‘బిల్లా’ రీ రిలీజ్.. థియేటర్లలో ఫ్యాన్స్ రచ్చ.. 4కే షోస్ లో దర్శకుడు, ప్రభాస్ చెల్లెలు సందడి!

యంగ్ రెబల్ స్టార్ ప్రభాస్ పుట్టిన రోజు వేడుకలను ఈ రోజు అభిమానులు ఘనంగా నిర్వహిస్తున్నారు. డార్లింగ్ బర్త్ డే సెలబ్రేషన్స్ ను పండగలా జరుపుతున్నారు. ప్రస్తుతం రీ-రిలీజ్ ల ట్రెండ్ కొనసాగుతుండటంతో డార్లింగ్ నటించిన ‘బిల్లా’ను థియేటర్లలో రిలీజ్ చేశారు. 
 

దర్శకుడు మెహర్ రమేశ్ (Meher Ramesh) - ప్రభాస్ కాంబినేషన్ లో వచ్చిన చిత్రం ‘బిల్లా’(Billa). అనుష్క, హన్సిక, నమిత హీరోయిన్లుగా అలరించారు. క్రిష్ణం రాజు కూడా ముఖ్య పాత్ర పోషించారు. ఈ చిత్రం అప్పట్లో పెద్దగా ఆడకపోయినా.. యాక్షన్ పరంగా ప్రభాస్ అభిమానులను ఫిదా చేసింది. మూవీలో డార్లింగ్ అటిట్యూడ్ నెక్ట్స్ లెవల్లో ఉంటుంది.
 

ప్రభాస్ పుట్టిన రోజు సందర్భంగా ఇప్పటికే అక్టోబర్ 15న ‘రెబల్’ చిత్రాన్ని థియేటర్లలో గ్రాండ్ గా రిలీజ్ చేశారు. ఈరోజు బిల్లా 4కే వెర్షన్ ను రీ రిలీజ్ చేశారు. తెలుగు రాష్ట్రాల్లోని మెయిన్ మెయిన్ సెంటర్లలో ‘బిల్లా’ విడుదల కావడంతో అభిమానులు రచ్చ రచ్చ చేస్తున్నారు. థియేటర్లు ఫుల్ అవడంతో పాటు ఫ్యాన్స్ గోలతో దద్దరిల్లిపోతున్నాయి.

హైదరాబాద్ లోని ఆర్టీసీ క్రాస్ రోడ్స్ లోని థియేటర్లు మొత్తం ఉదయమే ఫుల్ అయ్యాయి. ఈ సెలబ్రేషన్స్ లో దర్శకుడు మెహెర్ రమేశ్ కూడా ఫ్యాన్స్ తో కలిసి ఎంజాయ్ చేశారు. అలాగే ప్రభాస్ సోదరి, క్రిష్ణం రాజు పెద్ద కూతురు ప్రసీద (Praseeda) కూడా థియేటర్ లో ప్రభాస్ అభిమానులతో కలిసి సందడి చేసింది. 
 

ఇక అభిమానులు ఆనందానికి అవధుల్లేవనే చెప్పాలి. థియేటర్ల వద్ద డార్లింగ్ బర్త్ డే సందర్భంగా మాస్ సెలబ్రేషన్స్ తో రచ్చ చేస్తున్నారు. ఏకంగా థియేటర్లలో షర్ట్స్ విప్తేస్తూ మరీ హంగామా చేస్తున్నారు. పవన్, మహేశ్ అభిమానులకు ధీటుగా సెలబ్రేషన్స్ ను కొనసాగిస్తున్నారు. 
 

మరోవైపు యూఎస్ఏలోనూ ‘బిల్లా’ రీ రిలీజ్ గ్రాండ్ గా జరిగింది. అక్కడి ప్రభాస్ ఫ్యాన్స్ కూడా థియేటర్లలో హంగామా క్రియేట్ చేశారు. ఇందుకు సంబంధించిన ఫొటోలు నెట్టింట వైరల్ అవుతున్నాయి. అదేవిధంగా మహేశ్ బాబు ఫ్యాన్స్ కూడా డార్లింగ్ కు స్పెషల్ విషెస్ తెలుపుతూ.. బర్త్  డే సెలబ్రేషన్స్ లో పాల్గొనడం విశేషం. డార్లింగ్ పుట్టిన రోజు కావడంతో అభిమానులు ర్యాలీలు తీశారు. పలు చోట్ల సేవా కార్యక్రమాలు కూడా చేశారు.