చిరంజీవి, వెంకటేష్‌, సుమన్‌, బోయపాటి.. సీనియర్‌ నటి ప్రభ కుమారుడి పెళ్లిలో తారల సందడి..

అలనాటి నటి ప్రభ తన కుమారుడి పెళ్లి గ్రాండ్ గా జరిగింది. ప్రభ కుమారుడి వివాహం బుధవారం ఉదయం హైదరాబాద్‌లో జరిగింది. పెళ్లి కార్యక్రమంలో చాలా మంది తారలు పాల్గొని సందడి చేశారు. 

నటి ప్రభ.. సీనియర్ హీరోల సరసన హీరోయిన్‌గా చాలా సినిమాల్లో పనిచేసింది. నటిగా, క్లాసిక్ డాన్సర్‌గా రాణించింది. తాజాగా ఆమె తనకు కుమారుడి పెళ్లి చేసింది. ప్రభ కుమారుడు రాజా రమేష్‌ వివాహం హైదరాబాద్‌లోని గండిపేటలో గల గోల్కొండ రిసార్ట్స్ లో జరిగింది. 

ఈ వివాహ వేడుకకి చాలా మంది సెలబ్రిటీలు కదిలి రావడం విశేషం. వీరిలో ప్రధానంగా సీరియర్‌ హీరోలు చిరంజీవి, వెంకటేష్‌, సుమన్‌, దర్శకుడు బోయపాటి, మురళీ మోహన్‌, సాయికుమార్‌, బెల్లంకొండ సురేష్‌ పాల్గొన్నారు. 

వీరితోపాటు నందమూరి రామకృష్ణ, మోహనకృష్ణ, నిర్మాత దామోదర ప్రసాద్, ప్రసన్న కుమార్, ఎస్వీకృష్ణారెడ్డి, అచ్చిరెడ్డి, మల్లిడి సత్యనారాయణరెడ్డి, నిరసింహారావు, రేలంగి నరసింహారావు, రోజా రమణి, అన్నపూర్ణమ్మ, రజత, కృష్ణవేణి, శివ పార్వతితోపాటు ఇతర ఇతర ప్రముఖులు, రాజకీయ నాయకులు పాల్గొన్నారు. నూతన వధువరులను ఆశీర్వదించారు.

ప్రభ కుమారుడి వివాహ వేడుకలో ఏపీ టీడీపీ నాయకుడు అల్లపాటి రాజా కూడా పాల్గొన్నారు. తన సహచరులతో కలిసి ఆయన నూతన వధు వరులను ఆశీర్వదించారు. 

స్వర్గీయ దేవ భక్తుని రమేష్‌, ప్రభ దంపతుల కుమారుడు రాజా రమేష్‌ అమెరికాలో జాబ్‌ చేస్తున్నాడు. అక్కడే స్థిరపడ్డాడు. ఆయనకు విజయవాడకి చెందిన స్వర్గీయ విజయ్‌ రామ్‌ రాజు వేదగిరి, శిరీష దంపతుల కుమార్తె సాయి అపర్ణతో వివాహం జరిగింది. ప్రభకి ఒక్కడే కుమారుడు. 

నటి ప్రభ.. ఒకప్పుడు ఎన్టీఆర్‌, ఏఎన్నార్‌, శోభన్‌బాబు, కృష్ణ, కృష్ణంరాజు, మురళీ మోహన్‌, చంద్రమోహన్‌, మోహన్‌బాబు, కమల్‌ మాసన్‌, చిరంజీవి వంటి హీరోల సరసన హీరోయిన్‌గా చేసి మెప్పించింది. ఆమె తెలుగుతోపాటు తమిళం, కన్నడ, మలయాళంలోనూ దాదాపు రెండు వందల చిత్రాల్లో నటించింది.