పెట్రోల్ కొట్టించుకునేటపుడు జాగ్రత్త ... రీడింగ్ చూసి మోసాన్ని గుర్తించొచ్చు, ఎలాగో తెలుసా?

మీరు పెట్టే డబ్బుకి సరైన పెట్రోల్ లేదా డీజిల్ వస్తుందా? పెట్రోల్ పంపుల్లో జరిగే మోసాలు, వాటిని ఎలా తప్పించుకోవాలో ఈ ఆర్టికల్‌లో తెలుసుకోండి.

పెట్రోల్ స్కామ్

పెట్రోల్ పంప్ జంప్ ట్రిక్ స్కామ్:

ప్రస్తుత కాలంలో పెట్రోల్, డీజిల్ అనేవి నిత్యావసర సరుకులుగా మారిపోయాయి. మనిషి బ్రతుకు బండి నడవాలంటే అతడి ఏదో ఒక బండి ఎక్కాల్సిందే... అది ముందుకు నడవాలంటూ ఇంధనం వుండాల్సిందే. ఇలా మనిషికి ఆహారం లాగా వాహనాలకు ఇంధనం అవసరం. ప్రతిఒక్కరి వద్ద సొంత వాహనాలు పెరిగిపోవడంతో పెట్రోల్, డీజిల్ ధరలు కూడా ఆకాశాన్ని అంటున్నాయి.

అయితే మీరు వందలు, వేల రూపాయలు పెట్టి బండిలో ఇంధనం (పెట్రోల్, డీజిల్) కొట్టిస్తున్నారా? పెట్రోల్ బంక్ కు పోయిన ప్రతిసారి మనం చెల్లించే డబ్బులకు సరిపడా పెట్రోల్ కొడుతున్నాడా అనే అనుమానం వస్తుంది. మరి నిజంగానే పెట్రోల్ బంకుల్లో మోసాలు జరుగుతాయా? అంటే అవుననే సమాధానం వినిపిస్తుంది. 

'సార్, 0 చూడండి' పెట్రోల్ పోయడానికి ముందు బంక్ సిబ్బంది నుండి వినిపించే మాట. అంటే రీడింగ్ సున్నా నుండే స్టార్ట్ అవుతుందని... మేము ఎలాంటి మోసాలకు పాల్పడటం లేదని వారి ఉద్దేశం. అయితే కొన్ని బంకుల్లో ఈ మాటల వెనకే అసలు మోసం దాగి వుంటుందట. కేవలం సున్నా చెక్ చేయడం వల్ల సరైన ఇంధనం వస్తుందని హామీ లేదు. చాలా పెట్రోల్ పంపులు 'జంప్ ట్రిక్' ద్వారా వినియోగదారులను మోసం చేస్తున్నాయని ఆరోపణలు ఉన్నాయి.

జంప్ ట్రిక్ అంటే ఏమిటి?

జంప్ ట్రిక్ అనేది కొన్ని పెట్రోల్ పంపులు వినియోగదారులకు చెల్లించే దానికంటే తక్కువ ఇంధనాన్ని అందించేందుకు ఉపయోగించే ట్రిక్. దీని వల్ల బంకు యాజమాన్యం లాభపడగా వినియోగదారుడి జేబుకు చిల్లు పడుతుంది. అంటే చెల్లించిన ధర కంటే తక్కువ ఇంధనం వస్తుంది...తద్వారా బండి తొందరగా మళ్లీ పెట్రోల్ బంకుకు చేరుతుంది.

ఇది ఎలా జరుగుతుంది?

ఇంధనం నింపడం ప్రారంభించినప్పుడు, ఇంధన మీటర్ క్రమంగా పెరగకుండా 0 నుండి ఒకేసారి 10, 20 లేదా అంతకంటే ఎక్కువ వేగంగా దూకుతుంది. అంటే ఒక్కసారిగా ఎంత పెరుగుతుందో అక్కడినుండే పెట్రోల్ బండిలో పడుతుంది. ఒక్కో బంకుల్లో ఒకేసారి రీడింగ్ 50కి చేరుకుంటుంది. ఇలాంటి బంకుల్లో మీరు రూ.100 పెట్రోల్ కొట్టించుకున్నారంటే మీకు వచ్చేది మాత్రం రూ.50 మాత్రమే. మిగతా 50 రూపాయలు మీరు మోసపోయినట్లే. 

వేగంగా పెరిగే మొత్తం

పెట్రోల్ పంపులు వాటి యంత్రాలను ఎక్కువ రీడింగులను ప్రదర్శించేలా ట్యాంపరింగ్ చేస్తారు. దీనివల్ల వాస్తవానికి పంపిణీ చేసిన దానికంటే ఎక్కువ ఇంధనం పంప్ చేయబడుతున్నట్లు కనిపిస్తుంది.

సాధారణంగా, మీటర్ జంప్ రూ. 4-5 లోపల మాత్రమే ఉండాలి. అది రూ. 10 లేదా 20 లేదా అంతకంటే ఎక్కువ దూకితే ఏదో తప్పు జరుగుతుందనే సంకేతం కావచ్చు. ఇంధనం నింపుతున్నప్పుడు మీటర్‌పై ఎల్లప్పుడూ నిశితంగా గమనించండి. రీడింగ్ అకస్మాత్తుగా దూకితే సిబ్బందిని ప్రశ్నించడానికి వెనుకాడకండి.