మంచు విష్ణుపై యూట్యూబర్ల సంచలన ఆరోపణలు.. కన్నప్ప కోసం అలా చేస్తున్నారా ?

మంచు విష్ణు ప్రస్తుతం మా అధ్యక్షుడిగా కొనసాగుతున్నారు. అదే విధంగా భారీ బడ్జెట్ లో తన మార్కెట్ కి మించి కన్నప్ప అనే చిత్రాన్ని పాన్ ఇండియా స్థాయిలో నిర్మిస్తున్నారు. ఆల్రెడీ టీజర్ విడుదలయింది. కన్నప్ప శివభక్తుడు అనే సంగతి తెలిసిందే. 

ఎలాగైనా ఈ చిత్రం పాన్ ఇండియా స్థాయిలో విజయం సాధించేలా మంచు విష్ణు గట్టి ప్రయత్నమే చేస్తున్నాడు. ఇటీవల మంచు విష్ణు మా అధ్యక్షుడిగా ఒక సంచలన నిర్ణయం తీసుకున్నారు. టాలీవుడ్ సెలెబ్రిటీలని ట్రోల్ చేసే, అసభ్యకరమైన థంబ్ నెయిల్స్ పెట్టే వందలాది యూట్యూబ్ ఛానల్స్ పై చర్యలు తీసుకున్నారు. 

ఆ యూట్యూబ్ ఛానల్స్ పై విష్ణు స్ట్రైక్ వేయించి తొలగించారు. దీనితో యూట్యూబర్లు లబోదిబో మంటున్నారు. కొందరు యూట్యూబర్లు మంచు విష్ణుపై ఆరోపణలకి దిగారు. విష్ణు దిగజారి ప్రవర్తిస్తున్నారు అంటూ ఆరోపించారు. 

మీ యూట్యూబ్ ఛానల్స్ పై స్ట్రైక్ తొలగించాలంటే కన్నప్ప చిత్రంపై పాజిటివ్ గా వీడియో చేయాలి అని మంచు విష్ణుకి చెందిన 24 ఫ్రేమ్ ఫ్యాక్టరీ సంస్థ నుంచి మెయిల్ పెట్టారట. ఇంత దారుణంగా ప్రవర్తించడం ఏంటి అని యూట్యూబర్లు మంచు విష్ణుపై ఆరోపణలు చేస్తున్నారు. 

దీనిపై మంచు విష్ణు టీం వివరణ ఇచ్చింది. అవి ఫేక్ మెయిల్స్ అని తమకి ఏమాత్రం సంబంధం లేదు అని అంటున్నారు. ఇలా తమ ప్రతిష్టని దిగజార్చేలా ఫేక్ గా ప్రవర్తిస్తే చర్యలు తీసుకుంటాం అని మంచు విష్ణు హెచ్చరిస్తున్నారు.