Snake : నీటిలో ఉండగా పాములు కాటు వేయలేవని అంటారు.. ఇందులో నిజమెంత?
మనం నీటిలో మునిగినప్పుడు వేగంగా కదలలేం.. నోరు తెరిస్తే కడుపులోకి నీళ్ళు చేరి ప్రాణాలుపోయే ప్రమాదం ఉంటుంది. సేమ్ ఇలాగే నీటిలోని పాముల పరిస్థితి ఉంటుందని.. అందుకే అవి నీటిలో ఉండగా కాటు వేయలేవని చాలామంది భావిస్తారు. నిజంగానే పాములు నీటిలో కాటు వేయలేవా?
నీటిలో పాములు కాటు వేయగలవా?
నీటిలో పాములు కాటు వేయలేవనేది ఒక పెద్ద అపోహ మాత్రమే. వాస్తవానికి పాములు నేలపై ఎలాగైతే మనుషులను కాటేస్తాయో అలాగే నీటిలో కూడా కాటు వేయగలవు. సాధారణంగా పాములు తమను తాము రక్షించుకోవడానికి లేదా ఆహారాన్ని పట్టుకోవడానికి నీటిలోనూ కాటు వేస్తాయి. గత ఏడాది హైదరాబాద్లోని ఒక్క ఉస్మానియా హాస్పిటల్ లోనే నీటిలో పాము కాటుకు గురైన 10కి పైగా కేసులు నమోదయ్యాయి. దీన్నిబట్టి నీటిలో కూడా పాములు యాక్టివ్ గా ఉంటాయని అర్థమవుతోంది.
పాము నీటిలో కూడా నమ్మశక్యం కాని వేగంతో దాడి చేస్తుంది… దాని పదునైన దంతాలతో విషాన్ని ఎక్కించగలదు. కాబట్టి నీటిలో పాము కాటు వేయదు అనే అపోహను నమ్మడం ప్రమాదకరం.. అది కనిపిస్తే చాలు ఎల్లప్పుడూ అప్రమత్తంగా ఉండాలి.
నీటి పాములు ఎన్ని రకాలు?
సాధారణంగా రెండు రకాల నీటి పాములు ఉంటాయి.
- మంచినీటి పాములు (freshwater snakes)
- సముద్ర పాములు (sea snakes).
మంచినీటి పాములు సాధారణంగా విషపూరితమైనవి కావు, కానీ కొన్ని విషపూరితమైన పాములు కూడా నీటిలో నివసిస్తాయి. ఉదాహరణకు కోబ్రా, రస్సెల్స్ వైపర్ వంటి పాములు కూడా ఆహారం కోసం లేదా ప్రమాదం నుండి తప్పించుకోవడానికి నీటిలోకి వస్తాయి. సముద్ర పాములు దాదాపు అన్నీ విషపూరితమైనవి, వాటి విషం చాలా శక్తివంతమైనది.
నీటిలో పాములు కాటు వేయడానికి కారణమిదే?
పాములు నీటిలో కాటు వేయడానికి ప్రధానంగా రెండు కారణాలున్నాయి... ఒకటి రక్షణ, రెండోది ఆహారం. పాములకు ముప్పు వాటిల్లినప్పుడు అవి తమను తాము రక్షించుకోవడానికి కాటు వేస్తాయి. మనం అనుకోకుండా వాటిని తొక్కడం లేదా వాటికి దగ్గరగా వెళ్లడం వంటివి వాటిని రెచ్చగొట్టవచ్చు.
ఆంధ్రప్రదేశ్ తీర ప్రాంతాల్లో నివసించే మత్స్యకారులు సముద్ర పాము కాటుకు తరచుగా గురవుతుంటారు, ఎందుకంటే అవి చేపల వలల్లో చిక్కుకుపోతాయి. అలాగే పాములు నీటిలో చేపలు, కప్పలు వంటి వాటిని వేటాడటానికి కూడా కాటు వేస్తాయి. అవి వేగంగా కదిలి తమ ఆహారాన్ని పట్టుకుంటాయి. ఈ ప్రవర్తన చాలా సహజం.
ప్రమాదకరమైన నీటి పాములను గుర్తించడం ఎలా?
కనిపించే ప్రతి నీటి పాము ప్రమాదకరం కాదు. విషపూరితమైన పాములను సాధారణంగా వాటి తల ఆకారం, రంగు, ప్రవర్తన ద్వారా గుర్తించవచ్చు. ఉదాహరణకు సముద్ర పాములకు చదునైన, తెడ్డు ఆకారపు తోక ఉంటుంది, ఇది ఈత కొట్టడానికి అనుకూలంగా ఉంటుంది. నల్లటి మచ్చలు లేదా చారలు ఉన్న పాములు మరింత జాగ్రత్తగా ఉండాలి. సాధారణంగా విషపూరిత పాముల తల త్రిభుజాకారంలో ఉంటుంది. అయితే పాములను గుర్తించడానికి ప్రయత్నించడం కంటే వాటి నుండి దూరంగా ఉండటమే ఉత్తమం.
పాము కాటుకు ప్రథమ చికిత్స
పాము కాటు నీటిలో సంభవిస్తే, వెంటనే ప్రాథమిక చికిత్స అందించాలి. గాయాన్ని సబ్బు, నీటితో శుభ్రం చేయాలి. కాటు వేసిన శరీర భాగాన్ని కదలకుండా ఉంచి, వీలైనంత త్వరగా సమీపంలోని ఆసుపత్రికి వెళ్లాలి ప్రభుత్వ హాస్పిటల్స్ లో పాముకాటుకు విరుగుడు మందు ఉంటుంది... దీన్ని వెంటనే ఇవ్వడంద్వారా ప్రాణాలు కాపాడవచ్చు. హైదరాబాద్లోని నిమ్స్ ఆసుపత్రిలో పాము కాటుకు ప్రత్యేక చికిత్సా విభాగం ఉంది... మరీ సీరియస్ అయితే ఇక్కడికి తరలించవచ్చు.
పాము కాటుకు గురైన వ్యక్తికి ధైర్యం చెప్పాలి, భయాన్ని తగ్గించాలి. కట్టు కట్టడం లేదా కోయడం వంటి పనులు చేయకూడదు. నీటిలో వెళ్ళేటప్పుడు, జాగ్రత్తగా ఉండాలి, నీటిలో అపరిచితులైన వస్తువులను తాకవద్దు. అవసరం లేకపోతే లోతైన నీటిలోకి వెళ్ళకపోవడం సురక్షితం. అప్రమత్తత చాలా అవసరం.
