టీ షర్ట్ నుండి టీ గ్లాస్ వరకు.. కమల్ హాసన్ ఫోటో వాడితే ఇక అంతే సంగతులు?
సౌత్ స్టార్ హీరో కమల్ హాసన్, తన పేరు, ఫోటో, గుర్తింపులను అనుమతి లేకుండా వాణిజ్యపరంగా వాడుకోవడాన్ని వ్యతిరేకిస్తూ చెన్నై హైకోర్టులో కేసు వేశారు. దీనివల్ల లైసెన్స్ లేకుండా తన గుర్తింపును వాడేవాళ్లు చట్టపరమైన చిక్కులను ఎదుర్కోవాల్సి వస్తుంది.
కమల్ హాసన్ షాకింగ్ నిర్ణయం..
సినిమా, రాజకీయం, నిర్మాణ రంగాల్లో బిజీగా ఉన్నాడు సౌత్ స్టార్ కమల్ హాసన్. ఆయన తాజాగా తీసుకున్న ఒక చట్టపరమైన నిర్ణయం.. అందరిని కలవరపెడుతోంది. చిన్న వ్యాపారుల నుండి పెద్ద కంపెనీల వరకు అందరినీ ఆశ్చర్యపరిచింది. తన అనుమతి లేకుండా తన పేరు, ఫోటో, గుర్తింపులను వాడేవారిపై ఆయన చెన్నై హైకోర్టులో కేసు వేశారు.
నా కష్టంతో వ్యాపారం చేస్తున్నారు..
చెన్నైకి చెందిన ఒక ప్రైవేట్ కంపెనీ, కమల్ హాసన్ ఫోటో, ఆయన సినిమాల్లోని ఫేమస్ డైలాగులను టీ-షర్టులపై ప్రింట్ చేసి అమ్ముతోంది. దీనిపై తీవ్ర అసంతృప్తి చెందిన కమల్, "నా కష్టంతో వచ్చిన గుర్తింపును, నా అనుమతి లేకుండా వ్యాపార లాభం కోసం వాడుకోవడం చట్టవిరుద్ధం" అని కోర్టును ఆశ్రయించారు. ఈ కేసు ద్వారా, ఇకపై టీ-షర్టులే కాదు, టీ గ్లాసులు, కీ-చైన్లు, పోస్టర్లపై కూడా తన గుర్తింపును వాడకుండా నిషేధం కోరారు.
తప్పుడు ప్రచారాలకు వాడకూడదని
సాధారణంగా చూస్తే ఇది చిన్న విషయంగా అనిపించొచ్చు. కానీ, దీని వెనుక ఉన్న కారణాలు చాలా ముఖ్యమైనవి. ఒక వస్తువుపై నటుడి ఫోటో ఉంటే, ఆ వస్తువును ఆయనే సిఫార్సు చేస్తున్నారని ప్రజలు నమ్మే అవకాశం ఉంది. ఇది ఆ నటుడి ప్రతిష్టకు భంగం కలిగించవచ్చు. ప్రస్తుత AI కాలంలో, ఒకరి గొంతు, ముఖంతో ఏదైనా సృష్టించవచ్చు. భవిష్యత్తులో తన గొంతు లేదా రూపాన్ని తప్పుడు ప్రచారాలకు వాడకూడదని కమల్ గట్టిగా ఉన్నారు. ఒక సెలబ్రిటీ తన గుర్తింపును ఎలా వాడుకోవాలో నిర్ణయించుకునే పూర్తి హక్కు ఆయనకే ఉంటుంది. దాన్ని ఉల్లంఘించే వారిపై చట్టపరమైన చర్యలకే ఈ కేసు.
టాలీవుడ్ హీరోల బాటలో కమల్ హాసన్..
ఈ కేసుతో, ఇకపై లైసెన్స్ లేకుండా కమల్ హాసన్ పేరు, ఫోటో, 'లోకనాయకుడు' అనే బిరుదును వాడితే చట్టపరమైన చిక్కులు ఎదుర్కోవాల్సి వస్తుంది. చిరంజీవి, పవన్ కళ్యాణ్, ఎన్టీఆర్, అమితాబ్ బచ్చన్, రజినీకాంత్ లాంటి స్టార్ హీరోలు నటులు ఇప్పటికే ఇలాంటి రక్షణ పొందగా, ఇప్పుడు కమల్ కూడా ఆ జాబితాలో చేరారు. ఇకపై దుకాణాల్లో లేదా ఆన్లైన్లో కమల్ హాసన్కు సంబంధించిన వస్తువులు అమ్మే ముందు సరైన అనుమతి ఉందో లేదో చూసుకోవాలి. లేదంటే, కోర్టు చిక్కుల్లో పడతారు!
కమల్ హాసన్ కు ఫుల్ సపోర్ట్..
కమల్ హాసన్ తీసుకున్న ఈ నిర్ణయం, అభివృద్ధి చెందుతున్న డిజిటల్ ప్రపంచంలో ఒక కళాకారుడి శ్రమను, గుర్తింపును కాపాడటానికి చాలా ముఖ్యమైనదిగా భావిస్తున్నారు. ఈ కేసు విచారణ చెన్నై హైకోర్టులో త్వరలో జరగనుంది. దీనిపై ఎలాంటి తీర్పు వస్తుందో చూడాలి. అయితే ఈ విషయంలో కమల్ కు అన్ని వర్గాల నుంచి ఫుల్ సపోర్ట్ లభిస్తోంది. ఇప్పటిక వరకూ ఇలాంటి కేసులు వేసిన స్టార్స్ కు పాజిటీవ్ గానే తీర్పు వచ్చింది.
