పవన్ కోసం త్రివిక్రమ్ కొత్త స్కెచ్.. ఏకంగా నలుగురు రంగంలోకి, 20 రోజుల్లో 60 కోట్లు ప్లస్ లాభాల్లో వాటా..

వకీల్ సాబ్, భీమ్లా నాయక్ తర్వాత పవన్ కళ్యాణ్ మరో రీమేక్ చిత్రానికి ఒకే చెప్పారు. తమిళంలో విజయం సాధించిన వినోదయ సీతం చిత్ర తెలుగు రీమేక్ లో పవన్, సాయిధరమ్ తేజ్ కలసి నటించబోతున్నారు. 

సినిమాల విషయంలో పవన్ కళ్యాణ్ గ్యాప్ తీసుకునేలా లేరు. ప్రస్తుతం చేస్తున్న సినిమాలు కాకుండా పవన్ మరో చిత్రానికి సైన్ చేశారు. తమిళంలో విజయం సాధించిన వినోదయ సీతం అనే చిత్ర రీమేక్ కి పవన్ కళ్యాణ్ ఒకే చెప్పారు.ఈ మూవీ లో మరో లీడ్ రోల్ లో మెగా మేనల్లుడు సాయి ధరమ్ తేజ్ నటించబోతున్నాడు. 

పవన్ కళ్యాణ్ వరుసగా రీమేక్స్ చేస్తుండడంతో అభిమానులకు కూడా కాస్త ఇబ్బందిగా మారింది. వకీల్ సాబ్, భీమ్లా నాయక్ తర్వాత మరో రీమేక్ అని అంగీకారం తెలపడం.. అందులోనూ  వినోదయ సీతం అనే సాఫ్ట్ సినిమా కావడంతో అభిమానులు ససేమిరా అంటూ సోషల్ మీడియాలో పోస్ట్ లు పెడుతున్నారు. పవన్ కళ్యాణ్ రీమేక్ లకు స్వస్తి చెప్పాలని కోరుతున్నారు. కానీ పవన్ మాత్రం వెనక్కి తగ్గడం లేదు. అతిత్వరలో ఈ చిత్రం అధికారికంగా లాంచ్ కాబోతున్నట్లు తెలుస్తోంది.

కానీ ఈ సినిమా కోసం నిర్మాతలు పోటీ పడుతుండడం చూస్తుంటే మైండ్ బ్లోయింగ్ అనిపించక మానదు. వినోదయం సీతం రీమేక్ అనగానే ఫ్యాన్స్ నో అంటున్నారు. ఇది సాఫ్ట్ మూవీ.. వద్దు అని కామెంట్స్ పడుతున్నారు. కానీ నిర్మాతలు మాత్రం ఈ చిత్రం కోసం పవన్ కి రికార్డ్ స్థాయిలో రెమ్యునరేషన్ ఇచ్చేందుకు రెడీ అయిపోయారు. ఒకరు ఇద్దరు కాదు ఏకంగా నాలుగు నిర్మాణ సంస్థలు ఈ చిత్రం కోసం రంగంలోకి దిగుతున్నాయి. 

జీ నెట్వర్క్, పీపుల్స్ మీడియా ఫ్యాక్టరీ, పవన్ కళ్యాణ్ క్రియేటివ్ వర్క్స్, త్రివిక్రమ్ కి చెందిన ఫార్చ్యూన్ 4 సినిమాస్ బ్యానర్స్ లో ఈ చిత్రం నిర్మాణం కానుంది. ఇదంతా త్రివిక్రమ్ స్కెచ్ అని అంటున్నారు. భీమ్లా నాయక్ చిత్రాన్ని కూడా త్రివిక్రమ్ వెనుక ఉండి నడిపించారు. కేవలం పవన్ కళ్యాణ్ 20 రోజుల కాల్ షీట్స్ కోసం నిర్మాతలు 60 కోట్ల రికార్డ్ రెమ్యునరేషన్ ముట్టజెప్పబోతున్నట్లు టాక్. కొసమెరుపు ఏంటంటే రెమ్యునరేషన్ కాకుండా పవన్ లాభాల్లో 20 శాతం వాటా కూడా తీసుకోబోతున్నారట. 

టాలీవుడ్ లో పవన్ కళ్యాణ్ బిగ్గెస్ట్ క్రౌడ్ పుల్లర్. కోవిడ్ సమయంలో వకీల్ సాబ్ లాంటి రీమేక్ చిత్రానికి జనం ఎగబడేలా చేశాడు పవన్. మాస్ ఎలిమెంట్స్ ఉన్నప్పటికీ తెలుగు కమర్షియాలిటీ కి భిన్నంగా ఉండే భీమ్లా నాయక్ చిత్రం పవన్ క్రేజ్ తో 100 కోట్లకు సమీపంలో వసూళ్లు రాబట్టింది. 

పవన్ సత్తా గుర్తెరిగిన నిర్మాతలు ఆయన అడిగినంత పారితోషికం ఇచ్చేందుకు రెడీ అయిపోయారు. అది కూడా వినోదయ సీతం లాంటి రీమేక్ చిత్రానికి. తమిళంలో ఈ చిత్రం సముద్రఖని స్వీయ దర్శకత్వంలో తెరకెక్కింది. ఈ చిత్రానికి విమర్శకుల ప్రశంసలు లభించాయి. అయ్యప్పన్ కోషియం చిత్రాన్ని ఉన్నది ఉన్నట్లుగా తెలుగులో రీమేక్ చేస్తే పరిస్థితి ఎలా ఉంటుందో ఊహించుకోవచ్చు. అలాంటి సినిమాలో కూడా త్రివిక్రమ్ హీరోయిజం రాబట్టారు. సో వినోదయ సీతంరీమేక్ విషయంలో కూడా పవన్ ఫ్యాన్స్ వర్రీ కావాల్సిన అవసరం లేదు. త్రివిక్రమ్ పై నమ్మకం పెట్టుకోవచ్చు. 

ఇదిలా ఉండగా పవన్ కళ్యాణ్ ప్రస్తుతం క్రిష్ దర్శకత్వంలో 'హరి హర వీరమల్లు' చిత్రాన్ని ఫినిష్ చేసే పనిలో ఉన్నాడు. త్వరలో హరీష్ శంకర్ డైరెక్షన్ లో 'భవదీయుడు భగత్ సింగ్' చిత్రం కూడా ప్రారంభం కానుంది.