`మెగాస్టార్` గా కళ్యాణ్‌ రామ్‌.. మొదలైన మెగా, నందమూరి ఫ్యాన్స్ వార్.. `బింబిసార` దెబ్బకి మైండ్ బ్లాక్

నందమూరి కళ్యాణ్‌ రామ్‌(Kalyan ram) హీరోగా నటించిన `బింబిసార`(Bimbisara) చిత్రం శుక్రవారం(ఆగస్ట్ 5న) విడుదలై పాజిటివ్‌ టాక్‌ని తెచ్చుకుంటుంది. సినిమాకి మంచి ఓపెనింగ్స్ వస్తున్నాయి. నందమూరి ఫ్యాన్స్ పండగ చేసుకుంటున్నారు. దాదాపు ఏడేళ్ల తర్వాత హిట్‌ కొట్టాడు కళ్యాణ్‌ రామ్‌. `బింబిసార` హిట్‌ టాక్‌ వస్తోంది. దీంతో నందమూరి ఫ్యాన్స్(Nandamuri Fans) సంబరాల్లో మునిగితేలుతున్నారు. చిత్ర బృందం కూడా ఆనందాల్లో మునిగి తేలుతుంది. 
 

ఇదిలా ఉంటే నందమూరి ఫ్యాన్స్ ఈ సందర్భంగా రెచ్చిపోతున్నారు. హిట్‌ వచ్చిన ఆనందంలో ఇతర హీరోలను టార్గెట్‌ చేస్తూ పోస్ట్ లు పెడుతున్నారు. అంతేకాదు తమ హీరోని ఆకాశానికి ఎత్తేస్తున్నారు. అందులో భాగంగా ఇప్పుడు ఏకంగా కళ్యాణ్‌ రామ్‌కి `మెగాస్టార్‌` అనే ట్యాగ్‌ని ఇస్తుండటం విశేషం. `మెగాస్టార్‌కళ్యాణ్‌రామ్‌` (#MegastarKalyanRam) అనే యాష్‌ ట్యాగ్‌ని ట్విట్టర్‌లో ట్రెండ్‌ చేస్తున్నారు. చిరంజీవి(Chiranjeevi) కంటే కళ్యాణ్‌ రామ్‌ బెటర్‌ అంటూ మెగా ఫ్యామిలీని టార్గెట్‌ చేస్తున్నారు అభిమానులు. 

చిరంజీవి రీమేక్‌ల హీరో అని, ఆయనకు రీమేక్‌లతో విజయాలు వచ్చి మెగా స్టార్‌ అయ్యారని పోస్ట్‌ లు పెడుతూ వైరల్‌ చేస్తున్నారు. అదే సమయంలో నందమూరి హీరోలు రీమేక్‌లకు దూరమని చెబుతున్నారు. అందుకు నిదర్శనమే `బింబిసార` అంటున్నారు. ఇంకోవైపు `ఆచార్య`(Acharya)కి, `బింబిసార`ని పోలుస్తూ, `ఆచార్య` బెనిఫిట్‌ షోస్‌లు చాలా చోట్ల ఫుల్‌ కాలేదని, కానీ `బింబిసార` ప్రదర్శించిన అన్ని చోట్ల హౌజ్‌ ఫుల్‌ అంటున్నారు. 

మరోవైపు నందమూరి హీరోలు బ్యాక్‌ టూ బ్యాక్‌ హిట్లు కొడుతున్నారట. బాలయ్య(Balakrishna) `అఖండ`తో, ఎన్టీఆర్‌(NTR) `ఆర్‌ఆర్‌ఆర్‌`(RRR)తో, కళ్యాణ్‌ రామ్‌ `బింబిసార`తో వరుస బ్లాక్‌ బస్టర్ హిట్స్ కొట్టారని సంబరాలు చేసుకుంటున్నారు నందమూరి అభిమానులు. 

అదే సమయంలో మెగా హీరోలు వరుస ఫ్లాప్‌ సినిమాలు చేస్తున్నారని కామెంట్లు చేస్తున్నారు. అందుకు `ఆచార్య` చిత్రాన్ని ప్రధానంగా చూపిస్తున్నారు. పవన్‌, చిరు, రామ్‌చరణ్‌లు ఒకటే బ్యాచ్‌ అంటూ సెటైర్లు పేలుస్తున్నారు. బింబిసార రీమేక్‌ రైట్స్ కోసం చిరంజీవి కళ్యాణ్‌ రామ్‌ని అప్రోచ్‌ అవుతున్నారంటూ కామెంట్లు చేస్తున్నారు. 
 

మరోవైపు ఎంతో సహనంతో ఉంటున్న మెగా ఫ్యాన్స్ సైతం దీటుగా బదులిస్తున్నారు. ఒక్క హిట్‌తోనే మెగాస్టారా?. ఇలాంటివి ఇంకెన్ని కావాలి? అని కామెంట్లు చేస్తున్నారు. ఏడేళ్లకి హిట్‌ వస్తే ఇంత రచ్చా అంటూ నందమూరి ఫ్యాన్స్ కి ఎదురు కామెంట్లు చేస్తున్నారు. మొత్తంగా ఇప్పుడు మెగా, నందమూరి ఫ్యాన్స్ మధ్య వార్‌ పీక్‌కి చేరిందని చెప్పొచ్చు.