జనసేన స్ట్రాంగ్ గా లేదు, పరిస్థితి బాగోలేని పార్టీని భుజాన మోయలేం... బండ్ల గణేష్ సంచలన వ్యాఖ్యలు

పవన్ కళ్యాణ్ భక్తుడు బండ్ల గణేష్ జనసేన పార్టీపై నెగిటివ్ కామెంట్స్ చేస్తాడు అంటే నమ్మ గలమా. కానీ బండ్ల గణేష్ జనసేన పార్టీ బలాబలాలను ప్రస్తావిస్తూ కొన్ని సంచలన వ్యాఖ్యలు చేశాడు. అక్కడ జనసేన పార్టీ బలహీనంగా ఉందని కుండబద్దలు కొట్టాడు.  

బండ్ల గణేష్ వ్యాఖ్యలు తరచుగా సంచలనం రేపుతూ ఉంటాయి. టాపిక్ ఏదైనా బండ్ల తనకు మనసులో తోచింది చెప్పేస్తాడు. ఒక్కోసారి వెనుకా ముందు ఆలోచించకుండా మాట్లాడేస్తాడు. బండ్ల కామెంట్స్ తరచుగా వైరల్ అవుతూ ఉంటాయి. 

ఇక రెండు నెలల క్రితం ప్రకాష్ రాజ్ కి మద్దతుగా మీడియా ముఖంగా వ్యాఖ్యలు చేసిన బండ్ల గణేష్, సడన్ గా ప్లేట్ మార్చారు. వచ్చే నెలలో అధ్యక్ష ఎన్నికలు జరుగుతుండగా ప్రకాష్ రాజ్ ప్యానల్ కి వ్యతిరేకంగా జనరల్ సెక్రటరీ పదవికి పోటీపడుతున్నట్లు వెల్లడించారు.

తన ఈ నిర్ణయానికి కారణం, జీవితా రాజశేఖర్ ప్రకాష్ రాజ్ ప్యానెల్ లో చేరడమే అని బండ్ల తెలిపారు. జీవిత రాజశేఖర్ గతంలో తాను ఆరాధించే మెగా ఫ్యామిలీపై అనుచిత వ్యాఖ్యలు చేశారని, అందుకే ఆమెతో ఎన్నికలలో పోటీపడుతున్నట్లు బహిరంగంగా వెల్లడించారు. 

ఆ విషయం అలా ఉంచితే.. తాజా ఇంటర్వ్యూలో బండ్ల గణేష్ తెలంగాణాలో జనసేన పార్టీ గురించి చేసిన వ్యాఖ్యలు ఆ పార్టీ డై హార్డ్ ఫ్యాన్స్ హర్ట్ అయ్యేలా ఉన్నాయి. మిగతా పార్టీలను బెంజ్, ఆడి కార్లతో పోల్చిన బండ్ల.. జనసేన మారుతి 800 అంటూ సంచలనానికి తెరలేపారు. 

బండ్ల గ‌ణేశ్ మాట్లాడుతూ ''నేను మొదట నుంచి కాంగ్రెస్ వాదిని. నా కంటే గొప్ప అభిమానులు, నాయ‌కులు ప‌వ‌న్ క‌ళ్యాణ్‌గారి వెంట ఉన్నారు. ఆంధ్ర ప్రాంతంలో జ‌న‌సేన స్ట్రాంగ్‌గా ఉంది. తెలంగాణ విష‌యానికి వ‌స్తే.. ఇక్క‌డ‌న్న బెంజికార్లు, ఆడికార్లు ఉన్న‌ప్పుడు మారుతి 800 న‌డ‌ప‌మంటే ఎలా న‌డుపుతాం. వాస్త‌వాలు మాట్లాడుకుంటే తెలంగాణ‌లో ఇత‌ర పార్టీల‌కంటే జ‌న‌సేన ప్ర‌భావం త‌క్కువ‌గానే ఉంది. అలాంటి పార్టీని భుజాన వేసుకుని మోయ‌గ‌లిగే శ‌క్తి, సామ‌ర్థ్యం నాకు లేదు. ప‌వ‌న్ క‌ళ్యాణ్‌ను ముఖ్య‌మంత్రి కావాల‌ను కోరుకునే వాళ్ల‌లో నేను ఒక‌డిని. ఆయ‌న‌తో సినిమా చేశాను. ఇప్పుడు ఆయ‌న్ని సినిమా చేయ‌మ‌ని నేను అడ‌గ‌లేదు. ఆయ‌న ఇస్తే త‌ప్ప‌కుండా సినిమా తీస్తాను. నాకు ప‌ది వ్యాపారాలున్నాయి. సినిమా ఒక్క‌టే వ్యాపారం కాదు'' అన్నారు.

బండ్ల గణేష్ మాట్లాడింది వాస్తవమే అయినా... పార్టీ బలహీనతను పబ్లిక్ గా ఎదగట్టిన తీరు జన సైనికులను బాగా హర్ట్ చేసినట్లు తెలుస్తుంది. దీనితో పవన్ అభిమానులు బండ్ల తీరు పట్ల అసహనంగా ఉన్నారట. 

మరో వైపు బండ్ల గణేష్ హీరోగా ఓ మూవీ తెరకెక్కుతుంది. తమిళ్ హిట్ మూవీ రీమేక్ గా తెరకెక్కుతున్న ఈ మూవీ షూటింగ్ మొదలైంది.