Diamond Rain: అక్కడ నీళ్లు కాదు, చిన్న చిన్న వజ్రాలు వానలా కురుస్తాయి.. ఎక్కడో తెలుసా?
Diamond Rain: నీళ్లు వానలా కురవడం సహజం. కానీ చిన్న చిన్న వజ్రాలు వర్షంలా కురుస్తాయి. ఇది ఎక్కడో కాదు… వేరే గ్రహంపై. శాస్త్రవేత్తలు దీన్ని కొత్తగా కనుగొన్నారు. అసలు ఆ గ్రహంపై వజ్రాలు ఎందుకు కురుస్తాయి.
అక్కడ వజ్రాల వాన
ఆకాశం నుంచి నీళ్లు వర్షంగా కురువడం మనందరికీ తెలిసిందే. మరికొన్నిచోట్ల చేపలు, కప్పలు కూడా వర్షంలా కురుస్తాయి. కానీ ఒకచోట చిన్న చిన్న వజ్రాలు వానలా కురుస్తాయి. ఎక్కడో తెలుసా? అంతరిక్షంలోని ఒక గ్రహంపై. శాస్త్రవేత్తలు అంతరిక్షంలో ఇలాంటి ఒక గ్రహాన్ని కనుగొన్నారు. ఇక్కడి కార్బన్ మేఘాలు వజ్రాలు ఏర్పడటానికి అనువైన పరిస్థితులను కలిగిఉన్నాయని శాస్త్రవేత్తలు గుర్తించారు.
Spacedaily.com ఇచ్చిన నివేదిక ప్రకారం ఈ గ్రహం పేరు PSR J2322-2650b. శాస్త్రవేత్తలు 2017లోనే పల్సర్ టైమింగ్ టెక్నిక్తో ఈ గ్రహాన్ని కనుగొన్నారు. అయితే, ఇటీవల జేమ్స్ వెబ్ స్పేస్ టెలిస్కోప్ దీని వాతావరణంపై పూర్తిస్థాయిలో అధ్యయనం చేసింది.
ఈ గ్రహం పరిమాణంలో బృహస్పతి పరిమాణంలో ఉంటుంది. కానీ దీని వాతావరణం, అందులోని పదార్థాలు చాలా ప్రత్యేకంగా మార్చాయి. ఇది 'చనిపోయిన నక్షత్రం' చుట్టూ తిరుగుతుండటంతో చాలా వేడిగా, ప్రమాదకరంగా ఉంటుంది. దీని వాతావరణంలో పూర్తిగా కార్బన్, హీలియం మాత్రమే ఉన్నాయి. భూమిపై ఉండే ఆక్సిజన్, నైట్రోజన్ లాంటివి ఇక్కడ లేవు. పొగ, మసి లాంటి కణాలతో నిండిన దీని వాతావరణం చాలా వింతగా ఉంటుంది.
ఎలా వజ్రాలు తయారవుతాయి?
ఈ కొత్త గ్రహంపై విపరీతమైన వేడి, తీవ్రమైన ఒత్తిడి ఉంటుంది. ఇక్కడ కార్బన్ డయాక్సైడ్ లాంటి కణాలు నెమ్మదిగా ఘనీభవించి వజ్రాలుగా మారతాయి. అందుకే శాస్త్రవేత్తలు ఇక్కడ 'వజ్రాల వర్షం' కురిసే అవకాశం ఉందని చెబుతున్నారు. అయితే, దీన్ని ప్రత్యక్షంగా శాస్త్రవేత్తలు చూడలేదు.
ఈ గ్రహం పుట్టుక రహస్యమే ఇప్పుడు శాస్త్రవేత్తలను ఎక్కువగా వేధిస్తోంది. కార్బన్తో నిండిన ఈ గ్రహం ఎలా ఏర్పడిందనే దానిపై వారికి ఇంకా స్పష్టత రాలేదు. సాధారణంగా గ్రహాలు ఏర్పడే పద్ధతికి ఇది ఎంతో భిన్నంగా ఉంది. ఈ గ్రహం ఎలా ఏర్పడిందో తెలుసుకోవడమే ఇప్పుడు శాస్త్రవేత్తల ముందున్న అతిపెద్ద సవాలు.
మనకు తెలియన విశ్వం
విశ్వంలో మనకు తెలియని ప్రపంచం ఎంతో ఉంది. ఇలాంటి గ్రహాలు ఇంకా ఎన్నో ఉన్నాయి. జేమ్స్ వెబ్ స్పేస్ టెలిస్కోప్ లాంటి టెక్నాలజీ.. ఇలాంటి రహస్య గ్రహాలను అర్థం చేసుకోవడానికి కొత్త దారులు చూపిస్తోంది. ఈ ఆవిష్కరణ అంతరిక్ష విజ్ఞానాన్ని ముందుకు తీసుకెళ్లడమే కాకుండా, మనం ఊహించిన దానికంటే ఈ విశ్వం చాలా వింతగా, అద్భుతంగా ఉందని నిరూపిస్తోంది.
