యోగి ఆదిత్యనాథ్ కాళ్ళు మొక్కిన వివాదం, రజనీపై ట్రోల్స్..దిమ్మతిరిగే సమాధానం ఇచ్చిన హరీష్ శంకర్

రజనీకాంత్ ఉత్తర ప్రదేశ్ ముఖ్యమంత్రి యోగి ఆదిత్యనాథ్ ని కలవడం.. ఆయన పాదాలకు నమస్కరించడం తీవ్ర వివాదం గా మారింది. ముఖ్యంగా ఈ ఘటనపై తమిళనాడులో పెద్ద చర్చే జరుగుతోంది.

సూపర్ స్టార్ రజనీకాంత్ జైలర్ చిత్రంతో ఫ్యాన్స్ ఆకలి మొత్తం తీర్చేశాడు. రజనీ క్లీన్ హిట్ అందుకుని చాలా ఏళ్ళు గడుస్తోంది. తలైవా బాక్సాఫీస్ పై పంజా విసిరితే చూసి మురిసిపోవాలని ఫ్యాన్స్ ఎప్పటి నుంచో ఎదురుచూస్తున్నారు. వారి ఎదురుచూపులు జైలర్ చిత్రంతో ఫలించాయి. ఆగష్టు 10న విడుదలైన జైలర్ చిత్రం రజనీకాంత్ స్టామినా నిరూపించే విధంగా బాక్సాఫీస్ వద్ద గర్జిస్తోంది. పది రోజులు గడుస్తున్నా బాక్సాఫీస్ వద్ద జైలర్ సునామి ఆగడం లేదు. 

10 రోజుల్లోనే ఈ చిత్రం వరల్డ్ వైడ్ గా 500 కోట్ల మార్క్ ని అందుకుంది. కానీ సూపర్ స్టార్ రజనీ వీటన్నింటికి అతీతం. సినిమా రిలిజ్ కాగానే తలైవా ప్రశాంతత కోసం హిమాలయాలకు వెళ్లారు. అక్కడ అనేక పుణ్యక్షేత్రాలని రజనీ సందర్శించారు. రాజకీయ ప్రముఖులతో కూడా సూపర్ స్టార్ సమావేశం అవుతున్నారు. 

ఈ నేపథ్యంలో రజనీకాంత్ ఉత్తర ప్రదేశ్ ముఖ్యమంత్రి యోగి ఆదిత్యనాథ్ ని కలవడం.. ఆయన పాదాలకు రజనీకాంత్ నమస్కరించడం తీవ్ర వివాదం గా మారింది. ముఖ్యంగా ఈ ఘటనపై తమిళనాడులో పెద్ద చర్చే జరుగుతోంది. రజనీకాంత్ పై తీవ్రంగా ట్రోలింగ్ జరుగుతోంది. రజనీ తమిళుల ఆత్మగౌరవాన్ని నార్త్ ఇండియా పొలిటీషియన్ కాళ్ళ దగ్గర భంగపరిచారు అంటూ విమర్శలు వెల్లువెత్తుతున్నాయి. 

మరికొందరు రజనీకాంత్ స్థాయి వ్యక్తి ఒక ముఖ్యమంత్రి కాళ్లపై పడడం ఏంటి అని కూడా అంటున్నారు. బిజెపి పెద్దల మెప్పు కోసం రజనీ ఆత్మగౌరవాన్ని తాకట్టు పెట్టినట్లు విమర్శిస్తున్నారు. దీనిపై వివిధ కోణాల్లో విమర్శలు చెలరేగుతున్నాయి. టాలీవుడ్ క్రేజీ డైరెక్టర్ హరీష్ శంకర్ ఈ వివాదంపై తనదైన శైలిలో స్పందించారు. ట్రోలర్స్ కి దిమ్మతిరిగే సమాధానం ఇస్తూ సూపర్ స్టార్ చేసిన చర్యని సమర్ధించారు. 

ప్రముఖ ఫిలిం క్రిటిక్ ఈ వివాదంలో రజనీని సమర్థించారు. యోగి ఆదిత్యనాథ్ కేవలాం ముఖ్యమంత్రి మాత్రమే కాదు.. ఆయన హిందూ స్వామీజీ కూడా. గోరఖ్ నాథ్ క్షేత్రానికి ఆయన పీఠాధిపతి. పీఠాధిపతులని, స్వామీజీలని కలసినప్పుడు వాళ్లకి పాదాభివందనం చేసి ఆశీర్వాదం తీసుకోవడం మన ఆచారం. ఆ కోణంలో రజనీకాంత్.. యోగి ఆదిత్యనాథ్ కాళ్ళకి నమస్కరించారు. యోగి ఆదిత్యనాథ్ ముఖ్యమంత్రి కాబట్టి రజనీకాంత్ అలా చేయలేదు. అది పూర్తిగా రజనీకాంత్ వ్యక్తిగత విషయం అని ఫిలిం క్రిటిక్ అన్నారు. 

ఫిలిం క్రిటిక్ వ్యాఖ్యలతో డైరెక్టర్ హరీష్ శంకర్ ఏకీభవించారు. అవును అది పూర్తిగా వ్యక్తిగత నిర్ణయం. ఈ ఘటనలో విమర్శంచడానికి ఎవరికీ ఏ హక్కూ లేదు. సూపర్ స్టార్ ఎప్పుడూ తన సింప్లిసిటీ తో సర్ప్రైజ్ చేస్తూనే ఉంటారు. అందుకే ఆయన తలైవా అయ్యారు అంటూ హరీష్ శంకర్ ట్వీట్ చేసారు.