Phone: ఎక్కువ సేపు ఫోన్ చూస్తున్నారా? కన్ఫామ్ మీకు ఈ సమస్యలు వచ్చుంటాయి..

Phone: పని ఉన్నా లేకున్నా.. పనిగట్టుని మొబైల్ ఫోన్లలో తలదూర్చే వారు చాలా మందే ఉన్నారు. వారికి ఫోనే లోకం. ఇక ఇలాంటి వారికో బ్యాడ్ న్యూస్.. ఈ ఫోన్ బాగా అలవాటున్నవాళ్లు ఈ రోగాలను ఎదుర్కోవడానికి సిద్దంగా ఉండాలి. ఎందుకంటే..

Phone: ఈ డిజిటల్ యుగానికి మాటలతో పనిలేదు. చేతలే చాలు.. ఎలా అంటారా.. చిన్న పిల్లల నుంచి మొదలు పెడితే పెద్దవారికి వరకు ప్రతి ఒక్కరూ మొబైల్ ఫోన్లను పట్టుకునే కాలాన్ని వెళ్లదీస్తున్నారు. దాని అవసరం ఎంతవరకున్నా.. అవసరానికి మించి సెల్ ఫోన్లను వాడుతున్నారు. అంతెందుకు రోడ్లపై నడుస్తుంటే కూడా రోడ్డు దిక్కు చూడకుండా ఫోన్ వైపే చూస్తుంటారు. సెల్ ఫోన్ మాయలో పడి నిద్రపోయే సమయాన్ని కూడా తగ్గించినవారున్నారు. 24 గంటలు దానితో గడపమన్నా.. దానికేముంది అంటూ హ్యాపీగా ఫోన్లలో గడిపేవారు చాలా మందే ఉన్నారు. యువతే కాదు.. పిల్లలకు కూడా ఈ ఫోన్ మాయలో పూర్తిగా పడిపోయారు. ఈ అలవాటు ఎక్కువగా ఆన్ క్లాసుల మూలంగా మరింత ఎక్కువైంది. కాగా సెల్ ఫోన్లతో ఎక్కువ సమయం గడిపేవారికి అనేక అనారోగ్య సమస్యలు వస్తాయని అరోగ్య నిపుణులు హెచ్చిరిస్తున్నారు. అవేంటో ఈ ఆర్టికల్ ద్వారా తెలుసుకుందాం..

ఊబకాయం: గంటలకొద్దీ స్క్రీన్ వైపే చూసే వారు బరువు పెరిగే ఛాన్సెస్ చాలా ఉన్నాయి. జస్ట్ వెయిట్ పెరగడమే కాదు ఇతర రోగాలు కూడా వచ్చే ప్రమాదం ఉందని నిపుణులు చెబుతున్నారు. మీకు తెలుసా.. ఫోన్లలో వెబ్ సిరీస్ లు గంటలకు గంటలు చూసేవారు వారం రోజుల్లోనే బరువు పెరుగుతున్నారట. టీవీలు చూడటం, ఫోన్లలో గేమ్ లు ఆడే వారి పరిస్థితి కూడా ఇలాగే ఉంటుందట. మరొక ముఖ్యమైన విషయం ఏమిటంటే.. ఫోన్లకు అడిక్ట్ అయిన వారు వ్యాయామం, వాకింగ్ అస్సలు చేయరట. 

కంటి సమస్యలు: ఎక్కువ సేపు ఫోన్ చూసే వారికి కంటిచూపు దెబ్బతినడం పక్కాగా జరుగుతుందని నిపుణులు తేల్చి చెబుతున్నారు. అందుకే ఎక్కువ సేపు ల్యాప్ టాప్ లు, ఫోన్లు, టీవీలు చూసేవారు ముందు జాగ్రత్తగా కళ్లద్దాలను పెట్టుకోవడం మంచిది. మీకు తెలుసా.. ఎక్కువ సేపు ఎవరైతే స్క్రీన్ను చూస్తారో వారికి ‘కంప్యూటర్ విజన్ సిండ్రోమ్’ అనే వ్యాధి సోకే ప్రమాదం ఉంది.  ఈ సమస్య వల్ల తీవ్రమైన తలనొప్పి, కంటిచూపు మందగించడం, కళ్లపై ఒత్తిడి పడటం, పొడి బారడం వంటివి తలెత్తే ప్రమాదం ఉంది. కాబట్టి ఫోన్ చూసే సమయాన్ని తగ్గిస్తే అన్ని విధాల మంచి జరుగుతుంది. 

నిద్ర తగ్గుతుంది: స్క్రీన్ వైపు ఎక్కువ సేపు చూడటం వల్ల నిద్రరాదు. ఎందుకంటే స్క్రీన్ల నుంచి వచ్చే లైటింగ్.. మన శరీరంలో నిద్రను ప్రేరేపించే మెలటోనిన్ హార్మోన్ రిలీజ్ ను తగ్గిస్తుంది. దాంతో మీకు నిద్రపట్టడం కష్టతరంగా మారుతుంది. కాబట్టి నిద్రపోయే ముందు ఒక గంట ముందే టీవీ, ఫోన్లు, ల్యాప్ టాప్ లకు దూరంగా ఉండాలి. అప్పుడే నిద్ర బాగా పడుతుంది. ఆరోగ్యం కూడా బాగుంటుంది. 

వెన్ను నొప్పి, మెడనొప్పి:  ఒక్కొక్కరు ఒక్కో పొజీషన్ లో కూర్చొని, పడుకుని ఫోన్లను చూస్తుంటారు.  దీనిమూలంగా వల్ల వెన్ను నొప్పి, మెడనొప్పి వంటి సమస్యలు ఎదుర్కోవాల్సి ఉంటుంది. వీటితో పాటుగా చేతినొప్పి కూడా వస్తుంది. ఈ సమస్యలు ఒక్కసారి మొదలైతే.. అవి దీర్ఘకాలం పాటు ఉండే ప్రమాదం ఉంది. అంతేకాదు ఈ ఫోన్ల వల్ల మానవ సంబంధాలు కూడా దెబ్బతినే ప్రమాదం ఉంది. అంతెందుకు ఈ ఫోన్ల రాకతో మనుషుల మధ్య మాటలు తగ్గాయి.