విదేశాల్లో వైద్య విద్య చదవాలంటే నీట్ యూజీ అర్హత ఉండాల్సిందే : సుప్రీంకోర్టు

NEET UG qualification mandatory: వైద్య విద్య ప్రమాణాలను సమర్థిస్తూ ఇచ్చిన తీర్పులో విదేశాల్లో వైద్య విద్య చదవాలనుకునే అభ్యర్థులకు నీట్ అర్హత తప్పనిసరి అనే జాతీయ వైద్య కమిషన్ నిబంధనలను సుప్రీంకోర్టు సమర్థించింది.  

NEET UG qualification mandatory: విదేశాల్లో అండర్ గ్రాడ్యుయేట్ మెడికల్ కోర్సులు అభ్యసించే ముందు భారతీయ విద్యార్థులు నీట్ యూజీ అర్హత సాధించాలనే నిబంధనను సుప్రీంకోర్టు సమర్థించింది. 2018 లో మెడికల్ కౌన్సిల్ ఆఫ్ ఇండియా (MCI) ప్రవేశపెట్టిన ఈ నియమంతో విద్యార్థులు భారతదేశంలో మెడిక‌ల్ ప్రాక్టిస్ కు అవసరమైన ప్రమాణాలను కలిగి ఉండేలా చేస్తుంది.

వైద్య విద్య ప్రమాణాలను సమర్థిస్తూ ఇచ్చిన తీర్పులో విదేశాల్లో వైద్య విద్య చదవాలనుకునే అభ్యర్థులకు నీట్ అర్హత తప్పనిసరి అనే జాతీయ వైద్య కమిషన్ నిబంధనలను సుప్రీంకోర్టు సమర్థించింది. అర్హతను తప్పనిసరి చేయడాన్ని వ్యతిరేకిస్తూ దాఖలైన పిటిషన్లను తిరస్కరించింది.

అర్హత సర్టిఫికెట్ కోసం నీట్ అర్హతను నిర్దేశించే 2018 నిబంధనలు పారదర్శకంగా, సమానంగా ఉన్నాయని న్యాయమూర్తులు బీఆర్ గవాయ్, కె వినోద్ చంద్రన్ ల‌తో కూడిన ధర్మాసనం అభిప్రాయపడింది. విదేశీ వైద్య సంస్థల నియంత్రణ-2002 ద్వారా రూపొందించబడిన ఈ అవసరాలు రాజ్యాంగానికి విరుద్ధంగా లేవని లేదా భారత వైద్య మండలి చట్టానికి విరుద్ధంగా లేవని అత్యున్న‌త న్యాయ‌స్థానం అభిప్రాయపడింది.

ముఖ్యంగా, నిబంధనల అమలు తర్వాత విదేశీ వైద్య ప్రవేశాలు పొందిన అభ్యర్థులు దాఖలు చేసిన తాత్కాలిక మినహాయింపు పిటిషన్లను కోర్టు తోసిపుచ్చింది. నీట్ యూజీసీని తప్పనిసరి చేయడం న్యాయమైన, పారదర్శకమైన చర్య అని, ఇది ఎటువంటి చట్టపరమైన నిబంధనలను ఉల్లంఘించదని కోర్టు తీర్పులో పేర్కొంది. ఈ నిబంధన గ్రాడ్యుయేట్ మెడికల్ ఎడ్యుకేషన్ రెగ్యులేషన్స్, 1997కి అనుగుణంగా ఉంటుంద‌నీ, వైద్య విద్య ప్రమాణాలలో ఏకరూపతను నిర్ధారిస్తుందనే విష‌యాలు ప్ర‌స్తావించింది. 

ఈ నిబంధనను సవాలు చేస్తూ విద్యార్థులు వాద‌న‌ల్లో ఇండియన్ మెడికల్ కౌన్సిల్ చట్టం-1956, ఈ నిబంధనను ప్రవేశపెట్టే ముందు దానిని సవరించలేదని వాదించారు. అయితే, చట్టంలోని సెక్షన్ 33 ప్రకారం దీనిని అమలు చేసే అధికారం MCIకి ఉందని సుప్రీంకోర్టు పేర్కొంది.

సవరించిన నిబంధనలు అమలులోకి వచ్చిన తర్వాత విదేశాల్లో అడ్మిషన్ తీసుకున్న విద్యార్థులు తప్పనిసరిగా పాటించాలని పేర్కొంటూ, ఒకేసారి మినహాయింపు కోసం చేసిన అభ్యర్థనలను కోర్టు తిరస్కరించింది. విదేశాల్లో మెడిసిన్ చదివి భారతదేశంలో ప్రాక్టీస్ చేయాలనుకునే వారికి మాత్రమే ఈ నియమం వర్తిస్తుంది, అయితే విద్యార్థులు నీట్ లేకుండానే ఇతర దేశాలలో చదువుకోవచ్చు... పని చేయవచ్చు.