‘‘ నా పెళ్లి రోజు వచ్చేసింది ’’... సాంప్రదాయ దుస్తుల్లో డాక్టర్ గుర్‌ప్రీత్ కౌర్ , వివాహానికి ముందు ఫోటో వైరల్

పంజాబ్ సీఎం భగవంత్ మాన్ తన సన్నిహితురాలు డాక్టర్ గుర్‌ప్రీత్ కౌర్ ను కుటుంబ సభ్యులు, సన్నిహితుల సమక్షంలో గురువారం పెళ్లాడారు. ఈ కార్యక్రమానికి ఢిల్లీ ముఖ్యమంత్రి అరవింద్ కేజ్రీవాల్, ఎంపీలు, ఎమ్మెల్యేలు ఇతర ప్రముఖులు హాజరై వధువరూలను ఆశీర్వదించారు.  

bhagawant mann

పంజాబ్ ముఖ్యమంత్రి భగవంత్ మాన్ వివాహం గురువారం సన్నిహితులు, కుటుంబ సభ్యులు, రాజకీయ ప్రముఖుల సమక్షంలో ఘనంగా జరిగింది. డాక్టర్ గుర్‌ప్రీత్ కౌర్ ను ఆయన సిక్కు సాంప్రదాయం ప్రకారం పెళ్లాడారు. అయితే పెళ్లికి కొద్ది గంటల ముందు గుర్‌ప్రీత్ కౌర్ తన ట్విట్టర్ ఖాతా నుంచి పెళ్లి కూతురి డ్రెస్ లో వున్న ఫోటోను షేర్ చేశారు. "దిన్ షగ్నా ద చద్యా... (నా పెళ్లి రోజు వచ్చేసింది)" అనే క్యాప్షన్ పెట్టారు. 

చండీగఢ్ లోని తన నివాసంలో భగవంత్ మాన్- గుర్‌ప్రీత్ కౌర్ ను వివాహం చేసుకున్నారు. ఈ వివాహానికి ఆప్ అధినేత, ఢిల్లీ సీఎం అరవింద్ కేజ్రీవాల్, ఆప్ నేత రాఘవ్ చద్దా తదితరులు హాజరయ్యారు. గుర్‌ప్రీత్ కౌర్ పంజాబ్ ఎన్నికల్లో భగవంత్ మాన్ కు సాయం చేసినట్లు ఆప్ నేతలు చెబుతున్నారు. 

ఇక మొదటి భార్య నుంచి విడాకులు తీసుకున్న దాదాపు ఏడేళ్ల తర్వాత భగవంత్ మాన్ రెండో వివాహం చేసుకున్నారు. పంజాబ్ సీఎం మొదటి భార్య ఇందర్ ప్రీత్ కౌర్. ఈ దంపతులకు ఇద్దరు పిల్లలు. అయితే కొన్ని కారణాల వల్ల భగవంత్ మాన్, ఇందర్ ప్రీత్ లు విడాకులు తీసుకున్నారు. అనంతరం ఆమె తన ఇద్దరు పిల్లలతో కలిసి అమెరికాలో వుంటున్నారు. భగవంత్ మాన్ ప్రమాణ స్వీకార కార్యక్రమానికి ఆయన ఇద్దరు పిల్లలు హాజరయ్యారు.

ఇకపోతే.. గుర్‌ప్రీత్ కౌర్ 2018లో మెడిసిన్ పూర్తి చేశారు. ముగ్గురు తోబుట్టువుల్లో ఆమె చిన్నది. వీరి కుటుంబం హర్యానాలోని కురుక్షేత్ర సమీపంలోని పెహ్వా ప్రాంతానికి చెందినది. గుర్‌ప్రీత్ కౌర్ తండ్రి ఇందర్ జింగ్ సింగ్ ఓ రైతు. ఆమె సిస్టర్స్ అంతా విదేశాల్లో వున్నారు. వీరికి భగవంత్ మాన్ కుటుంబంతో ఎప్పటి నుంచో సన్నిహిత సంబంధాలు వున్నాయి.

హర్యానాలోని ఓ ప్రైవేట్ యూనివర్సిటీలో నాలుగేళ్ల క్రితం గురుప్రీత్ కౌర్ ఎంబీబీఎస్ పూర్తి చేశారు. పెహోవాలోని ఆమె ఇరుగుపొరుగు వారు.. గురుప్రీత్ కౌర్ ఏకంగా రాష్ట్ర ముఖ్యమంత్రిని పెళ్లాడబోతున్నట్లు మీడియా ద్వారా తెలుసుకుని ఆశ్చర్యపోతున్నారు.