Sunglasses: రోడ్డు పక్కన కొన్న సన్ గ్లాసెస్ వాడుతున్నారా? ఇవి కచ్చితంగా తెలుసుకోండి!
Sunglasses: ఎండలో బయటకు వెళ్లేటప్పుడు కళ్ల రక్షణ కోసం సన్ గ్లాసెస్ వాడటం సాధారణం. కానీ చాలామంది రోడ్డు పక్కన తక్కువ ధరకు దొరికే గ్లాసెస్ వాడుతుంటారు. ఇవి తాత్కాలికంగా బెస్ట్ అనిపించినా, వాటి వల్ల కళ్లకు ప్రమాదం అంటున్నారు నిపుణులు. ఎందుకో తెలుసా?
రోడ్డు పక్కన దొరికే సన్ గ్లాసెస్ వాడితే ఏమవుతుంది?
ఎండలో బయటకు వెళ్లేటప్పుడు చాలామంది తక్కువ ధరలో రోడ్డు పక్కన దొరికే సన్ గ్లాసెస్ కొనుగోలు చేసి వాడుతుంటారు. ఇవి అప్పటికప్పుడు కళ్లను కాపాడుకోవడానికి సరిపోతాయిని అనిపించినా, వీటి వాడకం అస్సలు మంచిది కాదంటున్నారు నిపుణులు. ముఖ్యంగా ఈ గ్లాసెస్లో సరైన UV రక్షణ ఉండకపోవడం పెద్ద సమస్య. దానివల్ల UV కిరణాలు కళ్లలోని కార్నియా, లెన్స్, రెటినా వంటి సున్నిత భాగాలపై నెమ్మదిగా, తీవ్ర ప్రభావం చూపుతాయని నిపుణులు చెబుతున్నారు.
కంటి వ్యాధుల ప్రమాదం
నిపుణుల ప్రకారం నాణ్యతలేని గ్లాసెస్ కేవలం కళ్లకు డార్క్ షేడ్ మాత్రమే ఇస్తాయి. UV కిరణాలను అడ్డుకోలేవు. దాంతో UV కిరణాలు కంటి లోపలి గుడ్డుపై మరింత ప్రభావం చూపే ప్రమాదం ఉంది. ఈ తక్కువ ధరలో దొరికే గ్లాసెస్ వాడటం వల్ల దీర్ఘకాలంలో కళ్లల్లో మంట, తలనొప్పి, కంటి అలసట వంటి సమస్యలు రావచ్చు. అది అలాగే కొనసాగితే మాక్యులర్ డిజెనరేషన్ వంటి తీవ్రమైన కంటి వ్యాధుల ప్రమాదం కూడా పెరుగుతుంది.
కళ్లపై అదనపు ఒత్తిడి
మరొక ముఖ్యమైన విషయం ఏంటంటే.. రోడ్డు పక్కన దొరికే గ్లాసెస్లో ఉపయోగించే లెన్సులు సరైన ప్రమాణాలతో తయారుకావు. వాటిలో ఉన్న లెన్స్ వక్రత కారణంగా మనం చూసే దృశ్యం స్వల్పంగా వంగిపోయినట్టు లేదా అస్పష్టంగా కనిపించవచ్చు. ఇది కళ్లపై అదనపు ఒత్తిడిని పెంచి, కంటి నరాలను అలసటకు గురిచేస్తుంది.
ప్రత్యేకంగా వాహనం నడిపేటప్పుడు లేదా ఎండలో ఎక్కువసేపు పని చేసే సమయంలో ఇది ప్రమాదకరంగా మారవచ్చు. అలాగే కొన్ని తక్కవ ధర గ్లాసెస్లో ఉపయోగించే పదార్థాలు నాసిరకం కావడం వల్ల చర్మానికి అలెర్జీలు రావచ్చు. ముక్కు, చెవుల దగ్గర గీతలు లేదా ఇర్రిటేషన్ కలగవచ్చు.
ఎలాంటి సన్ గ్లాసెస్ వాడాలి?
నిపుణుల ప్రకారం మంచి నాణ్యత కలిగిన సన్ గ్లాసెస్ ఎంపిక చేసుకోవడం చాలా ముఖ్యం. అవి తప్పనిసరిగా 100% UV ప్రొటెక్షన్ లేదా UV400 ప్రొటెక్షన్ కలిగి ఉండాలి. బ్రాండెడ్ కావాల్సిన అవసరం లేకపోయినా, కనీస ప్రమాణాలు ఉన్నాయా లేదా అని చూసుకోవడం మంచిది.
లెన్స్ రంగు డార్క్గా ఉండటం కంటే UV ఫిల్టర్ ఉండటమే ముఖ్యం. అలాగే ముఖానికి సరిపోయే సైజు, కళ్లను పూర్తిగా కవర్ చేసే డిజైన్ ఎంచుకోవాలి. అవసరమైతే ఆప్టికల్ షాపుల్లో నిపుణుల సలహా తీసుకోవడం మంచిది.
