అల్లు అర్జున్ ఫ్యాన్స్ కి సీఎం రేవంత్ రెడ్డి భారీ షాక్!

అల్లు అర్జున్ అరెస్ట్ వెనుక సీఎం రేవంత్ రెడ్డి హస్తం ఉందంటూ ఓ వాదన తెరపైకి వచ్చింది. పుష్ప 2 సక్సెస్ మీట్ లో అల్లు అర్జున్ సీఎం రేవంత్ రెడ్డి పేరు మరచారు. తన ప్రసంగంలో రేవంత్ రెడ్డి పేరు ఆయనకు టక్కున గుర్తుకు రాలేదు. ఈ పరిణామం సీఎం రేవంత్ రెడ్డి ఇగోని హర్ట్ చేసింది. అందుకే అల్లు అర్జున్ అరెస్ట్ కి తెరలేపారంటూ..  అభిమానులు కామెంట్స్ పోస్ట్స్ పెట్టారు. 

శని, ఆదివారాలు కోర్టుకు సెలవులు. అందుకే శుక్రవారం అరెస్ట్ చేయించారనే వాదన గట్టిగా వినిపించింది. సీఎం రేవంత్ రెడ్డిని విమర్శిస్తూ, కించపరుస్తూ అల్లు అర్జున్ ఫ్యాన్స్ చేసిన పోస్ట్స్ పై తెలంగాణా సర్కార్ సీరియస్ అయ్యింది. ఐడీలను గుర్తించి సైబర్ కేసులు పెడుతున్నారు. దీంతో అల్లు అర్జున్ ఫ్యాన్స్ కి బిగ్ షాక్ తగినట్లు అయ్యింది.  

డిసెంబర్ 4వ తేదీ రాత్రి హైదరాబాద్ లోని సంధ్య థియేటర్ వద్ద జరిగిన తొక్కిసలాట ఘటనలో మహిళ మృతి చెందిన సంగతి తెలిసిందే. దీనిపై తెలంగాణ పోలీసులు క్రిమినల్ కేసులు నమోదు చేశారు. అల్లు అర్జున్ పేరు ఏ11 గా చేర్చారు. డిసెంబర్ 12న అల్లు అర్జున్ అరెస్ట్ అయ్యారు. ఆయనకు నాంపల్లి కోర్టు 14 రోజుల రిమాండ్ విధించింది. అల్లు అర్జున్ తరపు న్యాయవాదులు హైకోర్టును ఆశ్రయించారు. మధ్యంతర బెయిల్ కోసం పిటిషన్ దాఖలు చేశారు. వైసీపీ ఎంపీ అడ్వకేట్ నిరంజన్ రెడ్డిని రంగంలోకి దించారు. 
 

ఆయన వాదనలతో ఏకీభవించిన కోర్టు అల్లు అర్జున్ కి 4 వారాల మధ్యంతర బెయిల్ మంజూరు చేసింది. దాంతో అల్లు అర్జున్ ఫ్యాన్స్ ఊపిరి పీల్చుకున్నారు. జైలుకు వెళ్లే పరిస్థితి నుండి అల్లు అర్జున్ బయటపడ్డారని భావించారు. అయితే ఒకరోజు రాత్రి అల్లు అర్జున్ చంచల్ గూడ జైలులో గడపాల్సి వచ్చింది. హైకోర్టులో వాదనలు జరుగుతుండగానే.. కింది కోర్టు తీర్పు మేరకు అల్లు అర్జున్ ని చంచల్ గూడ జైలుకి తరలించారు. కోర్టు బెయిల్ మంజూరు చేసిన క్రమంలో ఆర్డర్ కాపీ.. జైలు అధికారులకు అందాల్సి ఉంది. ఆ కాపీ మాకు సకాలంలో అందలేదన్న కారణం చూపుతూ అల్లు అర్జున్ ని జైలులో ఉంచారు. 

పేపర్ వర్క్ పూర్తి చేసి మరుసటి రోజు ఉదయం విడుదల చేశారు. అయితే అల్లు అర్జున్ ని ఉద్దేశపూర్వకంగా ఒక రాత్రి జైలులో ఉంచారనే విమర్శలు ఉన్నాయి. ఇక మధ్యంతర బెయిల్ మీద విడుదలైన అల్లు అర్జున్ రెగ్యులర్ బెయిల్ కోసం పిటిషన్ వేయాల్సి ఉంది. జైలు నుండి విడుదలయ్యాక అల్లు అర్జున్ సమీపంలో గల మామయ్య చంద్రశేఖర్ రెడ్డి ఇంటికి వెళ్లారు. అనంతరం అల్లు అర్జున్ నేరుగా గీతా ఆర్ట్స్ ఆఫీస్ కి వచ్చాడు. అక్కడ చాలా సమయం గడిపారు. 

దిల్ రాజుతో పాటు పలువురు చిత్ర ప్రముఖులు అల్లు అర్జున్ ని కలిశారు. గీతా ఆర్ట్స్ ఆఫీస్ నుండి నేరుగా అల్లు అర్జున్ తన నివాసానికి వెళ్ళాడు. అల్లు అర్జున్ అక్కడ మీడియాతో మాట్లాడారు. రేవతి మృతి దురదృష్టకరం. ఇలాంటి సంఘటనలు జరగకూడదు. నేను బాగానే ఉన్నాను. ఆందోళన చెందాల్సిన అవసరం లేదు. ఇది నాకు, నా కుటుంబ సబ్యులకు కఠిన సమయం. నాకు న్యాయవ్యవస్థపై నమ్మకం ఉంది. కేసు కోర్టులో ఉంది. కాబట్టి నేనేమీ మాట్లాడలేను. నాకు అండగా నిలిచిన అభిమానులకు ధన్యవాదాలు, అన్నారు.