ఎండాకాలంలో చల్ల చల్లని చెరకు రసం.. తాగితే ఎన్ని లాభాలో..!
ఎండాకాలంలో చల్లగా ఉండే పానీయాలు మన శరీర ఉష్ణోగ్రతను తగ్గించడమే కాదు ఎన్నో ఆరోగ్య ప్రయోజనాలను కూడా కలిగిస్తాయి. ముఖ్యంగా చెరకు రసం..
చెరకు చక్కెర ఉత్పత్తిలో ఉపయోగించే ప్రధాన పంటలలో ఒకటి. ప్రపంచంలో ఉపయోగించే చక్కెరలో 70% వరకు చెరకు నుంచే తయారవుతుంది. మిగిలిన 30% చక్కెర దుంప పంట నుంచి వస్తుంది. అయితే బ్రెజిల్ తర్వాత చెరకు ఉత్పత్తిలో రెండవ ప్లేస్ లో భారత్ ఉంది. భారతదేశంలో పండించే చెరకులో చాలా భాగం మొదటగా బెల్లం తయారీకే ఉపయోగిస్తారు. ఆ తర్వాత శుద్ధి చేయని లేదా బ్రౌన్ షుగర్ కు ఉపయోగిస్తారు. ఆ తర్వాత రసాయనాలు, సల్ఫర్ ఉపయోగించి ప్రాసెస్ చేయబడిన చక్కెరను తయారుచేస్తారు. చెరకు 36 రకాలుగా లభిస్తుంది. చెరకులో కొవ్వులు మొత్తమే ఉండవు. ఇది 100 శాతం సహజ పానీయం. దీన్ని తాగడం వల్ల ఎన్నో ఆరోగ్య ప్రయోజనాలు కలుగుతాయి.
ముఖ్యంగా వేసవిలో చెరకు రసాన్ని ఖచ్చితంగా తాగాలని ఆరోగ్య నిపుణులు చెబుతున్నారు. రోజూ ఒక గ్లాసు చెరకు రసం తీసుకోవడం వల్ల ఎన్నో అనారోగ్య సమస్యలు దూరమవుతాయి. ఇది మనల్ని ఆరోగ్యంగా ఉంచడమే కాదు.. ఇది మీ శరీరానికి ఎన్నో విధాలుగా ప్రయోజనం చేకూరుస్తుందని నిపుణులు చెబుతున్నారు.
<p>sugarcane-juice</p>
చెరకులో ఉండే చక్కెర, ఫ్లేవనాయిడ్లతో కలిపి, గ్లైకోసైడ్లను ఏర్పరుస్తుంది. ఇవి మన శరీరంపై ఆల్కలీన్, యాంటీ ఇన్ఫ్లమేటరీ ప్రభావాలను కలిగి ఉంటాయి. ఇది మన కాలేయం, మూత్రపిండాలను ఆరోగ్యంగా ఉంచుతుంది. అలాగే శరీరంలో ఉన్న విషపదార్థాలను బయటకు పంపేందుకు సహాయపడుతుంది.
చెరకు రసం మీ కాలేయాన్ని బలోపేతం చేయడానికి ఎంతగానో సహాయపడుతుంది. ఇది కామెర్లను సహజంగా తగ్గిస్తుంది. వచ్చే ప్రమాదాన్ని కూడా తగ్గిస్తుంది. చెరకు రసంలోని యాంటీఆక్సిడెంట్లు కాలేయాన్ని సంక్రమణ నుంచి రక్షిస్తాయి. అలాగే బిలిరుబిన్ స్థాయిలను అదుపులో ఉంచుతుంది.
చెరకులోని సుక్రోజ్ మీ శరీరానికి కావాల్సిన సరైన మొత్తంలో శక్తిని ఇస్తుంది. ఇది రోజంతా మిమ్మల్ని ఎనర్జిటిక్ గా ఉంచుతుంది. ఆల్ఫా హైడ్రాక్సీ ఆమ్లాలలో ముఖ్యమైనది చెరకులోని గ్లైకోలిక్ ఆమ్లం. ఇది చర్మాన్ని ఆరోగ్యంగా, ప్రకాశవంతంగా ఉంచడానికి సహాయపడుతుంది.
ఒక గ్లాసు చెరకు రసంలో అల్లాన్ని కలిపి తాగితే గర్భిణులకు మార్నింగ్ సిక్ నెస్ తగ్గుతుంది. చెరకు రసంలో కాల్షియం, మెగ్నీషియం, ఇనుము పుష్కలంగా ఉంటాయి. క్రమం తప్పకుండా చెరకు రసాన్ని తీసుకోవడం వల్ల రోగనిరోధక శక్తి పెరుగుతుంది. ఖనిజ లోపం కూడా పోతుంది. చెరకు రసంలో అనేక ప్రయోజనాలు ఉన్నప్పటికీ.. చెరకు రసాన్ని తీసిన వెంటనే తాగాలి. ఎందుకంటే ఇది 15 నిమిషాల్లో ఆక్సీకరణం చెందుతుంది.