దేశంలో అత్యంత పొడవైన, అతిచిన్న పేరుగల రైల్వేస్టేషన్లు ఇవే

భారతీయ రైల్వే... వందేళ్లకు పైగా ప్రజలకు సేవలందిస్తున్న రవాణా వ్యవస్థ. ఆనాడు బ్రిటిష్ పాలకులు దేశ సంపదను దోచుకునేందుకు అనువుగా వుంటుందని రైల్వే వ్యవస్థను ప్రారంభించినా... స్వతంత్ర భారతంలో ఇది ప్రజాసేవలో మునిగిపోయింది. క్రమక్రమంగా అభివృద్ది చెందుతూ వచ్చిన ఇండియన్ రైల్వేస్ ఇప్పుడు ప్రపంచమే ఆశ్చర్చపోయే స్థాయికి చేరుకుంది. ఆసియాలోనే అతిపెద్దది... ప్రపంచంలో 4వ అతిపెద్దది మన ఇండియన్ రైల్వే నెట్ వర్క్.

భారతీయ రైల్వే కోట్లాదిమందిని గమ్యస్థానాలకు చేర్చడమే కాదు లక్షలాదిమందికి ఉద్యోగ, ఉపాధి అవకాశాలు కల్పిస్తోంది. ప్రపంచంలోనే అత్యధిక సంఖ్యలో ఉద్యోగులను కలిగిన ప్రభుత్వ రంగ సంస్థల్లో భారత రైల్వేది రెండో స్థానం. ఇలా ప్రత్యక్షంగా ఉద్యోగులు కలిగినవారే కాదు పరోక్షంగా లక్షలాదిమంది రైల్వే ద్వారా ఉపాధి పొందుతున్నారు.  

భారతదేశం 68,000 కి.మీ కంటే ఎక్కువ రైల్వే ట్రాక్‌లు కలిగి వుంది. ఇందులో 45,000 కిలోమీటర్లకు పైగా విద్యుదీకరించబడిన రైలు నెట్‌వర్క్‌ వుంది. అలాగే వేలాది రైళ్లు మనషులనే కాదు సరుకు రవాణాలో కీలకపాత్ర పోషిస్తున్నాయి. దేశ అభివృద్దిలోనే కాదు ఆర్థిక వృద్దిలోనూ ఇండియన్ రైల్వేస్ భాగస్వామ్యం అవుతున్నాయి. 
 

ఇతర రవాణా వ్యవస్థలతో పోలిస్తే రైలు ప్రయాణం తక్కువ ఖర్చుతో కూడుకున్నది. అంతేకాదు సుదూర ప్రాంతాలకు కూడా అత్యంత సౌకర్యవంతంగా ప్రయాణించే వెసులుబాటు రైళ్లలో వుంటుంది.అందువల్లే ప్రతిరోజు లక్షలాదిమంది రైళ్లలో ప్రయాణిస్తుంటారు. శుభకార్యాలు, పండగలకు సొంతూళ్లకు వెళ్ళాలన్నా, కుటుంబంతో లేదా స్నేహితులతో విహార యాత్రలకు వెళ్లాలన్నా చాలామంది రైల్వేను ఆశ్రయిస్తారు. ఇక ప్రతిరోజు స్కూళ్లు,కాలేజీలు,ఉద్యోగాలకు వెళ్లేవారు, కార్మికులు, కూలీలు,వ్యాపారులు... ఇలా ఒక్కరేమిటీ ప్రతి ఒక్కరు రైలు ప్రయాణికులే. చాలామందికి రైలు ప్రయాణం జీవితంలో భాగమైపోయింది. 

ఇలా తన సేవలతో భారత ప్రజలకు చేరువైన భారతీయ రైల్వే చాలా ప్రత్యేకతలు కలిగివుంది. ఇలా దేశంలోని 7,335 రైల్వే స్టేషన్లలో తమిళనాడుకు చెందిన ఓ రైల్వే స్టేషన్ పేరు ప్రత్యేకతను సంతరించుకుంది. గతంలో అన్నాడిఎంకే ప్రభుత్వం చెన్నై సెంట్రల్ రైల్వే స్టేషన్ కు మాజీ సీఎం ఎంజి రామచంద్రన్ పేరు పెట్టాలని ప్రతిపాదించగా కేంద్రం అందుకు అంగీకరించింది. దీంతో 2019 లో పురుట్చి తలైవార్ డా. ఎంజి  రామచంద్రన్ సెంట్రల్ స్టేషన్ ( Puratchi Thalaivar Dr. MG Ramachandran Central Railway Station) గా పేరు మార్చారు. 

ఇలా మార్చబడం వల్ల ఈ రైల్వే స్టేషన్ ప్రత్యేక గుర్తింపును పొందింది. ప్రస్తుతం భారతదేశంలో వున్న అన్ని రైల్వేస్టేషన్ల పేర్ల కంటే ఈ రైల్వే స్టేషన్ పేరు పొడవైనది. ఇది మొత్తం 57 అక్షరాలతో పొడవైన రైల్వే స్టేషన్ అని చెప్పబడింది. ఇక దేశంలో అత్యంత చిన్న పేరున్న రైల్వే స్టేషను ఇబ్ (IB). ఇది ఒడిషా లోని ఝూర్స్ గూడా సమీపంలో ఉంది.

ప్రపంచంలోనే అత్యంత పొడవైన పేరుగల రైల్వే స్టేషన్ ఐరోపా దేశమైన వేల్స్‌లో వుంది. దీని పేరు Llanfairpwllgwyngyllgogerychwyrndrobwlllantysiliogogogoch. ఈ రైల్వే స్టేషన్ పేరు మొత్తం 58 అక్షరాలను కలిగివుంటుంది.