పూజా హెగ్డేకి మరో బంపర్‌ ఆఫర్‌.. సౌత్‌ స్టార్‌ హీరో సినిమాలో ఛాన్స్.. దశ తిరిగినట్టే?

బుట్టబొమ్మ పూజా హెగ్డేకి తెలుగులో ఆఫర్లు లేవు. ఆమెకి ఆఫర్లు వస్తున్నాయని అంటున్నారు కానీ క్లారిటీ లేదు. ఈ నేపథ్యంలో కోలీవుడ్‌లో బంపర్‌ ఆఫర్‌ అందుకుందట.  

టాలీవుడ్‌ బుట్ట బొమ్మ పూజా హెగ్డేకి ఇటీవల సరైన ఆఫర్లు లేవు. అదిగో, ఇదిగో అందులో ఆఫర్‌, ఇందులో ఆఫర్‌ అనే వార్తలే తప్ప, అధికారికంగా ఓకే అయ్యింది ఇప్పటి వరకు లేదు. ఈ నేపథ్యంలో ఓ కొత్త వార్త వినిపిస్తుంది. ఆమెకి, ఆమె అభిమానులకు ఖుషీ చేసే వార్త వైరల్‌ అవుతుంది. కోలీవుడ్‌లో బంపర్‌ ఆఫర్‌ అందుకుంది పూజా హెగ్డే. 

బుట్టబొమ్మ కెరీర్‌ కోలీవుడ్‌తోనే ప్రారంభమైంది. ఆమె మొదటి సినిమా అక్కడే చేసింది. జీవాతో కలిసి నటించింది. ఆ మూవీ పెద్దగా ఆకట్టకోలేదు. అనంతరం `ఒక లైకా కోసం`, `ముకుందా` కోసం టాలీవుడ్‌లోకి ఎంట్రీ ఇచ్చింది. తొలి చిత్రాలతోనే ఆకట్టుకుంది. సినిమాలు పెద్దగా ఆడకపోయినా పూజాని తెలుగు ఆడియెన్స్ ఆదరించారు. కానీ బాలీవుడ్‌లోకి ఎంట్రీ ఇచ్చింది బుట్టబొమ్మ. అక్కడ హృతిక్‌తో `మోయింజోదారో` చిత్రంలో నటించింది. ఈ మూవీ ఆడలేదు. 

ఇలా మూడు ఇండస్ట్రీలోన పూజాకి సక్సెస్‌ దక్కలేదు. దీంతో కొంత గ్యాప్‌ వచ్చింది. అనంతరం బన్నీ లైఫ్‌ ఇచ్చాడు. `డీజే` మూవీతో మళ్లీ తెలుగుకి తీసుకొచ్చారు. ఈ సినిమాబాగానే ఆడింది. ఈ చిత్రంతో పూజా పాపులర్‌ అయ్యింది. దీంతో ఆఫర్లు క్యూ కట్టాయి. తెలుగులో బిగ్‌ స్టార్స్ తో ఆఫర్లని అందుకుంది. స్టార్‌ హీరోయిన్‌ అయిపోయింది. గోల్డెన్‌ లెగ్‌గానూ, లక్కీ హీరోయిన్‌గానూ మేకర్స్ ప్రకటించేంతగా ఆమె నటించిన చిత్రాలు సక్సెస్‌ కావడం విశేషం. 

ఈ క్రమంలో పదేళ్లకి కోలీవుడ్‌ రీఎంట్రీ ఇచ్చింది పూజా. విజయ్‌తో `బీస్ట్` చిత్రంలో నటించింది. కానీ ఇది డిజాస్టర్‌ అయ్యింది. ఆ సమయంలో పూజా నటించిన సినిమాలన్నీ బోల్తా కొట్టాయి. `రాధేశ్యామ్‌`, `బీస్ట్`, `ఆచార్య`, హిందీ సినిమాలు కూడా పరాజయం చెందాయి. అంతే ఎంత స్టార్‌గా ఎదిగిందో ఒకేసారి పడిపోయింది. ఆర్నెళ్ల వ్యవధిలోనే పూజా కెరీర్‌ తలక్రిందులైంది. 

`గుంటూరు కారం`లో ఆఫర్‌ కోల్పోయింది. `ఉస్తాద్‌ భగత్‌ సింగ్‌` ఆఫర్‌ పోయింది. సాయిధరమ్‌ తేజ్‌తో చేయాల్సిన సినిమా ఆగిపోయింది. ఇలా అన్నీ దారులు మూసుకుపోయాయి. హిందీలోనూ రెండు సినిమాలు చేసింది. ఆ రెండూ డిజాస్టర్‌ అయ్యాయి. ఇలా ఒకేసారి జీరో అయ్యింది పూజా.  

ఏడాదిపాటు ఆమెకి సినిమాలు లేవనే చెప్పాలి. బాలీవుడ్‌లో ఓ మూవీ చేస్తుంది. `దేవా` అనే చిత్రంలో నటిస్తుంది. ఇప్పుడు అదిగో ఆఫర్లు, ఇదిగో ఆఫర్లు అనే వార్తలు వస్తున్నాయి. ఈ క్రమంలో ఆమె మరో కోలీవుడ్‌ ఆఫర్‌ అందుకుందట. సూర్యతో జోడీగా నటించే ఛాన్స్ వరించినట్టు తెలుస్తుంది. కార్తీక్‌ సుబ్బరాజు దర్శకత్వంలో ఓ మూవీ చేస్తున్నారు సూర్య. తన 44వ చిత్రంగా ఇది రూపొందుతుంది. ఇందులో హీరోయిన్‌గా పూజాని ఫైనల్‌ చేశారట. ప్రస్తుతం ఆ వార్త నెట్టింట వైరల్‌ అవుతుంది. ఇది పాన్‌ ఇండియా మూవీగా తెరకెక్కుతుంది. 

`సూర్య 44` షూటింగ్ జూన్ 2న అండమాన్ దీవులలో ప్రారంభమవుతుంది. అండమాన్ దీవులు, ఊటీ, తమిళనాడులోని ఇతర ప్రదేశాలలో 40 రోజుల సుదీర్ఘ షెడ్యూల్‌ను ప్లాన్‌ చేసింది టీమ్‌. ఈ చిత్రంలో మలయాళ నటుడు జోజు జార్జ్ ఒక ముఖ్యమైన పాత్రలో కనిపించనున్నారు. 2డి ఎంటర్‌టైన్‌మెంట్, స్టోన్ బెంచ్ ఫిల్మ్స్ సంయుక్తంగా నిర్మిస్తున్న ఈ చిత్రానికి సంతోష్ నారాయణన్ సంగీతం  అందిస్తున్నారు. 

ఇదిలా ఉంటే పూజా హెగ్డే `దేవర` లో ఐటెమ్‌ సాంగ్‌ చేస్తుందనే వార్తలు వస్తున్నాయి. దీనిపై క్లారిటీ రావాల్సి ఉంది. అలాగే `టిల్లు క్యూబ్‌` సినిమా కూడా రాబోతుంది. `టిల్లు స్వ్కెర్‌`కి మరో సీక్వెల్‌గా దీన్ని తెరకెక్కించబోతున్నారు. ఇందులో హీరోయిన్‌గా ఈ సారి పూజాని తీసుకోవాలనుకుంటున్నారట. వీటిపై క్లారిటీ రావాల్సి ఉంది. ఇవన్నీ నిజంగానే వస్తే పూజా హెగ్డే దశ తిరిగిందనే చెప్పొచ్చు.