రాజమౌళికి మొగుడొచ్చాడు, కృష్ణుడిగా మహేష్, మహాభారతంతో కంప్లీట్ మూవీ.. కామెంట్స్ పై నాగ్ అశ్విన్ రియాక్షన్

యంగ్ రెబల్ స్టార్ ప్రభాస్ నటించిన కల్కి 2898 AD చిత్రం రెండవ వారంలో కూడా అద్భుతమైన వసూళ్లతో దుసుకుపోతోంది. మరోసారి ప్రభాస్ కి బాహుబలి స్థాయి విజయం దక్కింది అని అంతా అంటున్నారు. మహాభారతంలోని అంశాలని, కలియుగంతో ముడిపెడుతూ నాగ్ అశ్విన్ సృష్టించిన సైన్స్ ఫిక్షన్ కథ అద్భుతంగా వర్కౌట్ అయింది. 

ఇంతటి ఘనవిజయం తర్వాత డైరెక్టర్ నాగ్ అశ్విన్ తొలిసారి తెలుగు మీడియాతో మాట్లాడారు. మీడియా ప్రతినిధులు అడిగిన ప్రశ్నలకు సమాధానం ఇచ్చారు. కల్కి చిత్రం రిలీజ్ కాగానే.. ఇంతటి భారీ చిత్రాన్ని నాగ్ అశ్విన్ అద్భుతంగా తెరకెక్కించడంతో అంతా రాజమౌళికి మొగుడొచ్చాడు అంటూ కామెంట్స్ పెట్టడం మొదలు పెట్టారు. 

ఓ మీడియా ప్రతినిధి దీని గురించి అడగగా.. అలా ఎవరూ అనలేదు.. మీరే అంటున్నారు అంటూ సమాధానం ఇచ్చాడు. మరో మీడియా ప్రతినిధి ఈ చిత్రంలో కృష్ణుడి పాత్ర గురించి ప్రశ్నించారు. ప్రతి ఒక్కరూ కల్కి పార్ట్ 2లో శ్రీకృష్ణుడిగా మహేష్ బాబు నటిస్తే బావుంటుంది అని అంటున్నారు. 

మహేష్ ని కృష్ణుడిగా చూపిస్తారా అని ప్రశ్నించారు. మహేష్ గారు కృష్ణుడిగా కనిపిస్తే నిజంగా బావుంటుంది. కానీ ఇందులో కాదు మరో సినిమా చేయాలి అని నాగ్ అశ్విన్ తెలిపారు. 

మహాభారతాన్ని ఇందులో సైన్స్ ఫిక్షన్ తో మిక్స్ చేసి చూపించారు. ఇలా ఫిక్షనల్ గా కాకుండా భవిష్యత్తులో మహాభారతంపై కంప్లీట్ మూవీ చేసే ఆలోచన ఉందా అని ప్రశ్నించగా నాగ్ అశ్విన్ ఇప్పటికి ఆ ఆలోచన లేదని అన్నారు. 

చాలా మంది మీడియా ప్రతినిధులు.. ఈ కల్కి చిత్రంలో జరిగిన తప్పులు.. కర్ణుడిని పాజిటివ్ గా చూపించడం లాంటి అంశాల గురించి ప్రశ్నించారు. నేను నిజంగా మహాభారతం, రామాయణం మూవీ చేస్తే అప్పుడు వస్తావ కథకి లోబడి సినిమా చేయాలి. కానీ నేను ఇందులో ఇంతవరకు జరగని అంశాలు చూపించాను అని నాగ్ అశ్విన్ అన్నారు.