Holi 2025 Date: హోలీ పండగ మార్చి 14న? 15న? పూర్తి వివరాలతో క్లారిటీ ఇదిగో?

Holi 2025 Date: మన దేశంలో హోలీ పండగకు చాలా ప్రత్యేకత ఉంది. చాలా పండగలు రాష్ట్రాలు, ప్రాంతాల వారీగా జరుపుకుంటారు. కాని హోలీ అనేది దేశ వ్యాప్తంగా నిర్వహించే పండగల్లో ముఖ్యమైనది. అందుకే ఇండియన్స్ కి హోలీ చాలా ప్రత్యేకం. అయితే ఈ ఏడాది అంటే 2025లో హోలీ పండగ నిర్వహించే విషయంలో కన్ఫూజన్ ఏర్పడింది. కొందరు మార్చి 14 అని, మరికొందరు మార్చి 15 అని అంటున్నారు. ఏది కరెక్టో క్లారిటీగా తెలుసుకుందాం రండి.

సాధారణంగా ప్రతి ఏడాది హోలీ పండగను భారతదేశంలో ఫాల్గుణ మాస పౌర్ణమి రోజున నిర్వహిస్తారు. ఇది సాధారణంగా మార్చి నెలలో వస్తుంది. 2025 సంవత్సరంలో పౌర్ణమి మార్చి 14న వచ్చింది. అయితే హోలీ పండగ నిర్వహించడానికి ముందు హోలికా దహనం చేయాల్సి ఉంటుంది. ప్రతి ఏడాది హోలికా దహనం కార్యక్రమాన్ని పౌర్ణమికి ముందు రోజు నిర్వహిస్తారు. అది కూడా శుభ ముహూర్తం నిర్ణయించి రాత్రి సమయంలో నిర్వహిస్తారు. అయితే ఈ ఏడాది హోలికా దహనాన్ని మార్చి 13న అంటే గురువారం రోజున నిర్వహించాలి. అయితే హోలికా దహనం భద్ర కాలంలో చేయకూడదు. 

భద్ర కాలం అంటే ఏమిటి?
భద్ర కాలం అనేది హిందూ పంచాంగంలో ఒక ప్రత్యేకమైన సమయం. ఇది శుభకార్యాలకు అనుకూలం కాదు. 2025లో మార్చి 13న నిర్వహించాల్సిన హోలికా దహనం కూడా భద్ర కాలంలో  చేయకూడదు. ఈ భద్ర కాలాన్ని చంద్రుడి గమనాన్ని బట్టి పండితులు, పంచాంగ కర్తలు నిర్ణయిస్తారు. 

పౌర్ణమి తిధి మార్చి 13 గురువారం ఉదయం 10.23 నిమిషాలకు ప్రారంభమై మార్చి 14 శుక్రవారం ఉదయం 11.26 వరకు ఉంది. ఈ లెక్కన హోలీ మార్చి 14న మాత్రమే నిర్వహించాలి. అయితే హోలీ ముందు రోజు కచ్చితంగా హోలికా దహనం చేయాలి. ఆ సమయంలో భద్ర కాలం ఉండకూడదు.

అయితే మార్చి 13 గురువారం రాత్రి 10.37 వరకు భద్ర కాలం ఉంది. అందువల్ల చాలా ప్రాంతాల్లో శుభ ముహూర్తం చూసుకొని గురువారమే హోలికా దహనం చేయడానికి నిర్ణయించారు. దీంతో హోలీ పండుగ మార్చి 14, శుక్రవారం రోజున ఫిక్స్ అయ్యింది. 

కొన్ని ప్రాంతాల్లో మాత్రం హోలికా దహనం మార్చి 14న చేసి, మార్చి 15న హోలీ పండగ నిర్వహించాలని అనుకుంటున్నారు. అయితే భద్ర కాలం తర్వాత శుభ ముహూర్తం చూడాల్సింది ఆయా ప్రాంతాల్లో ఉండే పండితులు. ప్రాంతాల వారీగా ముహూర్తాలు మారుతుంటాయి. అందువల్ల వారు నిర్ణయించిన ముహూర్తంలో హోలికా దహనం చేస్తారు. అందువల్ల దేశంలో ఎక్కువ ప్రాంతాల్లో హోలికా దహనం మార్చి 13న, హోలీ పండగ మార్చి 14న నిర్వహించనున్నారు. 

హోలికా దహనం వెనుక కథ ఏంటి
హోళికా దహనం అనేది హోలీ పండుగకు ముందు రోజు జరిగే ప్రత్యేకమైన ఆచారం. ఇది పాపంపై పుణ్యం విజయం సాధించిందని, ధర్మం అధర్మాన్ని జయించిందని సూచించే గొప్ప సంప్రదాయం.

పురాణాల ప్రకారం హిరణ్యకశిపుడి అక్క హోళికా. హిరణ్యకశిపుడు అహంకారానికి లోనైన రాక్షస రాజు. తన కుమారుడు ప్రహ్లాదుడు విష్ణు భక్తుడిగా మారడాన్ని అంగీకరించలేక అతడిని చంపాలని నిర్ణయించుకుంటాడు. హిరణ్యకశిపుడు తన అక్క హోళికాను పిలిచి ప్రహ్లాదుని మంటల్లో కాల్చేయమని ఆదేశిస్తాడు. హోళికాకి ఒక ప్రత్యేకమైన వస్త్రం ఉండేది. ఇది ఆమెను మంటల్లో కాలిపోకుండా కాపాడుతుంది. హోళికా ప్రహ్లాదుడిని మోసగించి అతనితో పాటు అగ్నిలోకి దూకుతుంది. కాని విష్ణువు కృపతో ప్రహ్లాదుడు సురక్షితంగా బయటపడతాడు. హోళికా కాలిపోయి చనిపోతుంది. ఈ సంఘటనను గుర్తుచేసుకుంటూ హోళికా దహనం జరుపుకుంటారు