శ్రీలీల ఓల్డ్ వీడియో వైరల్, కావాలనే కొందరు ఈ టైమ్ లో

శ్రీలీల గతంలో ఐటెం సాంగ్స్ చేయనని చెప్పినప్పటికీ, పుష్ప 2 లో స్పెషల్ సాంగ్ ఆఫర్ వచ్చిందని ప్రచారం జరుగుతోంది. ఈ ప్రచారంపై నెటిజన్లు స్పందిస్తూ, శ్రీలీల, అల్లు అర్జున్ ల డ్యాన్స్ టాలెంట్ ను ప్రశంసిస్తున్నారు.

Sreeleela, Allu Arjun,Sukumar, Rashmika Mandanna, Pushpa 2,

సోషల్ మీడియాలో కొన్ని చిత్రమైన విషయాలు చోటు చేసుకుంటూ ఉంటాయి. అక్కడ కొంతమంది జనం ఎప్పటికప్పుడు పాత వీడియోలను తవ్వి వైరల్ చేసే పనిలో ఉంటారు. ప్రతీ విషయమీదా స్పందిస్తూంటారు.

ముఖ్యంగా సెలబ్రెటీలు, సినిమా స్టార్స్ విషయాలు అంటే బాగా ఆసక్తి. ఆ విషయాలను ఫాలో అవుతూ స్పందిస్తూంటారు. ఇలా ఇప్పుడు శ్రీలీల పై వారి దృష్టి పడింది. శ్రీలల పాత వీడియో ఒకటి వైరల్ చేస్తున్నారు. ఎందుకు అంటే..

పెళ్లి సందడి సినిమాతో తెలుగు తెరకు పరిచయమైంది హీరోయిన్ శ్రీలీల. మొదటి సినిమాతోనే సెన్సెషన్ సృష్టించిన ఈ బ్యూటీకి ఆ తర్వాత వెంటనే ధమాకా సినిమాతో బ్లాక్ బస్టర్ హిట్ అందుకుంది.దీంతో తెలుగులో దాదాపు అరడజనుకు పైగా చిత్రాల్లో ఛాన్స్ కొట్టేసింది.

కానీ ఈ బ్యూటీకి వరుసగా ప్లాప్స్ రావడంతో కొన్ని రోజులపాటు సినిమాలకు బ్రేక్ ఇచ్చింది. అయితే శ్రీలీల సోషల్ మీడియాలో ఫుల్ యాక్టివ్ అయ్యింది. నిత్యం లేటేస్ట్ ఫోటోషూట్స్ షేర్ చేస్తూ ఫాలోవర్లను ఆకట్టుకుంటుంది. తాజాగా గ్లామర్ డోస్ పెంచేసింది హీరోయిన్ శ్రీలీల. ఈ క్రమంలో ఆమెకు పుష్ప 2 సినిమాలో స్పెషల్ సాంగ్ ఆఫర్ వచ్చిందని సమాచారం. గుంటూరు కారంలో మహేష్ తో పోటీగా ఆమె వేసిన స్టెప్స్ కు ఫిదా అయిన టీమ్ ఈ నిర్ణయానికి వచ్చారని సమాచారం. 

ఈ నేపధ్యంలో గతంలో ఆమె ఐటెం సాంగ్ లు చేయనని చెప్పిన వీడియో ఒకటి సోషల్ మీడియాలో వైరల్ చేస్తున్నారు. భగత్ సింగ్ కేసరి ప్రమోషన్ టైమ్ లో ఆమె మాట్లాడుతూ..స్పెషల్ సాంగ్ మీకు ఆఫర్ చేస్తే చేస్తారా అని మీడియావారు ఓ ఇంటర్వూలో  అడిగారు.

దానికి శ్రీలీల సమాధానం ఇస్తూ...తాను ఇలాంటివి చేయాలనుకోవటం లేదని చెప్పారు. విజ్జిపాప లాంటి పాత్రల్లో తాను తెరపై కనిపిస్తూ స్పెషల్ సాంగ్స్ చేస్తే బాగుండదని అన్నారు. అభిమానులు నన్ను అలా చూడటానికి ఇష్టపడరు అన్నట్లు గా చెప్పుకొచ్చింది. 

sreeleela

సుకుమార్‌ సినిమా అంటే స్పెషల్‌ సాంగ్స్‌కు ప్రత్యేక ఆకర్షణ ఉంటుంది. ఇప్పటివరకూ ఆయన తెరకెక్కించిన పలు సినిమాల్లోని.. ‘అ అంటే అమలాపురం’, ‘రింగ రింగా’, ‘జిగేల్‌ రాణి’ వంటి పాటలు సూపర్‌హిట్‌ అందుకున్నాయి.

‘పుష్ప ది రైజ్‌’లోని ‘ఊ అంటావా మావ’ గురించి ప్రత్యేకంగా చెప్పాల్సిన అవసరం లేదు. మాస్‌ అవతార్‌లో అల్లు అర్జున్‌, క్లాసీ లుక్‌లో సమంత స్టెప్పులు అందర్నీ ఎంతగానో ఆకట్టుకున్నాయి. ‘పుష్ప ది రూల్‌’లో కూడా అదేస్థాయిలో ఓ సాంగ్‌ ఉంటుందని ఇప్పటికే చిత్ర టీమ్ ప్రకటించింది. 

అయితే ఆ ఐటం సాంగ్ లో ఎవరు కనిపించనున్నారనే విషయంలో బాలీవుడ్‌ నటి శ్రద్ధాకపూర్‌ (Shraddha Kapoor)తోపాటు పలువురు స్టార్స్ పేర్లు వినిపించాయి. రెమ్యునరేషన్  కారణంగా శ్రద్ధాకపూర్‌ ఈ టీమ్‌లో భాగం కాలేకపోయారని సమాచారం. ఈక్రమంలోనే చిత్ర టీమ్ శ్రీలీలను సంప్రదించినట్లు తెలుస్తోంది.

ఈమేరకు జరుగుతోన్న ప్రచారంపై నెటిజన్లు స్పందిస్తున్నారు. వీరిద్దరికి డ్యాన్స్‌లో సూపర్‌ టాలెంట్‌ ఉంది. కాబట్టి ఈసారి థియేటర్లు దద్దరిల్లిపోవడం పక్కా అనుకుంటున్నారు. మరోవైపు అల్లు అర్జున్‌ - శ్రీలీల ఇప్పటికే ఓ యాడ్‌ కోసం వర్క్‌ చేశారనే విషయం తెలిసిందే. 

అల్లు అర్జున్‌ (Allu Arjun) హీరోగా సుకుమార్‌ (Sukumar) దర్శకత్వంలో తెరకెక్కుతోన్న చిత్రం ‘పుష్ప ది రూల్‌’ (Pushpa the Rule). 2021లో విడుదలైన ‘పుష్ప ది రైజ్‌’(Pushpa The Rise) కు సీక్వెల్‌గా వస్తోన్న  ఈ సినిమా కోసం ప్రపంచవ్యాప్తంగా ఉన్న సినీప్రియులు ఆసక్తిగా ఎదురుచూస్తున్నారు. 

ఎర్రచందనం స్మగ్లింగ్‌ నేపథ్యంలో ‘పుష్ప’ తీర్చిదిద్దారు. కూలీగా తన ప్రయాణాన్ని మొదలుపెట్టిన పుష్పరాజ్‌.. ఎర్రచందనం సిండికేట్‌ను శాసించే స్థాయికి ఎలా వెళ్లాడనే ఆసక్తికర అంశాలతో ‘పుష్ప ది రైజ్‌’ చిత్రీకరించారు. ఆ తర్వాత అతడికి ఎదురైన ఇబ్బందులు ఏమిటి? వాటిని ఎలా ఎదుర్కొన్నాడు? అనే అంశాలతో ‘పుష్ప ది రూల్‌’ సిద్ధమవుతోంది. ప్రస్తుతం ఇది షూటింగ్ దశలో ఉంది.