నాగార్జున కెరీర్ ని మలుపు తిప్పిన చిత్రం.. ఏఎన్నార్ ఫస్ట్ రియాక్షన్ ఇదే, కారు డ్రైవ్ చేస్తూ..

కింగ్ నాగార్జున ఇటీవల కొన్ని వ్యవహారాలతో వార్తల్లో నిలుస్తున్నారు. వివాదాస్పద అంశాలు సోషల్ మీడియాలో పెద్ద రచ్చ చేస్తున్నాయి. ఒకటి ఎన్ కన్వెన్షన్ వివాదం కాగా మరొకటి కొండా సురేఖ చేసిన వ్యాఖ్యలు. ఇది పక్కన పెడితే నాగార్జున ప్రస్తుతం సినిమాలు, బిగ్ బాస్ షోతో బిజీగా ఉన్నారు. 

బిగ్ బాస్ షోకి నాగార్జున హోస్ట్ గా చేస్తున్న సంగతి తెలిసిందే. ఏఎన్నార్ వారసుడిగా నాగార్జున చిత్ర పరిశ్రమలో అడుగుపెట్టారు. ఆరంభంలో కొన్ని హిట్లు, కొన్ని ఫ్లాపులు ఎదురయ్యాయి కానీ అక్కినేని వారసుడిగా నాగార్జున ఇమేజ్ పెంచే చిత్రం పడలేదు. 1990లో రామ్ గోపాల్ వర్మ దర్శకత్వంలో తెరకెక్కిన శివ చిత్రం నాగార్జున కెరీర్ నే మార్చేసింది. 

నాగార్జునని స్టార్ గా నిలబెట్టిన చిత్రం శివ. అప్పట్లో శివ చిత్రం సృష్టించిన సంచలనాలు అన్నీ ఇన్నీ కావు. శివ చిత్రం విడుదలై నేటికి 35 ఏళ్ళు పూర్తయింది. దీనితో నాగార్జున ఈ చిత్రాన్ని సోషల్ మీడియాలో గుర్తు చేసుకున్నారు. నాగార్జున ట్వీట్ చేస్తూ.. శివ చిత్రం విడుదలై 35 ఏళ్ళు పూర్తయింది. ఆ రోజు నాన్నగారితో కలసి కారు డ్రైవ్ చేయడం మరచిపోలేని అనుభూతి. సినిమా చూడగానే టాలీవుడ్ లో బిగ్గెస్ట్ హిట్స్ లో ఒకటిగా నిలుస్తుంది అని నాన్నగారు చెప్పారు. ఆయన చెప్పినట్లే శివ చిత్రం గొప్ప విజయం సాధించింది. 

ఇన్నేళ్ల తర్వాత కూడా ప్రేక్షకులు శివ చిత్రం పై అభిమానం చూపిస్తున్నారు. వాళ్లందరికీ కృతజ్ఞతలు. ఈ చిత్రాన్ని అద్భుతంగా తెరక్కించిన దర్శకుడు రాంగోపాల్ వర్మకి.. ఇంత పెద్ద విజయాన్ని అందించిన అభిమానులకు ప్రత్యేక కృతజ్ఞతలు అని నాగార్జున తెలిపారు. నాగార్జున పోస్ట్ కి రాంగోపాల్ వర్మ రిప్లై ఇచ్చారు. శివ లేకుంటే నేను లేను.. నా పై నమ్మకం ఉంచి ఈ అవకాశం ఇచ్చిన నాగార్జునకి కృతజ్ఞతలు అని వర్మ ట్వీట్ చేశారు.