యువతకు హార్ట్ ఎటాక్ ముప్పు.. ప్రమాదం తగ్గాలంటే ఇలా చేయాల్సిందే
ఒకప్పుడు పెద్దవయసు వారికే గుండెపోటు వచ్చేది. ఇప్పుడు యువతకు కూడా గుండెపోటు ముప్పు పెరిగింది. మరి యువతకు హార్ట్ ఎటాక్ ముప్పు తగ్గాలంటే ఏం చేయాలో ఇప్పుడు తెలుసుకుందాం..
ప్రపంచవ్యాప్తంగా ఎక్కువ మరణాలకు గుండె జబ్బులు ప్రధాన కారణమని సర్వేలు వెల్లడిస్తున్నాయి. అలాగే ఐదేండ్లుగా భారతదేశంలో కూడా గుండెపోటు మరణాల సంఖ్య పెరుగుతోంది. పేలవమైన జీవనశైలి, అలవాట్ల మార్పులతో ప్రపంచవ్యాప్తంగా కార్డియాక్ అరెస్ట్, గుండె సమస్యలు పెరుగుతున్నాయి. ఒకప్పుడు గుండెపోటును వృద్ధులకు మాత్రమే వ్యాధిగా భావించేవారు. కానీ ఇప్పుడు 30-40 ఏండ్ల మధ్య వయసున్న ప్రతి ఒక్కరూ గుండెపోటుతో బాధపడుతున్నారని ఆరోగ్య నిపుణులు చెబుతున్నారు. దీనికి ఎన్నో కారణాలు ఉన్నాయి. శారీరక శ్రమ లేకపోవడం, ఒత్తిడి, నిద్ర లేకపోవడం, స్మోకింగ్, ఆల్కహాల్, డయాబెటిస్, రక్తపోటు, ఊబకాయం వీటిలో ఉన్నాయి.
heart attack
ఇండియన్ హార్ట్ అసోసియేషన్ ప్రకారం.. దేశంలోని మొత్తం మరణాలలో హృదయ సంబంధ వ్యాధులు దాదాపు 28% ఉన్నాయి. గుండెపోటు ఎక్కువ మంది మరణాలకు ప్రధాన కారణం. ఏదేమైనా సరైన పోషణ, జీవనశైలి మార్పులతో గుండె జబ్బుల ప్రమాదాన్ని తగ్గించుకోవచ్చని పరిశోధనలు సూచిస్తున్నాయి. ఇందుకోసం ఏం చేయాలో ఇప్పుడు తెలుసుకుందాం..
సంతోషకరమైన జీవితం
గుండెను ఆరోగ్యంగా ఉంచడానికి సంతోషకరమైన, సంతృప్తికరమైన జీవితాన్ని గడపాలని నిపుణులు చెబుతున్నారు. మన గుండెను ఆరోగ్యంగా ఉంచడానికి ఎన్నో మార్గాలు ఉన్నాయి. వీటిలో ముఖ్యమైనది సమతుల్య, పోషకాలు ఎక్కువగా ఉండే ఆహారాలను తినడం. మీకు తెలుసా? మనం తీసుకునే ఆహారాలు గుండె జబ్బుల ప్రమాదాన్ని తగ్గిస్తాయి. అలాగే అధిక రక్తపోటు, చెడు కొలెస్ట్రాల్ స్థాయిలను నియంత్రిస్తాయి. అలాగే గుండెను ఫిట్ గా, బలంగా ఉంచుతాయి. అందుకే గుండె పోటు రిస్క్ ను తగ్గించుకోవడానికి హెల్తీ ఫుడ్ ను తినండి.
heart
పోషకాహారం
పోషకాహారానికి,గుండె ఆరోగ్యం మధ్య బలమైన సంబంధం ఉందని ఆరోగ్య నిపుణులు చెబుతున్నారు. సంతృప్త కొవ్వు, ట్రాన్స్ ఫ్యాట్స్, కొలెస్ట్రాల్, ఉప్పు, శుద్ధి చేసిన చక్కెరలు ఎక్కువగా ఉన్న ఫుడ్స్ గుండె జబ్బులు వచ్చే ప్రమాదాన్ని పెంచుతుంది. కాగా పండ్లు, కూరగాయలు, తృణధాన్యాలు, లీన్ ప్రోటీన్, ఒమేగా -3 కొవ్వు ఆమ్లాలు వంటి ఆరోగ్యకరమైన కొవ్వులు ఎక్కువగా ఉండే ఆహారం గుండె జబ్బుల ప్రమాదాన్ని తగ్గించడానికి సహాయపడుతుంది.
బ్రౌన్ రైస్, గోధుమ రొట్టె, క్వినోవా వంటి తృణధాన్యాలు ఎక్కువగా ఉండే ఆహారం గుండె జబ్బుల ప్రమాదాన్ని తగ్గించడానికి సహాయపడుతుందని నిపుణులు చెబుతున్నారు. తృణధాన్యాల్లో ఫైబర్, విటమిన్లు, ఖనిజాలు సమృద్ధిగా ఉంటాయి. అలాగే శరీరంలో పేరుకుపోయిన చెడు కొలెస్ట్రాల్ స్థాయిలను తగ్గించడానికి సహాయపడతాయి.
కొన్ని ఆహారాల్లో, సప్లిమెంట్లలో ఉండే కోఎంజైమ్ క్యూ 10, రెస్వెరాట్రాల్ వంటి యాంటీఆక్సిడెంట్లు గుండె పనితీరును మెరుగుపరుస్తాయి. అలాగే గుండెను రక్షిస్తాయని కనుగొన్నారు. పోషకాలు ఎక్కువగా ఉండే ఆహారాలు, న్యూట్రాస్యూటికల్స్ ను మన ఆహారంలో చేర్చడం వల్ల గుండె ఆరోగ్యంగా ఉంటుంది. అలాగే గుండె జబ్బుల ప్రమాదాన్ని తగ్గించడానికి ఇది సహాయపడుతుంది.
ప్రాసెస్ చేసిన, చక్కెర ఎక్కువగా ఉన్నఆహారాలను ఎక్కువగా తినకూడదు. అలాగే బరువును కంట్రోల్ లో ఉంచడానికి క్రమం తప్పకుండా శారీరక వ్యాయామంలో పాల్గొనాలి. వ్యాయామం గుండె జబ్బులు వచ్చే అవకాశాన్ని తగ్గించడానికి సహాయపడుతుందని అధ్యయనాలు చెబుతున్నాయి.