Mukesh Ambani Antiliaరూ.17వేల కోట్ల ఇంటికి ఒక్క ఏసీ కూడా లేదట.. అదీ ముఖేష్ అంబానీ మ్యాజిక్!
రూ.17,400కోట్ల విలాస సౌధం: మధ్యతరగతి ఇళ్లలో కూడా ఏసీలు బిగించుకుంటున్న రోజులివి. మరి భారతీయ అపర కుబేరుడు ముఖేష్ అంబానీ రూ.17,400కోట్లతో నిర్మించుకున్న27 అంతస్తుల విలాసాల సౌధం యాంటిలియాలో ఎన్ని ఏసీలు ఉన్నాయనుకుంటున్నారు? వందలు, వేలు అనుకుంటున్నారా? మీ అంచనా తప్పు. యాంటిలియాలో ఒక్క ఔట్ డోర్ ఏసీ కూడా లేదు. మరి భవనం అంతా చల్లగా ఉండటానికి ఏం చేశారంటే.. టెక్నాలజీ సాయంతో సెంట్రల్ కూలింగ్ సిస్టమ్ ఏర్పాటు చేశారు.
మ్యాజిక్ కూలింగ్ సిస్టమ్
సాధారణ ఎయిర్ కండీషనర్ ఉపయోగిస్తే భవనం అందం తగ్గిపోతుందని యాంటిలియాలో అత్యాధునిక సెంట్రలైజ్డ్ కూలింగ్ సిస్టమ్ ఏర్పాటు చేశారు. ఇది కూడా మనుషుల కోసం కాదు. పాలరాతి, పువ్వులు, ఇంటీరియర్ వస్తువులను కాపాడటానికి ప్రత్యేకంగా రూపొందించారు. సందర్శకులు ఎవరు వచ్చినా ఈ గది ఉష్ణోగ్రత మార్చరు.
నటి శ్రేయా ధన్వంతరి అనుభవం
టైమ్స్ నౌ నివేదిక ప్రకారం నటి శ్రేయా ధన్వంతరి ఒక ఫ్యాషన్ షూట్ కోసం కొన్నాళ్లు యాంటిలియాలో గడిపింది. ఆ సమయంలో తనకెదురైన అనుభవాన్ని పంచుకుంది. అక్కడ తనకు బాగా చలిగా అనిపించడంతో కాస్త ఏసీ తగ్గించమని చెప్పిందట. అయితే అక్కడి సిబ్బంది అందుకు ఒప్పుకోలేదు. వ్యక్తిగత సౌకర్యం కోసం కాకుండా వాస్తు, భవంతి నిర్వహణ కోసం ముందుగా నిర్ణయించిన ఉష్ణోగ్రత అవసరమని బిల్డింగ్ మేనేజర్ వివరించారని ఆమె చెప్పుకొచ్చింది.
27వ అంతస్తులో అంబానీ కుటుంబం
యాంటిలియా ఒక ఆకాశహర్మ్యం. ఇందులో హెలిప్యాడ్, స్నో రూమ్, స్పా, గుడి, ప్రైవేట్ థియేటర్, బాల్రూమ్, అనేక స్విమ్మింగ్ పూల్స్, ఐస్క్రీమ్ పార్లర్ ఉన్నాయి. అంబానీ కుటుంబ సభ్యులు 27వ అంతస్తులో నివసిస్తారు. దీనికి కారణం సహజ కాంతి, వెంటిలేషన్. 568 అడుగుల ఎత్తు నుండి అరేబియా సముద్రం అందమైన దృశ్యంలా కనిపిస్తుంది. ఇది తేమ, కాలుష్యం నుండి దూరంగా ఉంటుంది.
యాంటిలియాలో ఎవరు ఉంటారు?
యాంటిలియా పై అంతస్తులో ముఖేష్, నీతా అంబానీ నివసిస్తున్నారు. వారితో పాటు ఆకాష్, ఈషా, అనంత్, ఆకాష్ భార్య శ్లోకా మెహతా, అనంత్ భార్య రాధిక మర్చంట్ ఉంటారు. ఇక్కడ భద్రత చాలా కట్టుదిట్టంగా ఉంటుంది. పై అంతస్తుకు కుటుంబ సభ్యులు, నమ్మకమైన సహాయకులు మాత్రమే వెళ్లగలరు. యాంటిలియాలోని అత్యంత ప్రసిద్ధ సౌకర్యాలలో స్నో రూమ్ ఒకటి. ఇక్కడ గోడల నుండి కృత్రిమ మంచు ముక్కలు పడుతుంటాయి.
యాంటిలియా పేరు వెనుక కథ ఏమిటి?
యాంటిలియా పేరు పౌరాణిక ద్వీపం యాంటిలియా పేరు మీద పెట్టారు. నీతా అంబానీ షాండ్లియర్ల కంటే సూర్యరశ్మికి, ఫిల్టర్ చేసిన గాలి కంటే తాజా గాలికి ప్రాధాన్యత ఇస్తారు. అందుకే ఆమె తన కుటుంబంతో కలిసి ఆకాశహర్మ్యం పై అంతస్తులో నివసిస్తున్నారు.