మరోసారి ట్రోలర్స్ బారిన పడ్డ ప్రభాకర్‌ కొడుకు.. స్వామి మాలలో ఉండి ఇదేం యాటిట్యూడ్‌ అంటూ నెటిజన్ల రచ్చ

ఈటీవీ ప్రభాకర్‌గా పాపులర్‌ అయిన ప్రభాకర్‌ ఇటీవల తన కుమారుడు చంద్రహాస్‌ని హీరోగా పరిచయం చేస్తూ ఓ సినిమాని ప్రారంభించిన విషయం తెలిసిందే. ప్రారంభోత్సవం రోజే ట్రోలర్స్ బారిన పడ్డారు చంద్రహాస్‌. ఫోటోల్లో యాటిట్యూడ్‌ చూపిస్తూ కనిపించాడని, చూడ్డానికి నిత్యానంద స్వామిలా ఉన్నాడని రకరకాలుగా కామెంట్లతో రెచ్చిపోయారు నెటిజన్లు. దారుణంగా ట్రోల్స్ చేశారు. ఆ దెబ్బకి తండ్రి ప్రభాకర్‌ స్పందించి రిక్వెస్ట్ చేసుకోవాల్సి వచ్చింది. 
 

ఎంట్రీతోనే ఇంతటి చర్చ ఏ హీరోకి జరగలేదు. జరగదు కూడా. కానీ ప్రభాకర్‌ కొడుకుపై జరిగింది. ఆయనపై నెగటివ్‌ కామెంట్లు వినిపించినా, పరోక్షంగా అది పాపులారిటీని తీసుకొచ్చిందని చెప్పొచ్చు. అది పరోక్షంగా హీరో సినిమాకి ప్రమోషన్‌ తెచ్చిపెట్టినట్టయ్యింది. దీంతో నటుడు, డైరెక్టర్‌ ప్రభాకర్‌ కూడా లైట్‌ తీసుకున్నారు. సైలైంట్‌ అయ్యారు.
 

ఆ తర్వాత మీడియాకి దూరమైన చంద్రహాస్‌ ఇప్పుడు మరోసారి హాట్‌ టాపిక్‌గా మారాడు. సోషల్‌ మీడియాలో ఆయన ఫోటోలు ఇప్పుడు రచ్చ రచ్చ చేస్తున్నాయి. స్వామి మాలలో ఉన్న చంద్రహాస్‌ పోజులు ఇప్పుడు నెటిజన్ల విమర్శలకు కారణమవుతుంది. మరోసారి చర్చనీయాంశంగా మారాడు చంద్రహాస్‌.

తాజాగా ప్రభాకర్‌ తనయుడు చంద్రహాస్‌ అయ్యప్ప స్వామి మాలలో ఉన్నాడు. తాజాగా ఆయన ఇన్‌స్టాగ్రామ్‌లో కొన్ని ఫోటోలను పంచుకున్నారు. కొత్త కారు కొన్న విషయాన్ని, అలాగే ఫ్యామిలీతో కలిసి ఆధ్యాత్మిక టూర్‌కి వెళ్తున్నట్టుగా విషయాన్ని షేర్‌ చేసుకుంటూ ఫోటోలను పోస్ట్ చేశాడు చంద్రహాస్‌. ప్రస్తుతం ఇవి వైరల్‌ అవుతున్నాయి.

అయితే ఇందులో చంద్రహాస్‌ ఇచ్చిన పోజులు వివాదంగా, విమర్శలకు తావిస్తుంది. తన కొత్త కారుపై ఆయన ఇచ్చిన స్టయిలీష్‌ పోజులు చూసి నెటిజన్లు కామెంట్లు చేస్తున్నారు. ఇందులోనూ ఆయన యాటిట్యూడ్‌ చూపిస్తున్నారని నెటిజన్లు సెటైర్లు పేలుస్తున్నారు. స్వామి మాలలో ఉండి ఇలాంటి పిచ్చి వేశాలేంటి స్వామి.. మాలలోనూ ఇలాంటి యాటిట్యూడ్‌ ఏంటని ప్రశ్నిస్తున్నారు. స్వామి మాల వేసినా యాటిట్యూడ్‌ తగ్గించుకోవా అంటూ కామెంట్లు చేస్తున్నారు. 

ఇదిలా ఉంటే మరికొందరు స్వామి మాల వేసి మా నోళ్లు మూయించావని, లేదంటూ ఈ సారి గట్టిగా అయిపోయేవాడివని సముదాయించుకుంటున్నారు. అయ్యప్ప భక్తులు ఇలా చేస్తారా? అని ప్రశ్నిస్తున్నారు. ఆయన ఫోటోలను, ఆయన యాటిట్యూడ్‌గా అనిపించిన పిక్స్ కి మీమ్స్ జోడిస్తూ మరింత రచ్చలేపుతున్నారు నెటిజన్లు. దీంతో మరోసారి సోషల్ మీడియాలో హాట్‌ టాపిక్‌ అయ్యాడు చంద్రహాస్‌. 

మరోవైపు ప్రభాకర్‌ని కూడా ఆడుకుంటున్నారు నెటిజన్లు. ప్రభాకర్‌, చంద్రహాస్‌ కలిసి ఫ్యామిలీతో టూర్‌ ఫోటోలు పంచుకున్నారు. ఇందులో వారి ఫ్యామిలీతో కలిసి ఫోటోలు దిగారు. ఆడవాళ్లని తాకుతూ ప్రభాకర్‌, చంద్రహాస్‌ కనిపించారు. దీంతో స్వామి మాలలో ఉన్నప్పుడు ఆడవాళ్లని తాక కూడదు స్వామి. కనీసం ఇది కూడా తెలియదా అంటూ విమర్శిస్తున్నారు. 

మరికొందరు నెటిజన్లు వారికి సపోర్ట్ గా నిలుస్తున్నారు. కొత్తగా ఇండస్ట్రీలోకి వస్తున్న కుర్రాడు, టీనేజ్‌ బాయ్‌.. సరదాగా ఏదో చేయాలనుకుంటాడు. కానీ దాన్ని విమర్శడం సరికాదని, టీనేజ్‌లో ఇలాంటివి కామనే అంటున్నారు. ఏం చేసినా ట్రోల్‌ చేయడం ఆపండని మద్దతు పలుకుతున్నారు. ఏదేమైనా ఇప్పుడు ప్రభాకర్‌, ఆయన కుమారుడు సోషల్‌ మీడియాకి మంచి కంటెంట్‌ ఇస్తున్నారని చెప్పడంలో అతిశయోక్తి లేదు. 
 

ఇక చంద్రహాస్‌ హీరోగా పరిచయం అయిన చిత్రానికి కృష్ణ దర్శకత్వం వహిస్తున్నారు. దీంతోపాటు ఏవీఆర్‌ మూవీ వండర్స్ సంపత్‌ వి రుద్ర దర్శకత్వంలో ఓ సినిమా, ప్రభాకర్‌ సొంత నిర్మాణ సంస్థ శ్రీ సుమనోహర ప్రొడక్షన్స్ లో మరో సినిమా చేస్తున్నాడు. ప్రస్తుతం ఎంట్రీతోనే మూడు సినిమాలు లైనప్‌లో ఉండటం విశేషమనే చెప్పాలి. మొత్తానికి ప్రభాకర్‌ తన కుమారుడిని హీరోగా నిలబెట్టేందుకు గట్టిగానే ప్రయత్నాలు చేస్తున్నారని చెప్పొచ్చు.