రజినీకాంత్, విజయ్‌ల పై పరోక్షంగా సెటైర్లు వేసిన రాధిక

కేరళ ముఖ్యమంత్రి పినరయి విజయన్ నేతృత్వంలో ఏర్పాటైన జస్టిస్ హేమా కమిటీ ఇటీవల 223 పేజీల నివేదికను విడుదల చేసింది. కేరళ చిత్ర పరిశ్రమలో చాలా మంది నటీమణులు లైంగిక వేధింపులకు గురవుతున్నారని ఆ నివేదికలో పలు సంచలన విషయాలు వెల్లడయ్యాయి. సినిమా అవకాశం కోసం వచ్చే మహిళలను లైంగికంగా వేధిస్తున్నారని ఆ నివేదికలో పలు ఆరోపణలు ఉన్నాయి.

ఇప్పటి వరకు కేరళ చిత్ర పరిశ్రమలోని 18 మంది నటులు, దర్శకులపై తొమ్మిది మందికి పైగా నటీమణులు ఫిర్యాదు చేశారు. 1991 నుంచి 2017 వరకు జరిగిన పలు లైంగిక వేధింపుల ఘటనలు ఇప్పుడు వెలుగులోకి వచ్చాయని చెప్పవచ్చు.

ఈ క్రమంలో ఈ వివాదంపై స్పందించిన ప్రముఖ నటి  రాధిక శరత్‌కుమార్, కేరళ చిత్ర పరిశ్రమలో నటీమణులు ఉపయోగించే కారవాన్లలో కూడా రహస్య కెమెరాలు అమర్చి వీడియోలు తీస్తున్నారంటూ  సంచలన విషయాలను వెల్లడించారు.

ఈ నేపథ్యంలో  ఓ ప్రైవేట్ కార్యక్రమంలో పాల్గొని మాట్లాడిన నటి రాధిక పలు విషయాలను ప్రస్తావించారు. ముఖ్యంగా కేరళ వివాదంపై రజనీకాంత్‌ను అడిగినప్పుడు, "నాకు ఏమీ తెలియదు" అని సమాధానం ఇచ్చారు. దీనిని ప్రస్తావిస్తూ రాధికను ప్రశ్నలు అడిగారు.

ఇక దీనిపై ఆమె మాట్లాడుతూ, "పెద్ద నటులు నిశ్శబ్దంగా ఉండటం వారిపై తప్పుడు అభిప్రాయాలకు దారితీస్తుంది. నేడు ఇండస్ట్రీలో అగ్రశ్రేణి నటులుగా ఎదిగిన వారందరికీ రాజకీయాల్లో ఆసక్తి ఉంది.

కాని మీరు రాజకీయాల్లోకి వచ్చి ప్రజలకు మంచి చేసే ముందు, మీతో కలిసి పనిచేసే మా నటీమణుల కోసం మీ గొంతు విప్పండి. అదే చాలా ముఖ్యం" అని ఆమె అన్నారు. "నటుల సంఘం ఏం చేస్తుందో తెలియదు, అలాగే ప్రముఖ నటీమణులే కాకుండా చిన్న చిన్న పాత్రల్లో నటించే నటీమణులకు కూడా రక్షణ కల్పించాలి.

ఇది ఖచ్చితంగా ఆ సినిమాను నిర్మిస్తున్న నిర్మాణ సంస్థ బాధ్యత. ఈ విషయంపై నేను నిర్మాతల సంఘంలో కూడా మాట్లాడాను. నటీమణులకు సురక్షితమైన కారవాన్, సురక్షితమైన వాష్‌రూమ్ వంటి వాటిని నిర్మాణ సంస్థ తమ బాధ్యతగా తీసుకుని అందించాలి" అని ఆమె కోరారు.