Cyclone Fengal : ఆ జిల్లాలో భారీ వర్షాలు... రేపు స్కూళ్లు, కాలేజీలకు సెలవు

ఈ సంవత్సరం ఈశాన్య రుతుపవనాల ప్రారంభంలో తమిళనాడు రాజధాని చెన్నైతో పాటు దక్షిణాది జిల్లాల్లో విస్తారంగా వర్షాలు కురిసాయి. ఇవి చాలవన్నట్టు ఇప్పుడు మరో తుఫాను తమిళనాడును వెంటాడుతోంది. 

నైరుతి బంగాళాఖాతంలోని ఏర్పడిన వాయుగుండం ఉత్తర-వాయువ్య దిశగా కదిలి మరింత బలపడింది. ఇది ఫెంగాల్ అనే తుఫానుగా రూపాంతరం చెందుతోంది. ఇది శ్రీలంక తీరం వెంబడి ఉత్తర-వాయువ్య దిశగా తమిళనాడు తీరం వైపు కదులుతుందని అంచనా.

ఈ తుఫాను ప్రభావంతో తమిళనాడు, పుదుచ్చేరి, కారైకల్‌లలో ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది. కడలూరు, తిరువారూర్, నాగపట్టినం, మయిలాడుతురై, కారైకల్‌లలో భారీ నుంచి అతి భారీ వర్షాలు కురుస్తాయని వాతావరణ శాఖ హెచ్చరించింది.

చెన్నై, డెల్టా జిల్లాల్లో, ముఖ్యంగా నాగపట్టినంలో భారీ వర్షాలు కురుస్తున్నాయి. నాగపట్టినంలో అత్యంత భారీ వర్ష హెచ్చరిక జారీ చేయడంతో రేపు స్కూళ్లు, కాలేజీలకు సెలవు ప్రకటించారు.