స్పష్టం చేస్తున్నాయి.
టీమిండియాకు భారీ షాక్.. వాషింగ్టన్ సుందర్ ఔట్
సిరీస్ మధ్యలో టీమిండియాకు గట్టి ఎదురుదెబ్బ తగిలింది. ఇప్పటికే రిషబ్ పంత్ ప్రాక్టీస్ సెషన్లో గాయపడి సిరీస్ మొత్తానికి దూరమైన విషయం తెలిసిందే. ఇప్పుడు మరో కీలక ఆల్ రౌండర్ వాషింగ్టన్ సుందర్ కూడా గాయంతో సిరీస్ నుంచి తప్పుకున్నారు. వడోదరలో జరిగిన తొలి వన్డేలో సుందర్ గాయపడ్డారు.
అతనికి పక్కటెముకల దగ్గర నొప్పి సమస్య తలెత్తినట్లు నిర్ధారణ అయింది. దీని కారణంగా న్యూజిలాండ్తో జరగాల్సిన మిగిలిన రెండు మ్యాచ్లకు అతను అందుబాటులో ఉండరని బీసీసీఐ ప్రకటించింది. ఒకే సిరీస్లో ఇద్దరు కీలక ఆటగాళ్లు గాయాల బారిన పడటం జట్టు మేనేజ్మెంట్ను ఆందోళనకు గురిచేస్తోంది.
అదృష్టం అంటే ఇదే.. 26 ఏళ్ల ఆయుష్ బదోని ఎంట్రీ !
వాషింగ్టన్ సుందర్ గాయపడటంతో 26 ఏళ్ల ఢిల్లీ ఆల్ రౌండర్ ఆయుష్ బదోనికి ఊహించని విధంగా టీమిండియా నుంచి పిలుపు వచ్చింది. బీసీసీఐ సెలెక్టర్లు అతన్ని సుందర్ స్థానంలో జట్టులోకి ఎంపిక చేశారు. బీసీసీఐ నుంచి ఆయుష్ బదోనికి పిలుపు రావడం ఇదే తొలిసారి. ప్రస్తుతం అతను విజయ్ హజారే ట్రోఫీ 2025-26 సీజన్లో ఆడుతున్నారు.
ఆయుష్ బదోని ప్రతిభను వెలికితీయడంలో ప్రస్తుత టీమిండియా హెడ్ కోచ్ గౌతమ్ గంభీర్ పాత్ర చాలా ఉంది. గంభీర్ ఐపీఎల్లో లక్నో సూపర్ జెయింట్స్ మెంటార్గా ఉన్నప్పుడు బదోనిని గుర్తించారు. ఆ సీజన్లో లక్నో తరఫున బదోనికి వరుస అవకాశాలు ఇచ్చారు. ఆ నమ్మకాన్ని నిలబెట్టుకుంటూ బదోని అద్భుతంగా రాణించారు. ఇప్పుడు జాతీయ జట్టులో స్థానం సంపాదించడం అతని కెరీర్లో అతిపెద్ద మైలురాయి.
ఎవరీ ఆయుష్ బదోని? రికార్డులు ఏం చెబుతున్నాయి?
ఆయుష్ బదోని దూకుడుగా ఆడే కుడిచేతి వాటం బ్యాటర్, సమర్థవంతమైన ఆఫ్ స్పిన్ బౌలర్. దేశవాళీ క్రికెట్లో ఢిల్లీ తరఫున, ఐపీఎల్లో లక్నో సూపర్ జెయింట్స్ తరఫున తన సత్తా చాటారు. మిడిల్ ఆర్డర్లో వచ్చి వేగంగా పరుగులు చేయగలగడం, అవసరమైనప్పుడు వికెట్లు తీయగలగడం అతని ప్రత్యేకత.
అతను 3వ స్థానం నుండి 7వ స్థానం వరకు ఎక్కడైనా బ్యాటింగ్ చేయగలరు. ఇన్నింగ్స్ను నిర్మించడం లేదా మ్యాచ్ను ఫినిష్ చేయడం.. ఈ రెండింటిలోనూ బదోని దిట్ట. ఢిల్లీ జట్టు విజయాల్లో అతను వన్ మ్యాన్ ఆర్మీగా నిలిచిన సందర్భాలు చాలా ఉన్నాయి. ప్రొఫెషనల్ క్రికెట్లో అతను ఇప్పటివరకు 57 వికెట్లు కూడా తీశారు.
ఆయుష్ బదోని దేశవాళీ రికార్డులు
ఆయుష్ బదోని రికార్డులు చాలా ఆకట్టుకునేలా ఉన్నాయి. ఫస్ట్ క్లాస్ క్రికెట్ లో 21 మ్యాచ్ల్లో 57.96 సగటుతో 1681 పరుగులు చేశారు. ఇందులో 4 సెంచరీలు, 7 హాఫ్ సెంచరీలు ఉన్నాయి. లిస్ట్-ఏ క్రికెట్ (వన్డే ఫార్మాట్) లో 22 ఇన్నింగ్స్ల్లో 36కు పైగా సగటుతో 693 పరుగులు సాధించారు. ఇందులో ఒక సెంచరీ, 5 హాఫ్ సెంచరీలు ఉన్నాయి. టీ20లో 79 మ్యాచ్ల్లో 1788 పరుగులు చేశారు.
మిగిలిన రెండు వన్డేలకు భారత జట్టు ఇదే !
శుభ్మన్ గిల్ (కెప్టెన్), రోహిత్ శర్మ, విరాట్ కోహ్లీ, కేఎల్ రాహుల్, శ్రేయస్ అయ్యర్, రవీంద్ర జడేజా, మహ్మద్ సిరాజ్, హర్షిత్ రాణా, ప్రసిద్ధ్ కృష్ణ, కుల్దీప్ యాదవ్, నితీష్ కుమార్ రెడ్డి, అర్షదీప్ సింగ్, యశస్వి జైస్వాల్, ధ్రువ్ జురెల్, ఆయుష్ బదోని.
