గోవాలో టూరిజంపై చైనా కుట్రలు చేస్తోందా? ఏమిటీ ప్రచారం? అసలు నిజమేంటి?

Goa Tourism : భారతదేశంలో మంచి టూరిస్ట్ స్పాట్ ఏదంటే టక్కున వినిపించే పేరు గోవా. అసలు ఇది మనదేశంలోనే వుందా లేక విదేశాలకు ఏమైనా వచ్చామా? అనేలా వుంటుంది గోవా. ఈ బీచుల్లో హాయిగా సేదతీరేందుకు, బాగా ఎంజాయ్ చేసేందుకు దేశ విదేశాల నుండి గోవాకు పర్యాటకులు పోటెత్తుతుంటారు.   

అయితే తాజాగా గోవా టూరిజంపై సోషల్ మీడియాలో ఓ దుష్ప్రచారం జరుగుతోంది. గోవా టూరిజం పూర్తిగా దెబ్బతిందని... అక్కడికి విదేశీ పర్యాటకుల సంఖ్య పూర్తిగా తగ్గిందని ఓ ప్రచారం సాగుతోంది. అంతేకాదు  దేశీయ పర్యాటకులు కూడా గోవాకు వెళ్లేందుకు ఇష్టపడటం లేదని... దీంతో గోవా వీధులు, బీచులు పర్యాటకులు లేక ఖాళీగా కనిపిస్తున్నాయని సోషల్ మీడియాలో ప్రచారం జరుగుతోంది. 

చైనా ఎకనమిక్ ఇన్ఫర్మేషన్ సెంటర్ గోవా టూరిజంపై చేపట్టిన సర్వేలో ఈ విషయం బైటపడిందని సోషల్ మీడియా ప్రచార సారాంశం. ఇలా గోవాకు టూరిస్టులు తగ్గారంటూ చైనా తప్పుడు సర్వేను పట్టుకుని సోషల్ సోషల్ మీడియా ఇన్‌ఫ్లుయెన్సర్ కొందరు దుష్ఫ్రచారం చేస్తున్నారు. కానీ గోవాకు వచ్చే టూరిస్టుల సంఖ్య అస్సలు తగ్గలేదని తాజా డాటా చెబుతోంది. 
 

అసలు నిజమిదీ : 

సోషల్ మీడియాలో ప్రచారం జరుగుతున్నట్లు గోవాలో పర్యాటక రంగం దెబ్బతినడం కాదు మరింత పెరుగుతోందని తాజా డాటా చెబుతోంది. ఇటీవల క్రిస్మస్, న్యూ ఇయర్ సందర్భంగా గోవాకు పర్యాటకులు పోటెత్తారట. దీంతో బీచ్ లు, వీధులు సందర్శకులతో నిండిపోయాయని... రికార్డ్ స్థాయిలో ఆదాయం సమకూరినట్లు తెలుస్తోంది. 

గోవా పర్యాటక రంగం 2024 ఏప్రిల్ నుండి డిసెంబర్ వరకు ఏకంగా రూ.4,614 కోట్లను ఆర్జించింది. 2023 లో పోలిస్తే ఇది రూ.365 కోట్లు ఎక్కువ. జిఎస్టి ఆదాయంలో 9.62 శాతం, వ్యాట్ వసూళ్లలో 6.41 శాతం పెరుగుదల కనిపించింది.దీన్నిబట్టే గోవాలో పర్యాటకం ఎలా అభివృద్ది చెందుతుందో అర్థం చేసుకోవచ్చు.

ఈ డాటా గోవాకు వెళ్లే పర్యాటకుల సంఖ్య తగ్గిందన్న ప్రచారం తప్పని నిరూపిస్తోంది. గోవాలోని కేరిమ్, కెనకోనా, అంజునా,కలంగుటే వంటి బీచుల్లో పర్యాటకుల సంఖ్య రోజురోజుకు పెరుగుతోంది. కేవలం బ్యాచిలర్స్ మాత్రమే కాదు కుటుంబాలతో కలిసి వచ్చి గోవాలో సరదగా గడిపేవారి సంఖ్య పెరుగుతోంది. వాటర్ గేమ్స్, అడ్వెంచర్ స్పోర్ట్స్ ను పిల్లలు, పెద్దలు బాగా ఎంజాయ్ చేస్తున్నారు. ఇక గోవా వీధుల్లో షాపింగ్ గురించి ప్రత్యేకంగా చెప్పాల్సిన అవసరం లేదు. 
 

గోవా టూరిజంపై పుకార్లు : 

గోవాలో పరిస్థితులు పర్యాటకాన్ని దెబ్బతీసాయనే ప్రచారం సోషల్ మీడియాలో జోరుగా సాగుతోంది. గోవా వెళ్లేందుకు విమాన ఛార్జీలు అధికంగా వుండటం, అక్కడికి వెళ్లాక కూడా ఖర్చులు చాలా ఎక్కువగా వున్నాయని పర్యాటకులు భావిస్తున్నారని సోషల్ మీడియా ప్రచార సారాంశం. అందువల్లే గోవాకు వెళ్లేందుకు చాలామంది ఇష్టపడటం లేదని ప్రచారం జరుగుతోంది. 

ఇలా గోవాలో హోటల్ ఛార్జీలు కూడా అధికంగా వున్నాయని... ఇతర ఖర్చులు కూడా ఎక్కువని భావిస్తున్నారట. అందువల్లే పర్యాటకులు తగ్గారని... బీచులు, వీధులు ఖాళీగా కనిపిస్తున్నాయని ప్రచారం జరుగుతోంది. కానీ వాస్తవానికి గతంలో కంటే గోవాను సందర్శించే వారి సంఖ్య పెరిగింది. అక్కడి బీచులు, వీధులు సందర్శకులతో కిక్కిరిసిపోయి వున్నాయి.